1 Timote 5
5
SOPENA 5.
1Oitena aso hauhaua me na varie maa oituhae pala tamam: me ra uluo pala tuahamu,
2Ra hajae-varie pala tinam, ra hajaeuluo pala ma-vinem hina aso-voevoe.
3Oitahonai me ra patinau (aaso suri ra patinau taharahu)
4Maa vai na patinau molavi ra matuna e ra puina motahonai tepinisi majiha na roho me ra tavuhina, terahu liliu me ra tinara, tamara: suria na sanu naa motahonai, Atua momejeia.
5Na hajae mo-patinau taharahu, motoho hasena, morohoroho me Atua, tuitui motuhatuha, momatapisi me na rani me na pohi.
6Maa vai momauri suri na urasi, na epena momauri maa na talumena momate.
7Oilalaa nie vahatari sura tesirohoe.
8Maa vai te tajua mosarauhara tavuhina, hire me na sipeana jivira, moiri na rohoroho, moso jivi na tajua-sa-rohoroho.
9Oisalavi na patinau sura rauhana vai ra tauni hina mosajivi havulalimarave, na tupuna tajua motea,
10Tiaso tahonai suria na sena varao tahonai: vai momata ra matuna, vai morauhana na taha-nonoho vai morasi ra ena tajua tahonai, vai motahonai me ra tajua-tipa, vai mohauhaua suri ra sanu tahonai.
11Maa oisavea suri na uluo-patinau suria me na rani tevei ejahi suri Kristo, temeje na talahia,
12Tevei Atua movotoa hire suria tejomuture na sera majihana rohoroho.
13Tau tevueraho, telaho lilili, temali loera, tevetiveti hara, tevarai ra sanu moso tevetia.
14Suria ameje ra uluo hajae tetalahia, tepalapala, temata ra sipeara, tetena vei ra sanu oso sura ra tajua toho-tipa teetira.
15Valura tetaliliu mine me Setan.
16Vai na tavuhina uluo hi lesu mopatinau motahonai inie morauhana, toho ra valura Kristian, sura ra valura Kristian terauhara patinau ra tavuhina mojoa.
17Vai na varese-hina-lotu movei tahonai na pilana varao motahonai teninima nie tahonai tohova, hire tevarao me na lalaa, me na pisahi.
18Suria na Pepe Tapu moaso, “Oitena hajirihoro na vavana pullok moatijajala na oni.” Motahonai na tahavarao molavi na volina.
19Oitena roho na aso tatahi suri na varese-hina-lotu maa vai ra tajua morua e tolu tevetia.
20Oiaso hauhaua me ra tahaoso me na pahora tajua vunuvunu sura ra valura teine.
21Avaraiho me na pahoi Atua me Kristo Iesu me ra enjel tahonai oivei ra sanu naa maa oitena meje te tajua jivi tuana.
22Oitena tatani na havem vileahi ta na rena tajua; oitena tuiturituara valura tajua me na pilara veioso; oitapum toho voevoe.
23Motahonai oitoho na oo na pei, oioo na uain taiti suri na tiamu, suri semu rojo.
24Ra veioso hira valura tajua telaho majiha, me na ilailahi, ra veioso hira valura telaho tahura.
25Palahi ra vei tahonai hira valura tajua tetoho majaraha. Oisapinisi na puni paravu na veioso.
Currently Selected:
1 Timote 5: TLM9109
Highlight
Share
Copy
Want to have your highlights saved across all your devices? Sign up or sign in
This is a historic text maintained by the British and Foreign Bible Society.
