Halloo 19

Sodoomi Asheenaꞌo Magge Axaaxoon Shuuno

1Ebiyee gubb, showoo xum bedooch, gutte maraakeenaꞌo Sodoom shaggiyeete. Looxiyoo katemee kellooch koteꞌi beehe. Biyoo boonoshin beeggiꞌi, boonoshina daneya kotoochee tiyiye; baroona showooch guufeꞌi boonoshin diggiihe; 2ishichiinoo iye: “Ta dooninaꞌote, doogena ittoshi guuno ta kexooch shagote. Ittoshi baatoonoo macheree qeyemmo ittoshine; aroochee yaach maaddoona ittoshi gommon hammemmo ittoshine” iye.

Boonoshiyoo “Tuneyaache. Hini addibaaboochiye no qeyemmo” iyeete.

3Tunebaani Looxi qollee bi iritiitoyich, bi kexooch qeya biinna tookkii hammii giyiyeete. Qare kosho kachemmonaa shaawi maayo qannemmonoyich gettiye; madoo giddehe; boonoshiyoo maaheete. 4Batt tokketeyaan boonoshi beetaa, are Sodoomi asheenaꞌo, gurimaashoochee geenooch beddaahaa bulli kiceeꞌi waa, kexon keppheheete. 5Looxin ceeggiꞌi ishichiyeete: “Hanaachi xum ne kexooch giyiti asheenaꞌo aayeete? Boonoshin no qeyemmoyich hach maaxooch nooch kichibe” iyeete.

6Looxiyoo boonoshi waan maach kechiye; shaaqqoonoo gubboona hicciye. 7Boonoshichoo ishichiye: “Ta xibeenaꞌote, ebiyoommi gonde mooyon shuuneyaahote. 8Batt shaakkeyaani gutte gidiide bushiisheenaꞌo taach beetinaꞌone. Boonoshin ta kichaa ittoshi shunnimmon shuunebote. Taan gibeneꞌi ta kexooch boonoshi giyitoyich, hini asheenaꞌo toommooch amoonolla halliyaahote” iye.

9Boonoshiyoo “Bekk ikibe! Iibbittinoona hiniich beeya waati hini uro nallee nallecho tuneya qaawiibeete? And boonoshi toommooch tuniiya no gabitoyee beshoon ne toommooch tuniyemmo noone” iyeete. Looxin xuqqii hittiittilliiꞌi, shaaqqoon yexxii tiicha beddiyeete.

10Tunebaani kechi maac beeti, ebi gutte asheenaꞌo boonoshi kishoon kichiꞌi Looxin geechii kexooch giijjiyeete; kelloonoo tuggeheete. 11Aroochee maaxona beeti asheenaꞌon, giishoochee oogooch beddaahaa, bullichi aafoon daayiiheete; ebich kechi kelloon daneya qaawiibee mucceꞌi maraateheete.

Looxi Sodoomin Gawukkiꞌi Keyo

12-13Hini are gutte asheenaꞌo Looxich ishichiyeete: “Hini katemooch beeti ne xiboo, koni konine? Ne bushiisheenaꞌochi keneenaꞌo, ne anaami bushiisheenaꞌo, ne maache bushiisheenaꞌo, woyee bare xibeenaꞌo beegaata, hini katemoochee kaate boonoshi kechemmoyich tuniibe. Hini xaaꞌoon aalliyane no ii beeto. Bi daggooch beeti asheenaꞌo toommooch cookeeti cookoo Doono Yeeri aafooch oogichii woddetone. Ebich ‘Aalliibote’ ii Doono Yeeri noon wochee deejjitone” iyeete.

14Looxiyoo kexoochee kechii hammiye. Bi maache bushiisheenaꞌon shaaggemmi bi naacheenaꞌoyich ishichiꞌi gettiye: “Kaate tiyi hini xaaꞌoochee keyote. Doono Yeeri hini katemoon hidi aalliiya ii beetone” iye. Tunebaani ebi boonoshich cooqqirii beeton shaahiye.

15Showoo hariya gaargaariye. Maraakeenaꞌo Looxich “Kaate tibe! Ne mecheenaa hiniich beeti, ne gutte maache bushiishoonon yeshiree keye. Katemeexi asheenaꞌo toommooch shaggemmi naxoona hidaa ittoshi aalleyaachemmoyich keyote” iibee afaafinikkiyeete.

16Tunebaani Looxi nibbehe. Doono Yeeriyoo Looxich bi ariqqetoyich, hini are maraakeenaꞌo bi kishoon, bi mechee kishoonaa bi gutte bushiisheenaꞌo kishoonon yechiꞌi, katemoyee maach kichiyeete. 17Boonoshi kichitoyee gubb, ikke maraakoo Looxich ishichiye: “Wociree ittoshi kashoon wodiibote; gubb wotte ciinnaahote. Hini bakkoo aabiichona neexeyaahote; guudinaꞌooch keyiree wodibote. Ebi tuno qayigaata, ittoshicho qitii aalloone” iye.

18Looxi boonoshich ishichiye: “Ta dooninaꞌote, ebi tunaaye. 19Ittoshi guuno ta ittoshi aafoochaa gidoon daneto taane; ta kasheen wodiyoyich ooge deꞌittinoon taach tuniito ittoshine. Tunebaani guudinaꞌo beetooch wocciꞌi muricoyich, ebi guudo oogeti wohone; batt shagaan ta beetaa, ebi waabeeti naxo ta toommooch kindaa, qitemmo taane. 20Okk ebi katemee woccii muricoyich katineene; biyoo giisheche katemeene. Ta kashoon wodiyoyich ebi katemeech wociree muricona! Giisheche katemee tooneene?” iye.

21Maraakoo Looxich “Gaawiye. Ne qolleton tuniyemmo taane; ne getteti katemeen aalliyaachemmo taane. 22Kaateree arooch woci murice. Arooch ne shaggemmi wottoon, amoonolla hallaachemmo taane” iye. Looxi giisheche ii bi ceeggitoyich, ebi are katemeechi shigo, Tsoꞌari#19:22 Tsoꞌari geto, “Giisheche” getone. getteehe.

Doono Yeeri Sodoominaa Gomoorinon Michii Aalliyoo

23Looxi Tsoꞌar bi shaggimmona, showoo harii aabo kechitone. 24Arooba Doono Yeeri waageroo micciibeeti qaaqqoon shimaayoochee Sodoominaa Gomoorinochi toommooch amichittinoon dichiye. 25Ebi are katemeenaꞌo, boonoshi guudoona beeti bakkoo bulli, ebi katemeenaꞌooch beeti ashoonaa are showooch beeti, colleti mooyo bulloshina ciroona miccii aallehe. 26Looxichi mecheyoo gubb wottaa bi ciinnetoyich, arooch hicewee guudo tunaa echahan.

27Abrahamiyoo dechara maaddoona tiyiꞌi, Doono Yeeri aafooch bi neexeti xaaꞌooch wochinnoon hammiye. 28Sodoominaa Gomoorinon, wotta arooch beeti, bakkeexi showoo bullin dugilla ciinniꞌi, aroochee cufoo miceexi qaaqqee booddoo keyoommon, kechii beetaa beeggiye.

29Eechiꞌi Yeeri ebi Yoordaanoosi bakkooch beeti katemeenaꞌon bi aalliihooba, Abrahamin gabiye. Looxi beebee echeti katemoon hidii bi aalliihooba, ebi are naxoochee Looxin kichiye.

Moꞌabeenaꞌonaa Amooneenaꞌonochi Yoodo

30Looxi Tsoꞌar beemon bi shattitoyich, bi gutte maache bushiishoona tookkii aroochee kechii hammiꞌi, guudinaꞌooch kotehe. Boonoshina tookkii xaqqee gofee daggooch beemooch giyiye.

31Ikke areddoon qaabbe bi bushee guucheyich ishichiyan: “No nihoo geeneeniye bi beeto. Showee toommo bulliich beeti doyoommon noon shaaggemmi anaamo hini showooch aalloone. 32Ebich ne waataa no nihoyich woyinee uyoon uchi mashiichi, biinna tookki qebone; bi yaroo doogaachemmoyich, bushoon biich shibone” iyan.

33Aroobee xum boonoshi nihoyich mashiibeeti woyinee uyoon uchiyeete. Aroochee qaabbee bi nihoo waan giyahan. Biyoo ebi bushee gimonaa bi keyonon ariyaanoone.

34Bi dechara qaabbee guucheyich ishichiyan: “Yiich ta nihoo waan giyeti taane. Hanaachi xum wotta mashiibeeti woyinee uyoon biich uchibone. No nihoochi yaroo doogaachemmoyich, ne wotta hanaach bi waan gibe” iyan. 35Aroobee xum wotta boonoshi nihoyich mashiibeeti woyinee uyoon uchiyeete. Guucheyoo bi waan giyahan. Aroo bushee gimonaa keyonon ariyaanoone.

36Ebi Looxichi gutte bushiisheenaꞌo boonoshi nihoo waanee xifeheete. 37Qaabbeyoo anaami bushoon shiyahan; bi shigoonoo, Moꞌabi#19:37 Moꞌabi geto, “Nihoo waanee” getone. iyaa shigiihan. Ebi aroo hanaach Moꞌabeenaꞌochi qaabbechi nihoone. 38Guuchee wotta anaami bushoon shiyahan; bi shigoonoo, Been Ami#19:38 Been Ami geto, “Ta xiboochi bushoo” getone. iyaa shigiihan. Aroo hanaach Amooneenaꞌo qaabbechi nihoone.

Currently Selected:

Halloo 19: KBRC

Highlight

Copy