Halloo 20

Abrahaminaa Abimeleekinochi Mooyo

1Abrahami aroochee tiyii, Negeebi barahoo waan hammii, Qadeeshinaa Shuurinochi gutte daggooch kotehe. Giisheche yemeenoon Geraaree showooch koteꞌi beebee, 2bi mechee Saarin “Ta maneene” ii beehe.#Hal. 12:13 Ebich Geraaree taatoo Abimeleeki wochiiꞌi, Saarin shaagga daammiye.

3Ikke xumoon Yeeri gumona daneꞌi, Abimeleekich ishichiye: “Waayebe; ebi ne daammeti ure kenechine; qitito neene” iye.

4Tunebaani Abimeleeki batt ure waan shagaanoone. Ebich Yeerich ishichiye: “Ta Doonocho, amee gondoonona shuuneyaano taane. Ishigaata, amoyich taannaa ta asheenaꞌonon aalliiya inne? 5Taach, ‘Ta maneene’ ito bi toone? Wotta aree bi alla ‘Ta manoone’ getaaneene? Ebin ta tuniito, xalle mulloonane; ta shuuneti gonde mooyo aalloone” iye.

6Yeeriyoo gumona biich ishichiye: “Xalle mulloona ne tuniyoon ariito taane. Tawoo wotta, ta aafooch gondoon ne tuniyaachemmonaa bi achooch ne shagaachemmonoyich, neen ta quyeto ebichiye. 7Illa ureen bi kenoyich wochibe. Biyoo keemechone. Neech corootemmone; newoo wodemmo neene. Tunebaani wochoo ne qayigaata, neennaa ne asheenaꞌo bullina qitemmo ittoshi tunoon ariibe” iye.

8Ebich Abimeleeki bi dechara maaddoona bi iraasheenaꞌo bullin ceeggii kiciꞌi, ebi mooyo bullin boonoshich gettiye. Boonoshiyoo waayeꞌi oogeton shattiyeete. 9Aroochee Abimeleeki Abrahamin ceekkiiꞌi ishichiye: “Ebi no toommooch ne tuniiti mooyo amoone? Neech amoon ta gondetenane ebi shaahe naxo taannaa ta taatee showoonooch bi kindemmoyich ne tuniito? Iberoon tun bedaani mooyoniye ta toommooch ne tuniito” iye. 10Aroochee Abimeleeki “Ebin ne tuniitochi amoyichiye?” ii Abrahamin echehe.

11Abrahamiyoo Abimeleekich ishichiye: “ ‘Hiniich Yeerin shattiibeeti asho aalloone; asheenaꞌo ta mecheyicha getiree taan wuxemminaꞌone’ iyaa ta gabitoyichiye. 12Wotta iberoon ta maneene; ikke indeechi bushiishoo tuno no qajjetaanona, ikke nihoochi bushiishoo noone; tawoo biin shaaggehoye. 13Yeeri ta nihoo kexoochee keyiree, bare showooch ta hammemmoyich taach bi gettiyooba, tawoo biich ‘Taan ne shunon ebina bekkiibe. No shaggemmi xaaꞌoo bulliich “Ta manoone” gete’ iyaa getteto taane” iye.

14Aroochee Abimeleeki bagoon, miimon, gonneenaa guunonon Abrahamich immiye; bi mechee Saarinoo wochiye. 15Biyoo Abrahamich ishichiye: “Ebi bulli ta showoone; ne shunnemmi xaaꞌooch kotebe” iye.

16Saarichoo “Ne manoo Abrahamich hume xure birewoon machaꞌa immeto taane; ebi nummoona neenna tookkii beetinaꞌo bulli xallee ne tunoon ariyemminaꞌone; ebina asho bullich miixeyemmone” iye.

17-18Doono Yeeri Abrahami mechee Saarichi naboona Abimeleeki kexooch beeti maacheenaꞌo bushoon boonoshi shiyaachemmoyich, boonoshi maacoon dookkitone. Ebich Abrahami Yeer waan corootiye. Yeeriyoo Abimeleekin wodiihe; wotta wochinnoon bushoon boonoshi shiyemmoyich, bi mecheenaa bi gonneenaꞌonochi maacoon qechiye.

Currently Selected:

Halloo 20: KBRC

Highlight

Copy