Ra Vei Hira Yarisula 19
19
NA SOPENA 19.
1Hisa Apollos motoho me Korinth, Paul molaho tali me na vuati hina ureure, movano me Evisus. Natuha mopasuara valura uluo hi Iesu.
2Moaso mera, Otolavi na Talume Tapu tau otorohoroho me Iesu? Teaso mea, Aue, tosaroho suri na Talume Tapu.
3Moaso mera, Otopaptais sura sava? Teaso, Me na paptais hi Jon.
4Natuha Paul moaso, Motaharahu Jon mopaptais me na paptais hina jomi, moaso mera tajua tesirohoroho mea isei momalua tahuna, me Iesu.
5Hisa terohoe, tepaptais me na hisei Iesu Kristo.
6Hisa Paul mosehe ra havena ta mera, na Talume Tapu momalua mera, teaso mera loe nonoho, telalaa.
7Ra tajua te-havulatea vana morua.
8Moruhusahamai me na pea hina lotu hira Ju, moaso hauhaua hapatia mo-tolu, molalaa, movei tapusira tepinisi suri na vonae hi Atua.
9Ra valura hire tevera lolora tehauhaua, tesameje na rohoroho, teaso-oso suria mera tajua. Suria Paul mojurira, molavi tuhera uluo hina, me molalaa me na rani vunuvunu me na pea hina pisahi hi Tirannus.
10Movea na tauni morua. Suria hire vunuvunu tetitoho me Esia hi Romu, ra Ju, ra tajua hi Kris, teroho na Leo hina Moli.
11Atua movera varao tahajia tohova me Paul.
12Motaharahu valura tajua telavi mera tajua taharojo na ruru-asjalo e na hapahapahoro mine tetieli na epena, me ra pilara rojo telaho, me ra talume-oso teruhusivo mera.
13Valura Ju tetilali vuso, tetahamahumahu, temahumahu me na hisei Iesu, na Varese, hire ra talumeoso tetitoho mera, teaso, Toaso meja hi Iesu, isei Paul molalaa suria.
14Molimaraverua matuna Skiva, na Ju, na vareseprist, tevea.
15Na talume-oso moaso liliu, Iesu apinisia, Paul apinisia, maa amiu, amiu isei?
16Na tajua, na talume-oso tetoho mea molije ta mera, mohauhaua jivira, molosira tahajia, suria terovo me na pea, saite visivisira, na epera temajimajiji.
17Ra Ju, ra tajua Kris vunuvunu isei tetoho me Evi-sus tepinisia; hire vunuvunu teine; teninima na hisena Moli Iesu motahajia.
18Ra tari hire terohoroho temalua, tevarai ra pilara sanu-oso tahamine;
19Ra tajua ra tari, mine temahumahu, tevilehuhurera pepe, tesulira me na pahora tajua; teevi na sule hira, tepasuae ra tairau vaha havulalima hina sulevoe.
20Suria na Leo hina Moli molaho paravu, momauri hauhaua tohova.
21Ra sanu naa mosori, Paul momeje me na lolona sura vano me Masitonia me Akaia, tau me Jerusalem, moaso, Tau avanoae, asireni Romu mono.
22Suria mosulara tajua morua isei teratuiturituana, me Masitonia, Timote me Erastus: maa motoho me Esia valarani.
23Na aso-aso motavere me ra sanu hi Iesu me na rani natuha.
24Na tajua motea, Temitrius movarao sule-voe, isei motai ra popora hina sule-voe suri Tianna, morahu na varao tavere mera tajua hina,
25Moorera tajua vunuvunu hina pilana varao tehuhurahi, moaso, “Tajua, otopinisi hina varao naa tolavi na sule?”
26“Mono otoreni, otoroho me Evisus me ra vanua vunuvunu hi Esia, Paul naa molalaa, motahaperehera tajua ra tari. Moaso, Te sa sari, totaira hi ra haveja:
27Suria na pilaja varao mosori; mono na pea hina lotu hi Tianna mosanu tipa, pilana sanu hina sule tavere tevei leelee isei me Esia vunuvunu me na ulu telotu mea.”
28Hisa teroho ra sanu naa tepuri-puri tahajia, teaso pati, “Tianna hira tajua Evisus motahajia!”
29Na aso tahajia me na vanua: ra tanoho terovo va-hatea me na pea tahajia, teravi valuira Kaius me Aristarkus, ra tuai Paul.
30Paul momeje na ruhusahamai mera tajua, maa ra uluo hina tehorohoroe.
31Ra valura varese hi Esia, ra tuana, tesula mea, tevaraia itena ruhusahamai me na pea tahajia.
32Suria valura teaso pati na sanu motea, valura ra sanu motatea; suria tesapinisi sura sava telalaa; hire ra tari ra tari tesapinisi sura sava tehuhurahi.
33Telavi Aleksanter ture na vau, tetipae me na pahona. Aleksanter mdtataa-horo sura lalaa tahonai suri ra tajua.
34Hisa tepinisi inie na Ju, hire vunuvunu teaso pati na klok morua, na rorora motea, “Tianna hira tajua Evisus motahajia!”
35Hisa na Varese hina vanua tahajia movera tetoho tamautu, moaso, “Tajua hi Evisus, isei tajua mosapinisi na vanua Evisus molotu me na sari-hajae tahajia Tianna me na popora mojovi me Jupiter?
36Suria ra sanu naa tetaharahu, motahonai ototoho tamautu, ototena vera sanu otosaninima nie.
37Otolavi naano ra tajua naa, te sa tahapapaliho me na pilaja pea hina lotu, tesaetieti suri ra pilaja sarihajae.
38Suria vai Temitrius me ra tajua tahavarao valuia, teaso na tajua naa moveioso, na leo hauhaua itoho, ra varese tetitoho otovaraira.
39Vai otomeje na sanu motatea, ra varese vunuvunu tesiaso suria.
40Taroroi ra varese hije tepurinuri suri na jumu naa; suria to-sapinisi sura sava na vau mohuhurahi.”
41Moaso sori palahi, mosula na vau telaho.
Currently Selected:
Ra Vei Hira Yarisula 19: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
