Mphattuwelo 45

Yusufu nawiicuweliha na asunnawe

1Yooyo ukati uyo Yusufu anawoolwana wiivithavitha nwo wamiithoni wa atthu othene, phimaana ahokhuwa eeraka: Mwaakumihe akarumeya ayo othene. Commo, khaawo aahanle nenno nipuro nno, ukati weecuwanehilyawe Yusufu wa asunnawe.

2Vaavale ule ahanca wunla venci mpaka annaciipitu wiiwa ni ihapari iyo yahophiya wa Farawoo.

3Vano Yusufu aheerela asunnawe ale: Mi Yusufu. Apaapa nanlelo ahaawo akumi? Nanso asunnawe ale yahosankaca venci, mpaka woolwana umwaakhula. 4Ni Yusufu aheerelaca asunnawe ale: Nciserace woono. Umwattameryaca waya, aheerelaca: Mi nhimenyu Yusufu, yoole mwaantumihilenyu arwaaninyaka wIciipitu. 5Vano va nhicukulace ni nhiiriyelele mwa nlattu nyu wookitumiha kiwaaninyaka uno, kontha Nluku aacenre wiira woopwe ukumi wa atthu enci, phimaana akihoolihaka uno. 6Uhovira ukati wo myakha miili wo'tala ilapo yothene, ni cinaahala myakha mithanu khunhala waaliya ni hata wuruliya. 7Nanso Nluku hokihooliha uno wiira kikhale ipyo yo'muci mwiilaponi mu ni kiwoopoleni ni wuukhikicerani venci. 8Khanhimwe thi nyu nkiwanne uno, nanso Nluku, ni hokipanka ukhala namanantthu a Farawoo ni nlamuli oohano ni nlamuli o wIciipitu wothene.

9Nturuwele wowaakuvya wa apaapa ni mwaahimerye wiira: Mwaninyu Yusufu neera co: Nluku hokipanka mwanene ilapo yothene yo wIciipitu. Mmwe woono, woohipica. 10Nyu nnowokhala nttetthe wo'Koseni, wakhiviru ni mi. Ukhuma nyu, asaanenyu ayo, ucuulu inyu uyo, ikhontwaa cinyu nnyo, imope cinyu nnyo ni ikaruma cinyu nnyo cothene mmwaane. 11Mi kinnowulihani kontha cinaahala tho myakha mithanu co'tala. Mwaahitthuneke nyu na amuci inyu othene ni mihuwo cinyu cothene nnaahala uhuva. 12Cothene nnawoona ni miitho enyu, ni nhimaaka Pencamii phi saahiti. Nawoona wiira khweli thi mi kinoolumaca nnya citthu nnya. 13Mwaahimerye apaapa cineerihiyaka woolemelihiya mwIciipitu ni citthu cothene cinoonenyu. Ni mwaawiihe apaapa woono wowaakuvya. 14Vano ule ahonkapatta Pencamii nhimawe onlak'ono, ni Pencamii ciicammo ahonvara mmakhatani mmo ni uyo onlak'ono. 15Wahoolo ahaavaha alaahuma asunnawe ni othene yahoonlaca. Waculuru asunnawe ayo phoonryaya umuulumana.

16Vano weewiyaya uhano wiira asunnawe Yusufu ahowaaca, Farawoo ni mahumu awe othene yahotteeliya. 17Vano Farawoo ahomwiirela Yusufu: Waahimerye asunna ayo yapakhirihe mirintti nnyo asinama ayo, aturuwele ilapo yo'Kanaa. 18Ni yaturuwele woono, yaawihe athumwana na alokwaa othene. Mi kinnowavaha itthaya yomaana mwIciipitu mu ni nyu nnaahala ulawa nhakhu weelapo ila. 19Waarume yakuse ampakhira o wIciipitu wiira yaawiihe asaaraya, asaanaya na athumwaninyu. 20Cihukukureheni citthu cinyu, kontha mapuro oorera o wIciipitu anhala ukhala awinyu.

21Commo yahopanka asaana a Sirayeli. Yusufu ahaavaha asunnawe ampakhira ni iphika toko Farawoo caalamunlyawe. 22Wo khula ntthu ahonvaha nrintti wo'kuwo conaanano, nanso Pencamii ahonvaha micurukhu co'pheeta iminya ttharu ni mirintti mithanu co'kuwo conaanano. 23Athumwane ahaaveleelihera inama khumi coopakhira, cinapakhinre citthu cootepa urera co wIciipitu, ni inama khumi coopakhira cinakusile itiriku, mikatthe ni iphika cikina co munkwahani.

24Wahoolo aholeehana na asunnawe, ni waakhumaya aheerelaca: Nhinyakulihane ni iphiro! 25Yahohokolya wIciipitu aturuwelaka wathumwanaya aneehaninya Yakopi ilapo yo'Kanaa, 26ni yahottonkaca ihapari yiiraka: Yusufu ninlelo haawo nkumi! Khweli yooyo phi nlamuli olapo yothene yo wIciipitu. Vaavale nrima wa Yakopi wahomwattakyaa ni ahovittikhuwa. Ni khaalamuliya waakupali asaanawe ayo. 27Nanso waahimeriyawe cothene caalehenryawe Yusufu, ni Yakopi oonaka ampakhira yavelelihilyawe Yusufu wiira arweeliye, nnepa awe wahokhala mmapuroni. 28Sirayeli aheera: Paahi! Mwanaka Yusufu ninlelo haawo nkumi. Kinkomoona kihinakhwa.

Currently Selected:

Mphattuwelo 45: NNI

Highlight

Copy