YouVersion Logo
Search Icon

Ra Vei Hira Yarisula 7

7
NA SOPENA 7.
1Natuha na varese-prist motuhae vai motataholo, me Stiven moaso:
2“Ra tuahau me tamau, otoroho. Na hauhaua tahonai hi Atua momalua me na tamaja Epram me na rani motoho me Meso-potemia mine tomotoho me Haran,
3Moaso ta mea, “Oijure na pilam ureure me ra tavu himu, oimalua me na ureure apiseho.”
4Natuha Epram mojuri na ureure hira Kalti, tomotoho me Haran; tamana momate, momalua me na ureure naa, veae ototohoae.
5Atua mosarahu ta mea na pilana sanu, saite tano moparavu pala ena. Maa moaso morahu pa ta mea na ureure mopilana, suri ra matuna puina mono, maa me na rani natuha saite matuna.
6Atua moaso na sanu naa, “Ra matuna puie Epram temauri pa me na ureure mosapilara veae tevera tetahavarao tipa, teveioso mera ra tauni tari vahavate.
7“Inau ailailahi ra tanoho isei tevera tevarao tipa surira,” Atua moaso, “tau tejuri na ureure, telotu meau naanoi.”
8Natuha Atua movei, valui Epram, na Aso hina Rahu hina Tavetali; palea Epereham motami Aisak tau, me motavetalia morani vahalimaravito. Me Aisak motamai Jekop tau; Jekop motamara Varie havulatea vana morua.
9Ra Varie, suria tepilohi, tevolivoliahi Josev sura varaotipa me Ijipt; maa Atua movaluia natuha,
10Molavituhea me na sena mamahanu vunuvunu, move Vero na Moli hi Ijipt, momejeia, movea mololorani mono; movea movarese hi Ijipt vunuvunu, me Kenen, me ra tajua vunuvunu me na peana.
11Natuha na marua momalua me Ijipt vunuvunu me Kenan, movera temamahanu, ra tamaja tesapasu na hanihani.
12Jekop moroho na oni tomotoho me Ijipt, mosulara tamajaae. Na majihana sera laho.
13Me na rani sera vano vaharuana Josev motapuna pisea me ra tuahana, me Vero mopinisi na hisei tamana Josev.
14Natuha Josev moaso huhurera tamara Jekop me ra tavuhina vunuvunu, tehavulimaraverua vana molima.
15Palea Jekop movano me Ijipt, momate, inie me ra tamaja mono.
16Telavi na epera me Sikem, tejurira me na moru Epereham movolia hina sule me ra matui Hemor me Sikem.
17Hisa na rani momalua Atua move na sanu moaso mine movea me Eperaham, ra tanoho temauri motavere me Ijipt.
18Na moli havui momaraha, mosapinisi Josev.
19Na Moli naa mojihara tavuhija, moveioso mera, movera tejurira matura sura tesamauri.
20Naa Moses mo-pauli-lele. Na pahona motahonai tohova; na hapatia motolu mohani me na peai tamana;
21Me na rani tejurira, matura hajae Vero mopasu nie, momata inie pala pilana.
22Mopinisi ra sanu hina lolorani hira tajua Ijipt, mopinisi susuhi sura lalaa, sura ve ra sanu.
23Hisa motauni havulavate, moninima me na lolona, molaho sura reni ra tuahana ra tajua Israel; moreni na tajua moveioso me na tajua Israel, motuiturituana, mopuripuri nie, molosi na tajua Ijipt.
24Moninima ra tuahana tepinisi Atua mosulae sura tuituritura; tesapinisia.
25Na novi maa motapuna pisea ta mera, hisa tejumu; momeje na lolora motea, moaso,
26Tajua, tuamiu, sura sava otoveioso ta me amiu?
27Na tajua moveioso me tuana, motipai, moaso, Isei moveho o-moli, o-varese hija?
28Oimeje na veimeteau, pala oiveimete na tajua Ijipt me na novi?
29Moses morohoe, morovo, mosatajua hia, monatariesau me na ureure Mitian, veae molavi na matuna morua.
30Ra tauni havulavate tesori, hisa tomotoho me na Tano-Oru hi Sainiae, na enjel momalua ta mea me na hapu me na hau.
31Hisa Moses morenia, mo uloulo: hisa movano tararoi mea sura renia, na roroi Atua momalua ta mea.
32Moaso, “Inau Atua hira tamamu, Atua hi Epereham, Atua hi Aisak, Atua hi Jekop”. Natuha Moses momaherehere, moine na renia.
33Natuha na Moli moaso ta mea: “Oluja mera em: suria na vonae oitohoae motano tapu.
34Mine areni, mine areni na veioso mera pilau tajua me Ijipt, mine aroho ra pilara hajihaji, asumai sura lavituhera. Oinumai nai, asulaho pa me Ijipt.”
35Moses naa, isei tevotoa, teaso Isei moveho oi-moli, oi-varese? Atua mosulae, mo-moli hina lavituhera, na enjel momalua ta mea me na hau taiti, motuiturituana.
36Molavituhera, tau movei ra sanu tahajia me ra matamata me na ureure Ijipt, me na Tasi Hahara, me na Tano-Oru mono ra tauni havulavate.
37Moses naa, isei moaso me ra tajua Israel, Atua motai pa motea hira tua-haja mo-provet paleau; otosirohoe.
38Inie tajua, isei movalui ra uluo hi Atua me na Tano-Oru, movalui na enjel isei molalaa ta mea me na Vuti Saineae, movalui ra tamaja mono: molavi ra taharahu mauri sura rahu ta meja.
39Isei ra tamaja tesarohoe, tetiputuhea mera, me na lolora tetaliliu me Ijipt.
40Teaso me Eron, Oitai ra pilaja popora sura lavira I me na pahoja: suria Moses naa isei molavituheja me na ureure Ijipt, tosapinisi veae tomotohoae.
41Tetai na matuna “kau” me ra rani natuha, tevivijahe me na popora, teejieji suti na varao hina havera.
42Suria Atua motaperehea mera, morahu hire me na Lotu hina Vau hina Masau; palahi moulia me na pepe hina provet, “O ra tajua hi Israel otovivijahe ta meau ra sanu tahamate ra tauni havulavate me na Tano-Oru?
43Io otolavi valui amiu na pea hina lotu hi Molok, na vitiu hina pilamiu sari Remvan, ra popora ototai sura lotu hira,: alavituhe amiu pa moparavu jivi Papilon.”
44Ra pea hina Lotu hina Pisea mopilara tamaja pala movaraira, isei moaso me Moses, mositaia pala muvetia.
45Na pea hina Lotu naa terahu ta mera, ra tamaja valui Josua telavi me na ureure naa (me na rani Atua morohora tajua me na pahona) tomotoho naa me na rani hi Tevit;
46Isei Atua momejeia, momeje tai na pea hina Lotu pile Atua hi Jekop.
47Maa Solomon motai na peana.
48Na Moli tahajia mosatoho me na Pea hina Lotu ra tajua tetaia. Na Provet moaso palea:—
49“Tailahi na sihesiheu, na ulu na vala hina eu: na pea na sava oitaia suriau?” Na Moli moaso, “Veae na Vonae amarohiae?”
50Na haveu motai ra sanu vunuvunu?
51Otoraivono, na lolomiu tepohipohitupu, ra jaliamiu mono, tuitui otohusahusahi na Talume Tapu, otovei palea ra tamaja tevera.
52Isei na Provet ra tamaja tesaveioso ta mea? Teveimete ra tajua tepisera na malua hina Tajua-tahajolo: isei otojiho nie, otoveimeteia,
53Otolavi na leo hauhaua momaraha hina enjel, oto-savea.”
54Hisa teroho na sanu naa, na lolora tehahara taha-jia, tehatihati pirivivi.
55Maa inie, motavere hina Talume Tapu, moriosahe na tailahi, moreni na majamajana sei Atua, me Iesu moturitoho me na matuana havei Atua.
56Moaso, “Oirenia, areni na tailahi momaala, na Matui Tajua moturitoho me na matuana havei Atua.”
57Teaso pati, tejojohi ra jalihara, tealasia vahatea,
58Tehoroe movano me na vanua, tejihia: ra tajua terenia, tenunutuhe visivisira me na ena uluo; na hisena Saul.
59Tepirivivi Stiven, Moore Atua, moaso, “Moli Iesu, oilavi talumeu.”
60Motiepau, moaso pati, Moli oitena lolohahara suria. Hisa moaso naano, monavu.

Highlight

Share

Copy

None

Want to have your highlights saved across all your devices? Sign up or sign in