Mphattuwelo 48

Yakopi nawaareriha asaana a Yusufu

1Unavinre ukati vakani, Yusufu ahohimeriya wiira: Athumwana anaawerennya. Ule ahorwaa waathotola, warwawe va ahaakusa asaanawe eeli, Manasesi ni Farayimi. 2Yakopi ahohimerya wiira: Mwamwanaa Yusufu howa wuthotola. Sirayeli aheemananiha wunwa mpaka woorya wunkoma wankorini. 3Ni ahomwiirela Yusufu: Nluku Okuru Cothene hokiphwanya uPeteli, ilapo yo'Kanaa ni hokireriha, 4eeraka: Nloko naa nno ninaahala uyaraca ni winciva ni mommo, cinkokhumelela ilapo cinci ca atthu ni kinkowuvahani ilapo ela ukhala yawinyu ukati wothene. 5Vano, asaanaa eeli, Farayimi ni Manasesi waayarenlyaa wIciipitu mi kihinaya uwa uno, ari awaka, toko ciryawe Rupeni ni Simeyoni. 6Vano asaana anhalaa waayara ayo awaa, nanso mwa nlattu wookhala nrukulu nimoca na Manasesi ni Farayimi na ayo anaahala waakhela mphantte woohiyeriya unaaca asunnaya. 7Mi kikhumaka uPatani, keettaka ni iphiro kihocukula nlattu wokikhwela Rakeli ilapo yo'Kanaa unahanle vakani uphiya uFarata. Kihonvitha ni iphiro yorwaa uFarata, uneehaninya uPetelehemu.

8Woonnyawe Sirayeli asaana a Yusufu, ahokoha eeraka: Ala tasipani? 9Yusufu ahaakhula eeraka: Ala ph'asaana akivahilyawe Nluku. Vano Sirayeli aheera: Waawaane woono kawarerihe. 10Miitho a Sirayeli yahoririyaca mwa nlattu wo wuuluvala ni ule khoonaca ratta. Phimaana Yusufu ahaakusa asaanawe ayo ni weemesa wakhiviru waya athumwane. Vano Sirayeli ahaavaha alaahuma ni waakapatta, 11ni ahomwiirela Yusufu: Akaacuwela wiira kinawoona tho ikhovyaa, nna va Nluku hokitthunihera woona asaanaa.

12Vano Yusufu ahaatamiha wamwettoni wa athumwane ni ahooroma mpaka iyuuci awe uphiya vathi. 13Vano Yusufu ahaakusa oyeeli, Farayimi ahomweesa moono nlopwana wakhiviru waya moono nthiyana wa Sirayeli, ni Manasesi ahomweesa moono nthiyana wakhiviru waya moono nlopwana wa Sirayeli ni oyeeli ahaaciserihaca wa Sirayeli. 14Vaavale Sirayeli ahotaphula ntata no moono nlopwana n'uthatela wamuru wa Farayimi mwana omwankani, ni avirikanihaka myoono nnyo, ahokusa ntata no moono nthiyana n'uthatela wamuru wa Manasesi mwana omuulupale. 15Vano ahonreriha Yusufu eeraka:

Nluku amweettelaya mayapaapa

Aparahamu ni Isaki,

Nluku kihaakhenle meettelo aka

mpaka nihuku no'lelo.

16Ncelo kooponle coonanara cothene,

waarerihe ala amirawo ala.

Yiihaneliye ncina naka ni macina o mayapaapa

Aparahamu ni Isaki,

ni wincive unethi aya vathi va.

17Woonnyawe Yusufu athumwane yeesaka ntata no moono nlopwana wamuru wa Farayimi, khawaancivenle. Phimaana ahovara ntata na athumwane apheelaka waakakhaniha naari wamuru wa Manasesi weesa wa Farayimi ni naari wamuru wa Farayimi weesa wamuru wa Manasesi. 18Ni aheerela: Nhipanke commo paapa. Ula phi omuulupale, mweeseke ntata ninyu no moono nlopwana wamuru wawe va. 19Nanso athumwane yahokhotta ni yahomwiirela coo: Mi kinaacuwela, mwanaka, mi kinaacuwela. Ni uyo naahala ukhalana unethi mwinci ni naahala ukhala nkhulupale. Nanso unokhalaru ciicammo, nhimawe uyo phinhala utepa ukhala muulupale wompwaha munnawe uyo ni unethi awe unaahala ukhala mwinci.

20Commo Yakopi ahaarerihaca nenno nihuku nno eeraka:

Unethi wo Sirayeli wapheelaka urerihana unaahala uromola macina enyu wiiraka coo:

Nluku oopanke we toko campankilyawe Farayimi ni Manasesi.

Ni ahomweesa Farayimi uhoolo wa Manasesi.

21Wahoolo Sirayeli ahomwiirela Yusufu: Kihanle vakani ukhwa, nanso Nluku nohala ukhala ni nyu ni naahala wuuturuselani ilapo ya amuci inyu okhalayi. 22Vano we ukhala wiira uhaana iyuulupale yo waapwaha asunna ayo, kinawuvaha nttetthe uri myaako waakhilyaka annamori ni ikatana ni muura caka.

Currently Selected:

Mphattuwelo 48: NNI

Highlight

Copy