1 Timote 6
6
SOPENA 6.
1Motahonai ra tajua tahayarao-tipa teninima tahonai suri ra varese hira, sura tesaetieti jia hisei Atua me na pilaja Pisahi.
2Moso ra tajura teninima taiti ra varese hira isei terohoroho suria hire ra tuahara; maa motahonai tevarao jivi surira, suria hire terohoroho, tetahonai, suria telavilavi ra sanu tahonai. Ra sanu naa oipipisera.
3Vai te tajua mopise te sanu nonoho, mosameje na aso tahonai, pala ra Leo hi Moli Iesu Kristo, mosameje na pise hina mauri tataholo,
4Momuri, mopinisi tipa, moasoaso tipa. Ra sanu naa tevei na jumu, na etieti, na ninima-oso temaraha.
5Me na lolora tahaoso isei temeje na mauri tataholo suri na volina; oilavituheho mera.
6Na lolotamautu inie na volina motea hina mauri tataholo.
7Tomalua majiha tosalavi te sanu, tomate tosalavituhe te sanu.
8Vai tolavi na haja, na visivisija motahonai totoho tamautu.
9Hire temeje ra sipilara sanu tetavere taupa tejovi me na sihoi, tevei murimuri, tepala te sanu jepojepo.
10Na meje na sule tavere inie na hoena veioso vunuvunu; valura temanomanoe telaho pele me na rohoroho, ra mamahanu terupajerera.
11Maa iniho, O tajua hi Atua, oirovo ture ra sanu naa: oilaho me na tahuna mauri tahaholo, na mauri tahonai, na rohoroho, na meje, na lohoti-tamautu, oinevu.
12Oijumu na jumu tahonai hina rohoroho; hijetoho na mauri tuitui tuitui suria mooreho sura oipise na mauri tahonai me na pahora tajua ra tari.
13Avaraiho me pahoi Atua isei movei mauri ra sanu vunuvunu, me na pahoi Kristo Iesu isei moaso na vetiveti tahonai me Pontius Pailet,
14Oivei na leo hauhaua naa, saite loha, sapa sanu oso meho me na rani Iesu Kristo momalua.
15Me na rani momejeia, na Taha Taitai Tahonai, na Moli hi ra Moli, na Varese hi ra varese, movea.
16Isei hasena tomotoho tuitui tuitui, tomotoho me na rani saite tajua mopinisa renia: saite tajua morenia, saitea mopinisi na reriia: na majamaja me na hauhaua tuitui mopilana. Amen.
17Oivarai ra tajua ra sipilara sanu tavere tesaninima tesameje na sanu pala na sule tavere molaho vileahi, maa terohoroho me Atua tahamauri isei morahu ra sanu tahonai ra tari sura toejieji.
18Tesivei ra sanu tahonai, tetavere hina varao tahonai, teraurau, tetuatua.
19Oivaraira tehuhurera vei tahonai suri ra rani temalua pa, sura telavi pa na mauri taharahu hasa.
20O Timote, oimata susuhi ra sanu morahu ta meho. Oijuri na asomurimuri na leo-jihajiha suri Atua.
21Valura tajua teninima tepinisi susuhi maa telaho pele suri na rohoroho. Amen.
Currently Selected:
1 Timote 6: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
