Mphattuwelo 46

Yakopi arwaaka wIciipitu

1Sirayeli ahokhuma ni citthu cothene caarinawe. Uphiya wawe uPeresepa, ahovaha citthu anlapelaka Nluku a Isaki, athumwane. 2Ni Nluku ahomuulumana Sirayeli uhiyu munttorani eeraka: Yakopi, Yakopi! Uyo ahaakhula eeraka: Kiri va. 3Nluku aheera: Mi ki Nluku, Nluku a athumwana. Uhoove urwaa wIciipitu, kontha wonwo kinkowupanka nloko nuulupale. 4Mi kinaahala urwaa wIciipitu wamoca ni we, ni khweli kinaahala wuhokolosa. Ni ntata na Yusufu ninaahala uputthaputtha miitho aa. 5Vaavale Yakopi ahokhuma uPeresepa. Asaana a Sirayeli yahaakusaca athumwanaya, asaanaya ni asaaraya mwa ampakhira yaakumihilyawe Farawoo. 6Ciicammo yahokusa inama caya ni mihakhu cothene caaphwanyilyaya uKanaa. Commo Yakopi ahorwaa wIciipitu ni ucuulu awe wothene. 7Ahaakusa wIciipitu asaanawe, ucuulu awe, asaanawe asithiyana na asiculawe asithiyana, maanaya wiira, nloko nawe nothene.

8Ala phi macina a atthu o nloko na Yakopi yaarwele wIciipitu: Rupeni, ntthaara na Yakopi. 9Ala phaari asaana a Rupeni: Enoki, Palu, Esiromi ni Karimu. 10Ala ph'asaana a Simeyoni: Yemuweli, Yamini, Owati, Yakimi, Sowari ni Saulu, mwana a nthiyana nkanani. 11Ala phaari asaana a Levi: Kerisoni, Kowate ni Merari. 12Ala phaari asaana a Yuta: Eeri, Onani, Seela, Peresi ni Seraa. Eri ni Onani yaakhwile ilapo yo'Kanaa. Ala phaari asaana a Peresi: Esiromi ni Hamuli. 13Ala phaari asaana a Isakari: Tolaa, Puwaa, Yaasupe ni Sinromi. 14Ala phaari asaana a Sepuloni: Serete, Eloni ni Yaleeli. 15Ala phaari asaana yayanryawe Leya ni Yakopi uPatan-Aramu, unhiya mwanawe Tina. Ucuulu awe wothene waari talathini na araru (33). 16Ala phaari asaana a Kaate: Sefomi, Haaci, Suuni, Esipomi, Eri, Aroti ni Areli. 17Ala phaari asaana a Aseri: Imina, Isivaa, Isivii ni Periya, ni mwanrokoraya Sera. Ala phaari asaana a Periya: Heperi ni Malekiyeli. 18Ala ph'asaana khumi na siita yayanryawe Yakopi ni Siilipa, ipottha ya Lapanu, anvahaka mwanawe Leya. 19Ala phaari asaana a Rakeli, amwaara a Yakopi: Yusufu ni Pencamii. 20Asenate, mwana a Potifera, mayasataka o Oni, ahonnyarana Yusufu asaana eeli wIciipitu: Manasesi ni Farayimi. 21Ala phaari asaana a Pencamii: Pelaa, Pekeri, Asipeli, Sera, Namani, Eyi, Rosi, Mupimi, Hupimi ni Aarite. 22Ala phaari asaana a Rakeli ayanryawe ni Yakopi othene yaari khumi na cese. 23Mwana a Tani aari Husimi. 24Ala phaari asaana a Nafitali: Yaseeli, Kuni, Yeseri ni Silemi. 25Ala phaari atthu saapa onrukulu na Piila, ipottha ya Lapanu aanvahilyawe mwanawe Rakeli, aayanryawe ni Yakopi. 26Othene yaarwele wIciipitu ni Yakopi, ucuulu awe wothene woohaalikelela asaara asaanawe, yaari atthu sitini na siita (66). 27Woncerera asaana eeli a Yusufu yayanryawe wIciipitu, nloko na Yakopi naarwele wIciipitu nahophiyera sapini (70).

28Vano, Yakopi ahonhooliha Yuta wa Yusufu, wiira acuwele maphiyero uKoseni. Uphiya waya nwo, 29Yusufu, na ampakhira awe oolikana, ahorwaa uKoseni wiira aakumanane athumwane. Vano woona wawe, aheekamela ni waakapatta, vano naakapattilene, ahoonla ukati mwinci.

30Sirayeli ahomwiirela Yusufu: Vano mi pooti ukhwa, kontha kihoona ikhove aa ni kihocuwela wiira ninlelo we unkumi. 31Vano Yusufu aheerela asunnawe na amuci aya othene athumwane: Kinarwa unhimerya Farawoo wiira asunnaka na amuci aya apaapa yaakhala uKanaa ahowa woono. 32Kinkowiira, alopwana ayo ahakheli, anhakhela inama ni ahowaana ikhontwaa caya, imope caya ni cothene ciri cawaya. 33Farawoo awiihanakani ookohakani wiira: Nnovarani? 34Mmwaakhuleke coo: Akarumeya aa anhuwa inama ikhumelo ni nari acikani, toko caapankaya mayapaapehu okhalayi. Commo phinhalenyu utthuniheriya ukhala nttetthe wo'Koseni, kontha ahakheli othene anathanyiya na annaciipitu.

Currently Selected:

Mphattuwelo 46: NNI

Highlight

Copy