Ra Vei Hira Yarisula 18
18
NA SOPENA 18.
1Tau ra sanu naa Paul molaho ture Attens, monumai me Korinth.
2Mopasu na Ju na hisena Akuila, momalua me Pontus, taroroi momaraha me Itali, mosumai valui tupuna Prisilla; (suria Klautius movarai ra Ju telaho ture Romu) Mosumai merarua.
3Suria pilana varao mopala pilararua, tomotoho valuira, movarao: oilara varao na tula hapani.
4Me na sapat vunuvunu molalaa me na pea hina Lotu, motapusi vei ra Ju me ra tajua hi Kris tepinisi.
5Hisa Sailus me Timote terasumai ture Masitoniay Paul movarao hauhaua suri na Leo, mopisera Ju Iesu inie na Kristo.
6Hisa tejumu hina aso valuia, teetia, Paul mojiejie na visivisina, moaso, “Na jaemiu tomotoho mera remiu; inau avoevoe; taupa avano me ra lolopohitupu.”
7Morovo turea, moruhusahamai me na peai Justus, molotu me Atua, na peana motaroroi me na pea hina lotu.
8Krispus, na varese hina pea hina Lotu, morohoroho ne na Moli, ra uluo hina mono; ra tajua ra tari hi Korinth terohoe, terohoroho, tepaptais.
9Natuha na Moli moaso me Paul me na pohi me na navuriorio, “Oitena ine, maa oilalaa oitena roroho;
10Suria Inau avaluiho, saite tajua mopinisi losiho, suria ra tajua ra tari me na vanua naa tepilau.”
11Tomotohoae na tauni motea na hapatia molimarave, mopise na Leo hi Atua mera.
12Me na rani Kallio na varese hi Akaia, ra Ju vunuvunu tepuripuri Paul, telavia me na vonae hina ilailahi,
13Teaso, “Na tajua naa movei tapusira tajua telotu me Atua me na rio nonoho mosapala na Leo hauhaua.”
14Hisa Paul vahatea molalaa, Kallio moaso me ra Ju, “Vai na sanu naa inie na sanu-oso e suri na nahonahopoe, motahonai aroho amiu, tajua ra Ju,
15Maa inie na jumu hina leo, hire hise hira pilaja leo hauhaua, otomata nie; suria asailailahi ra sanu palea.”
16Mohorora ture na vonae hina ilailahi.
17Natuha ra tajua hi Kris telavi Sostenes, na varese hina pea hina lotu, temarasia taroroi me na vonae hina ilailahi. Maa Kallio mosamamahanu suria.
18Tau na sanu naa Paul tomotohoae mine mine, natuha molaho turera Tuahana, mohapani me Siria, valuia Prisilla me Akuila; mine moututusi me Kenkrea, suria movarai Atua movei na sanu itea suria.
19Momalua me Evisus, mojuriraruaae; maa moru-husahamai me na pea hina lotu molalaa valuira Ju.
20Hisa temejeia motohotohosivo, moaso aue;
21Moturaturahi, moaso, “Asihani na Hanihani tahajia me Jerusalem: maa ataliliu pa, vai Atua momejeia.” Mohapani ture Evisus.
22Hisa moravi me Seseria, mosahe, moaso valuira uluo hi Iesu, molaho me Antiok.
23Tau motohoae valararii, molaho, molaho tali na ureure Kalatia me Vrijia, movera uluo hi Iesu tehauhaua.
24Na tajua Ju na hisena Apollos, momalua me Aleksantria, mopinisi na lalaa tahonai, mohauhaua hina Leo tahonai, mosumai me Evisus.
25Na tajua naa mopinisi na rio hina Moli; momarohina, moaso, mopise taharahu ra sanu suri Iesu; maa mopinisi na paptais hi Jon hasa.
26Movaere aso hauhaua me na pea hina lotu; hisa Prisilla ma Akuila terarohoe, teralavia merarua, terapisea na rio hi Atua tahonai jivi.
27Hisa momeje na laho me Akaia, Ra Tuahara teuli mera uluo hi Iesu sura telavia: hisa momalua motuiturituara tahajia ra tajua terohoroho suria Atua motuiturituara.
28Suria mohauhaua sura vera Ju tepinisia, me na vuati ra vau, mopise hina Leo tahonai Iesu inie na Kristo.
Currently Selected:
Ra Vei Hira Yarisula 18: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
