Mphattuwelo 44

Yusufu nawaalawiha asunnawe

1Yusufu ahonvaha nhooleli owapuwani wawe, nna nlamulo nna: Ncarihe mmirinttini mwaya ala atthu ala iyolya yo khula nkwaratati mpaka cinhalaya woorya ukusa ni nhele ipheeta iwannyawe khula ntthu umalakuni wo mirintti cawe. 2Wahoolo nhele ikoopu aka yo'pheeta, munrinttini mwa mwana eetthyako uyo, ni wamoca ni ipheeta inthumenlyawe tiriku. Ni uyo ahopanka cothene toko caahimeriyawe ni Yusufu. 3Wasilyaya, yaholeehaca atthu ale ni inama caya. 4Ahinayaca upwaha isittatti iyo, Yusufu ahomwiirela nhooleli owapuwani wawe: Wunwe ni waatthimakele atthu ale ni waaphwanyaka weerele: Nnaakakhaniherani itthu yoorera ni yoonanara? 5Khinakhala ila ikoopu immureryawe nkunya aka ni immwaserera awe ihako? Nyu nhopanka yoonanara.

6Waaphwanyilyawe ahaakuleliha ala moolumo ala. 7Nanso ayo yahomwiirelaca: Nlattuni nkunya wuulumacaka commo? Uttayi ni yeeyo itthu iyo upankaca arumeyi aa. 8Wooneke ncurukhu ula, uphwanyilehu umalakuni wo mirupa cihu, nihooturuselani nikhumaka ilapo yo'Kanaa, naahala winnyacerani inupa ya nkunyaa ipheeta ni iwooru. 9Wakhalaka wiira mmoca wa karumeya aa naaphwanyaniya, eeviye, ni hi akina va ninaakhala ipottha ca nkunya ehu.

10Uyo aheera: Kihokupali. Yooyo nohala uphwanyaninya uyo, phinhala ukhala ipottha aka, akina ayo anawoopwaa. 11Khula ntthu ahokurusa mirintti cawe wowaakuvya ni wanca utaphula. 12Nhooleli uyo ahanca uphavelaca wo khula nrintti, apaceraka wa muulupale mpaka umalihera wa mwana eetthyako uyo. Ni ikoopu iyo yahophwanyinya munrinttini wa Pencamii. 13Wakhumelenlyaya commo, ayo yahaahulaca coowara caya. Wahoolo, othene yahopakhiraca mirintti caya n'uturuwela arwaaka usittatti.

14Yuta na asunnawe waphiyacilyaya inupa ya Yusufu, n'ule aari wonwo. Vano ale yahooromaca wamiithoni wawe ula, mpaka uphiya vathi. 15Yusufu ahaakohaca eeraka: Ikipankacilenyu iyo isiyani? Nyu khannocuwelaca wiira ntthu toko mi kinawoorya uwasera ihako?

16Vano Yuta aheera: Ninhala uwaakhulani nkunya? Ninhala uhimyani? Ninhala upanka cani mwaavi wiira niphwanye isariya? Nluku hokumihera woonene unyali ihu. Nkunya hi nna va ipottha caa. Wamoca ni uyo phwanyaninye ikoopu iyo.

17Vano aheera Yusufu: Akimpanka mi commo. Yooyo ntthu mphwanyaninye ikoopu iyo phinhala ukhala ipottha aka. Wiireke nyu akina va, nturuweleke ni nnema waathumwaninyu.

18Vano Yuta ahonciserera yoole, ni aheera: Contte nkunya ukihiye, kinawulepela, kihaana nuulumo noophela wuulumaca wamiithoni waa, nkunya aka, ni nhikiviruwele, kontha nyu nri toko Farawoo. 19Nkunya aka uhaakoha karumeya aa wiiraka: Nhaana athumwaninyu atthuna nhimenyu? 20Hi nihoohimyacera nkunya niiraka: Nihaana athumwanihu owuuluvala ni mmirawo mmoca nnyanryaya anooluvanle, nhimehu. Ahaawo munnawe yooyo ooyaraninya nrukulu nimoca hokhwa. Anumwane ayo anhalanne yooyo, ni athumwane anaanfenta venci. 21Vano we nkunya uhonireela: Nkiwiihere kaamoone mmiithoni mwaka. 22Ni hi nihowiirela: Nkunya, mmirawo uyo khanhala waahiya athumwane, kontha arimelaru uyo apaapehu anaakhwa. 23Vano nyu nheerela karumeya enyu: Mwahimwanaceke mwanhimenyu uyo, khannohala woonaca ikhove aka. 24Weeraka coo: Hi karumeya aa, nihorwaa wa athumwanihu nihaattonkela moolumo yoolumacilyaa nkunya.

25Athumwanihu waniirenlyaya tho wiira nturuwele mwathume iyolya, 26hi niheerela: Khanintthuna urwaa nwo veekhehu. Ninhala uturuwela tho nwo mwanhimehu eetthyako uyo nanrwanaka, kontha khaninkela namoonaka nkunya uyo ikhove awe mwanhimehu ahirweeke ni hi. 27Vano honiirela karumeya aa, athumwanihu, coo: Nyu nhocuwelaca wiira amwaaraka yayanre asaana eeli. 28Mmoca uyo horimya ni mi kiinre, khweli yooyo hokhuriya, ni akimmoona tho mpaka nna. 29Vano mwankusaka ula wamiithoni waka, ni imwiirannyaka itthu phi itthu iyo, nnaahala uvitha irutthu aka mmahiye ni icuku.

30Nna va mi karwaka wa athumwanihu, karumeya aa, woohinrwana mmirawo uyo, athumwanihu ciinryaya wonvarecesa, 31anaahala ukhwa ucukula yanoonaka uturuwa veekha woohi mmirawo ula. Ni hi ninaahala waavitha apaapehu ayo ni masukuli.

32Phimaana mi kiceemesaka wamiithoni waya unsunka mmirawo uyo ni kiheerela: Aahituruwele tho uno ikikhalele mi ikhirini iyo mahuku othene.

33Vano nna va mi kikhale ipottha ya nkunya aka nipuro naahalawe ukhala mmirawo uyo. Vano uyo arweeke uwani na asunnawe ayo. 34Kinkohimyani mi karwaka wa athumwane woohinkusa mmirawo uyo? Mi akintthuna woona yoonanara inhala waakhuma apaapa ayo.

Currently Selected:

Mphattuwelo 44: NNI

Highlight

Copy