Halloo 4
4
Qayeelinaa Abeelinochi Mooyo
1Aroyee gubb Addaami bi mechee Hewaanina danehe. Biyoo xifaꞌa Qayeelin shiyahan. Hewaaniyoo “Anaami bushoon Doono Yeer waanee danete” iyan. 2Wotta daakkaꞌa, Abeeli gettee beeton shiyahan. Boonoshi diccii oogetoyee gubb, Abeeli bagee shiijjechon tunehe; Qayeeliyoo showee gochechon tunehe. 3Ikke areddoon Qayeeli bi gochiti maayoochee Doono Yeerich buuroon giddiihe. 4Abeeliyoo wotta bi bageenaꞌo daggoochee awuyonaa shiichii shiijjetonon guuriꞌi Doono Yeerich deejjiye. Doono Yeeriyoo Abeelinaa bi giddiiti deejjoonon ciinniꞌi emiriye.#Hib. 11:4 5Tunebaani Qayeelinaa bi giddiiti buuroonon ciinniꞌi emiraanoone. Ebich Qayeeli oogeton ippehe; bi aafoo shiixxehe.
6Aroochee Nuggishoo Doono Yeeri Qayeelich ishichiye: “Amoyich ippenne? Amoyich ne aafo shiixxehe? 7Gaaweton ne shuuneto gaata, ne aafo biresho toone? Tunebaani gaaweton tuniyoo ne qayigaata, axaaxoo ne kellooch ottitone; bi qaatoo neen hajjemmone; tunebaani ne bi toommooch taatebe” iye.
8Aroyee gubb, ikke areddoon Qayeeli bi manoo Abeelin “Ne waataa gadd hambone” iye. Hammiꞌi arooch boonoshi beetaa, Qayeeli bi manoo Abeeli toommooch tiyiꞌi wuxiye.#1 Yowa. 3:12
9Aroochee Doono Yeeri Qayeelich “Ne manoo Abeeli beeto aabiichiye?” iye.
Qayeeliyoo “Ta ariyaache. Ta, ta manoon quyecho taane?” iye.
10Doono Yeeriyoo biich ishichiye: “Ebi ne halliti mooyo amoone? Ne manoo damee qaaro showoochaa ta waan cookii beetone. 11Illa ebiyee bekk uppeto neene; ne ukkiti ne manoo damoon ucha bi kookkoon gaxxiti hini showee toommoochee yookketo neene. 12Showoon ne goyaa, ebiyee bekk maayoon neech imaachemmone. Showee toommo bulliich ne kexon waaxi gooyi, yallyallimemmo neene” iye.
13Qayeeli Doono Yeerich ishichiye: “Ta toommooch ne nalliti nalloo shaagon ta hakkaani, oogeti maggoone. 14Ebiyoche, hanaach ta showoochee taan yookketine; ne aafoocheenoo wokkete; showee toommo bulliich ta kexon waaxi gooyi, yallyallimi beeyemmo taane. Illa taan danemmi asho koniyoona taan wuxemmone” iye.
15Doono Yeeri Qayeelich “Ebi toonoone. Neen wuximmi asho koniyoona bi tunegaata, shabaatte kishee nichoo bi toommooch gaachemmone” iye. Doono Yeeriyoo Qayeelin danemmi asho koniyoona bi wuxaachemmoyich, malletoon bi toommooch geddiye. 16Aroochee Qayeeli Doono Yeeri aafoochee kechii hammiye. Eden beeti mixinaꞌoochaa aabi-keyo waan beeti, Noodee#4:16 Noodi geto, “Yallyallimoo” getone. showooch hammii kotehe.
Qayeeli Shiijjereenaꞌo
17Qayeeli bi mecheena danehe; xifaꞌa Henookin shiyahan. Ebiyooba Qayeeli xaqqee uxerechi katemoon shuunehe; ebi katemee shigoon bi bushoo shigoona, Henooki ii shigiihe. 18Henooki Iraadin shiyihe; Iraadi Mahuyaꞌeelin shiyihe; Mahuyaꞌeeli Metushaꞌeelin shiyihe; Metushaꞌeeli Lameekin shiyihe.
19Lameeki gutte mechoon shaaggiye. Ikkeechi shigo Aadi, bareechi shigoo Tsiiline. 20Aadi Yabaalin shiyahan; biyoo duukkaanoon xogii waaxxiibee shaꞌeebeeti, gijjee shiijjechinaꞌochi qaabbechi nihoone. 21Bi hilloochi shigoo Yubaaline; biyoo ooge ximboon yexxiibeeti, shumburoonoo huggiibeeti shaatteenaꞌo qaabbechi nihoone. 22Tsiili Tubaal Qayinin shiyahan; biyoo qiicoon gooshoonaa xuuroonoochee qicciꞌi shuuneebeeti qemmone. Tubaal Qayini manee Naꞌaami getteehan.
23Lameekiyoo bi mecheenaꞌo Aadinaa Tsiilinoyich ishichiye:
“Haanoshite, ta mecheenaꞌote, waayebote!
Ta gettaa beeton gaawichi ellebote!
Ikke asho taan bi yexxitoyich,
ikke gurimaashoo taan bi mayiitoyich, wuxito taane.
24‘Qayeelin wuximmo toommooch
shabaatte kishee nichoo gaachemmone’ getteetone.
Tunebaani Lameekin wuximmo toommooch
shabaa shabaatte kishee nichoo gaachemmone” iye.
Seetinaa Henooshina Shiijjo
25Addaami wotta bi mecheena danehe; anaami bushoonoo shiyahan. “Qayeeli wuxiti Abeeli keroon Yeeri bare bushoon taach kerite” iyaꞌa, bi shigoon, Seeti iyan. 26Seetich wotta anaami bushoo shiijjehe; bi shigoonoo, Henooshi iye. Ebiyooba asho corootiibee, “Doono Yeero” ii corootooch giyiye.
Currently Selected:
Halloo 4: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
