Mphattuwelo 47

Yakopi nawaakheleliya ni Farawoo

1Yusufu ahorwaa wa Farawoo unvaha ihapari eeraka: Apaapa na asunnaka ahowa. Ankhuma uKanaa ni ikhontwaa caya, imope caya ni mihakhu cothene cirinaya. Nna va ari uKoseni. 2Wahoolo ahaathanla asunnawe athanu ni ahonthoonyihera Farawoo.

3Farawoo ahaakoha eeraka: Nnovara ntekoni? Ayo yahomwaakhulaca yiiraka: Akarumeya aa ari ahakheli o'nama toko mayapaapehu okhalayi. 4Yahomwiirelaca tho: Naawile ukhala mu ukati vakani kontha itala uKanaa nwo inaatepa, ni inama ca akarumeya aa khacinoona iyolya. Contte, waatthunihere akarumeya aa ukhala uKoseni.

5Vano Farawoo ahomwiirela Yusufu: Athumwana na asunnaa yoweenle we 6ni ilapo yo wIciipitu iri ni we. Upanke mananna oorera, wiira athumwana na asunnaa akhale mapuro omaana. Waahiye akhale uKoseni. Woona wiira akina ayo ari atthu aankhili, waavahe nteko woohakhela inama caka.

7Vano Yusufu ahaakusa athumwane mpaka wa Farawoo, ni Yakopi ahonreriha Farawoo. 8Farawoo ahonkoha Yakopi eeraka: Urina myakha mikavi? 9Yakopi ahomwaakhula Farawoo eeraka: Myakha caka co weettakaca ciri iminya wo talathini (130). Ciri vakani ni coorika, ni khacimphiya toko cakhalaya mayapaapa. 10Vano Yakopi ahonreriha Farawoo ni ahorwaa.

11Yusufu aheesa ni waavaha athumwane ni asunnawe mapuro o'cayra o'lapo yo wIciipitu, nttetthe wo'Ramasesi, toko caalamunlyawe Farawoo. 12Ahaavaha iyolya yowaatosa, ukhuma athumwane, asunnawe ni amuci awe othene mpaka asaana yarinawe khula ntthu.

Ukati wo'tala wIciipitu

13Khayaariwo iyolya ilapo yothene kontha itala yanatepa, ukhuma wIciipitu mpaka uKanaa wanaakhwiya nlattu wo'tala. 14Yusufu ahototokaniha ncurukhu wothene waari wIciipitu mpaka uKanaa wathumeliye itiriku ni ahorwana wa Farawoo. 15Waamanlyaya ncurukhu wothene wIciipitu mpaka uKanaa, annaciipitu yahorwaa unlepela Yusufu yiiraka: Univahe iyolya! Uhinihiye nikhwaka itala nlattu woomala ncurukhu ihu.

16Yusufu aheerela, paahi mmwiihe inama cinyu nnyo mwaakakhanihe ni itiriku, kamana ncurukhu inyu uyo uhomala. 17Yusufu ahowiiheriya inama nnyo ni ule ahaavaha itiriku aakakhanihaka ni ikhavalu, ikhontwaa, imope ni apuuru. Mwakha wothene ahaaliha annaciipitu yakakhanihaka iyolya ni inama.

18Mwakha oyo wahovira ni wawilyaya mwakha nkina, yahoturuwela tho wa Yusufu yiiraka: Khaninoona tho mananna oowiipitha we kontha ncurukhu ihu uyo uhomala ni inama cihu nnyo cihokhala cawaa, khiiwo tho inihalenle uvaha cihikhanle irutthu cihu ni imatta cihu. 19Uhinihiye nikhwaka ni ukhwelakhwela imatta cihu wa miithoni waa, unithume hi ni uthume imatta cihu nnyo wakakhanihaka ni itiriku, vano hi ni imatta cihu nnyo, ninaakhala ipottha ca Farawoo. Univahe iyolya wiira nikhale akumi, nihikhwe itala ni ciicammo imatta cihu cihihononnye.

20Commo Yusufu ahothuma imatta cothene co wIciipitu anthumelaka Farawoo. Annaciipitu yahotumiha imatta caya cothene kontha itala pheerihile commo. Phimaana ilapo yothene yahokhala ya Farawoo. 21Ukhuma wariyari mpaka mmaceresere mothene mo'lapo yo wIciipitu, Yusufu ahaapanka ipottha atthu othene.

22Caahanle coohithuminya caari paahi imatta co mayasataka, kontha Farawoo aholamula uvahiya coolya, cennyo phaapisiha nrima phimaana ahitumihaka imatta caya.

23Vano Yusufu aheerela atthu ale: Nviriyane. Ilelo kihoothumani nyu ni imatta cinyu nnyo, nna va nri a Farawoo, ipyo phi ila, nlimeke ni waala ittima nnyo. 24Nanso nhaana munvahaka Farawoo mphantte woneethanu wo coolya cinhalenyu wuurula. Mphantte woneecese uyo unhala ukhala wawinyu wiira mpanke ipyo ni iyolya yawinyu ni ya asaanenyu ni atthu othene ankhala uwannyu nwo. 25Ale yahomwiirelaca: Nkunya, we uhoopola ukumi ihu kamana uhonipanka nnema ninaakhala ipottha ca Farawoo.

26Toko coo, itthaya yothene yo wIciipitu, Yusufu ahokumiha nlamulo niriwo mpaka ilelo. Mphantte woneethanu wo coolya unkhala wa Farawoo, nanso imatta co mayasataka khacinkhala ca Farawoo.

Utteeliya wowiiherya wa Yakopi

27Annasirayeli yahokhala wIciipitu, ncoko wo'Koseni. Wonwo yahophwanya imatta cinci ni yahoyaranaca ni wuncererannyaa venci. 28Yakopi ahokhala myakha khumi na saapa wIciipitu ni myakha cookumi awe caari iminya wa arupayini na saapa (147). 29Woonnyawe wiira uhaattamerya ukati wookhwa, Sirayeli ahomwiihana mwamwanawe ni ahomwiirela: Wakhala wiira unaakifenta, ukivare mwetto ni ulupele wiira unaahala ukhala eekhweli ni mi. Vano kinwiirela uhikivithe mwIciipitu mu. 30Kakhwaka vale, uhikivithe mwIciipitu mu nanso ukirwaane mahiye avithiye mayapaapa uKanaa. Yusufu ahaakhula eeraka: Kinkopanka toko cinkilepelenyu. 31Vano Sirayeli ahonkhanyereriha eeraka: Ulupele. Yusufu aholupela ni Sirayeli ahooromela wiimuru nkori.

Currently Selected:

Mphattuwelo 47: NNI

Highlight

Copy