Ra Vei Hira Yarisula 25
25
NA SOPENA 25.
1Na pohi tolu tau Vestus mo-moli, mojuri Seseria mosahamai me Jerusalem.
2Natuha na vareseprist me na varese hira Ju teravaraia Paul movei oso, teratuhae.
3Teramejeia movei na sanuoso me Paul, mosulae telavia me Jerusalem, tepunitoho me na rio sura losimeteia.
4Maa Vestus moasoliliu, Paul toitoho me Seseria, me mo tapuna lahoae taroroi.
5Moaso, “Valura varese himiu tesumai valuiau me tetatahi nie vai inie na tahaoso.”
6Tau motoho valuira na pohi havulatea, mosumai me Seseria; inovi maa mosihe me na vonae hina ilailahi, moaso telavi Paul.
7Hisa momalua, tesumai me Jerusalem teturi taitalia, teetieti vasoosoo suri Paul, tesapinisa pisea motaharahu.
8Paul motapuna aso liliu, “Asavei na sanu oso motea me na leo hauhaua hira Ju, me na pea hina lotu, me Siser.”
9Maa Vestus momeje na vei ra Ju teejieji, moaso liliu me Paul, “Oimeje na vano me Jerusalem, ailailahiae suri na sanu naa?”
10Natuha Paul moaso, “Aturi me na vonae hina ilailahi hi Siser; veae oisiilailahi suriau: asaveioso me ra Ju, oipinisi susubia.”
11“Vai inau na tahaoso, vai aivei na sanu motahonai teveimeteau suria, asameje na rovo turera; maa ra aso oso vunuvunu naa te sanu tipa, saite tajua mo-pinisi na laviau ta mera. Atuha Siser suria.”
12Natuha Vestus tau moasoaso valuira uluo hina, moaso liliu, “Oituha Siser suria? Me Siser oisivano.”
13Tau valura rani moli Akripna me Pernisi tera-malua me Seseria sura reni Vestus.
14Hisa teratohoae na rani ra tari, Vestus movarai-rarua suri Paul, “Na tajua motea itoho isei Viliks mohajiria;
15Suria, me na rani atoho me Jerusalem ra varese-prist me ra varie hira Ju teaso oso suria, temejeau ailailahi suria.
16Moaso liliu ta mera, Ra tajua Romu tesarahu tetajua, teaso moveioso, sura mate mine te tajua tahatatahi nie tepasuae me na pahona, me motapuna aso liliu suri ra sanu oso mono.
17Suria, hisa temaluaae, na lohoti mojoa asihe me na vonae hina ilailahi, aaso telavia numai.
18Suria, hisa ra tajua tahatatahi nie temaraha, tesatatahi nie suri ra sanu aninima;
19Maa ra sanu hira pilara lotu, me motea Iesu, isei momate mine, isei Paul moaso momauri.
20Suria asapinisi paleve atuhatuha suri ra sanu naa, atuhae vai movano me Jerusalem, teilailahiae suri ra sanu naa.
21Maa hisa Paul motuhau ajuria me na ilailahi hi Aukustus, aaso timata nie me na rani asulae me Siser.”
22Natuha Akrippa moaso me Vestus, “Inau ameje na roho na tajua mono.” “Inovi maa,” moaso, “orohoe pa.”
23Inovi maa, hisa Akrippa momalua, me Pernisi, me na majamajara, teruhusahamai me na vonae hina roho, valui na moli tahajumu, me ra varese hina vantia, Vestus moaso telavi Paul numai.
24Vestus moaso, “Moli Akrippa mera tajua vunuvunu naanoi, otoreni na tajua naa, suria na vau hira Ju teaso pati, Moso tomomauri.
25Hisa apinisi mosavei na sanu hina mate, me motapuna tuha Siser suria, aaso asulae.
26Asapinisi ra sanu aulia suria me na pilau moli tahajia. Suria alavia me na pahomiu, me ameje jivi na lavia me na pahomu, O moli Akrippa, sura tau na tuhatuha, apinisi ra sanu auli suria.
27Suria aninima momuha asula na tajua mohajin, maa asauli ra sanu tetatahi nie.”
Currently Selected:
Ra Vei Hira Yarisula 25: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
