Ra Vei Hira Yarisula 24
24
NA SOPENA 24.
1Tau na pohi lima Ananaius na varese-prist mosumai valui ra varie, me te tajua motea na taha-leohauhaua na hisena Tertullus, isei movarai na moli suri Paul.
2Teorea momalua, Tertullus movaere aso-oso suria, moaso, “Suria toejieji suri na tohotamautu tahajia oivea me oivei ra sanu tahonai tohova me ra tanoho naa,
3Tolavia tuitui, me ra vonae vunuvunu, tahonai tohova Viliks, toejieji.
4Maa, asaveho oimalumulumu, atuhaho oroho na aso vaivai hije, oitataholo.
5Topasu na tajua naa momahisahisa, movei na asooso me ra Ju me na ulu vunuvunu, movarese hira tajua ra Nasarin.
6Molaholaho sura vei na pea hina lotu mosatapu: tolavia, tomeje ne ilailahi suria hina pilaja leo hauhaua.
7Maa na moli tahajumu Laisius momalua ta meja, mohorotuheja, molavia tureja.
8Movarai ra tajua taha-tatahi nie temalua ta meho: oipinisi p-a vai oituhatuhae, ra sanu teaso suria tetaharahu.”
9Ra Ju mono tetami, teasd ra sanu naa tetaharahu,
10Natuha Paul, tau na moli mopisu nie moaso, moaso liliu, “Suria apinisi iniho na tahailailahi hira tanoho naa ra tauni ra tari, aejieji sura tapu-aso suriau:
11Sura oipinisi ra pohi havulatea vana morua hasa asumai me Jerusalem sura lotu.
12Tesapasuau me na pea hina lotu hira Ju me na asoaso valui te tajua, asavera tajua tepuripuri me na pea hina lotu me na vanua tahajia.
13Tesapinisi piseho ra sanu teaso suriau tetaharahu.
14Maa na sanu naa avaraiho, palahi me na rio tejuria na lotu-oso, palea alotu me na Atua hira tamau, arohoroho ra sanu vunuvunu teulia me na leo hau-haua me ra provet.
15Arohoroho me Atua, palahi temejeia, me na rani motea na tamaraha hina mate hira taha-tahonai me ra tahaoso.
16Suria na sanu naa motaharahu avarao sura na lolou movoe me Atua, me ra tajua.
17Tau ra tauni ra tari asumai sura rahu na sule me ra pilau tanoho, me ra rahuvuso.
18Valura Ju hi Esia tepasuau me na pea hina lotu, avoe, saite vau, saite jumu.
19Motahonai tenumai naano, tevaraiho vai teaso oso suriau.
20E motahonai ra tajua naa tesiaso vai tepasu na sanuoso meau, hisa aturi me ra varie.
21Maa na leo motea aaso pati hisa aturi me na vuati hire, Suri na tamaraha hina mate teilailahi suriau havui.”
22Hisa Viliks moroho ra sanu naa, mopinisi susuhi mine suria, movaraira telohoti, moaso, “Hisa na moli tahajumu Laisius mosumai arohojuri pa na sanu naa.”
23Movarai na varesetahajumu momata Paul, mojuria molali, mosahorohoro te tuana motuiturituae e momalua mea.
24Tau valarani, hisa Viliks momalua valui na tupuna Trusilla, na hajae Ju, mosula me Paul, morohoe suri na rohoroho me Kristo.
25Hisa Paul molalaa suri na tataholo, suri na tapunavarese-hina, suri na ilailahi momalua pa, Viliks momaherehere, moaso liliu, “Oilaho naano: me na rani amejeia atasula suriho vahatea maa.”
26Momeje mono Paul movolia na sule sura mojuria: suria mosula mea vahatari, moaso valuia.
27Maa tau ra tauni morua Porkius Vestus momalua me na vonae Viliks: me Viliks momeje na rahu me ra Ju na ejieji, mojuri Paul mohajiri.
Currently Selected:
Ra Vei Hira Yarisula 24: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
