Mphattuwelo 43

Asunnawe Yusufu anaaturuwela tho wIciipitu

1Itala yaanatepa mwiilaponi mmo. 2Vano wamanlyaya itiriku yothene yawiihilyaya asaana a Yakopi akhumanaka wIciipitu, athumwanaya yaheerelaca: Nhokoleelace ni mwathume tho iyolya. 3Nanso Yuta aheerela: Nlopwana uyo ahonileehera venci eeraka: Nhihokoleelace waryaka woohimmwiiha nhimenyu uyo. 4Mwanivahaka nhimehu uyo, ninaarwa wuthumelani iyolya. 5Nanso mwahinivaheke ninrwaanaka, khaninrwaa, kontha nlopwana uyo oolumacile coo: Nhihokoleelace waryaka kaahiki mwammwiihaka nhimenyu uyo.

6Sirayeli ahokoha: Nkipankenleni yoonanara toko ila, munhimeryaka nlopwana uyo wiira nhaanaca nhimenyu nkina? 7Ni ale yahomwaakhulaca yiiraka: Uyo honikohakoha hi na amuci ihu. Ni honikoha tho eeraka: Athumwaninyu nanlelo ahaawo akumi? Nyu nhaana nhimenyu nkina? Hi nimwaakhunle paahi itthu yaanikohawe. Naahala ucuwela cani wiira nohala uniirela mummwiihe nhimenyu.

8Vano Yuta ahomwiirela Sirayeli athumwane: Munhiye mmirawo uyo kinrwaane, ninarwaca, wiira nyu ni hi na asaanehu nikhale akumi ni nihikhwe. 9Ni kinawiilupelela veekhaka unvarelela uyo. Nkiheleke mi ukhala mayonvarelela mwan'oyo. Kahinturuwaneke mpaka wuthoonyerani wamiithoni winyu, phi mi cinhala ukikhalela ikhirini nnyo wamiithoni winyu ukati wothene. 10Toko cinoonenyu, yiiriyaka khanaapicile, cono ninarwele ni ninaturuwile imaara piili.

11Vano Sirayeli, athumwane Yuta, yahomwiirela: Wakhala wiira phinhalaya wiirannyaa, haya wakhale ciicammo. Nhele munrupani mwinyu mmo coolya comaana co mwiilaponi mwihu mu ni munkusere yooyo nlopwana uyo: makhura o nrette vakani, urawo vakani, citthu coonukhela cikina ni miira, cowiima ni amentowa. 12Nkuse ipheeta yoopitaanihinya, imaara piili piili ni nhokolose ipheeta yaaheliye munrupani mwinyu waturuwenyu wa malakuni wo nrupa enyu. Kaahiki itthu iyo ikhumelenle nlattu woovonyanihinya. 13Munkuseke nhimenyu uyo ni nhokoleele wa nlopwana uyo. 14Nluku Okuru Cothene awooneleni ikiriri iriyari ya nlopwana uyo wiira ootthunihereni onturuwana nhimenyu Pencamii ni nhimenyu nkina uyo. Mi, kakhalaka wooh'asaana, kinakhalaka.

15Vano asilopwana ale yahorwaa ni yahokhuruwela wIciipitu anaakusilene coovaha, ipheeta yoopitaanihinya piili piili ni Pencamii, ni yahorwaa wa Yusufu. 16Yusufu, wamoonnyawe Pencamii na asunnawe, ahomwiirela nhooleli owapuwani wawe: Waakuse alopwana ala uwanyaka, wamwiive mwannama ni unlokihace, kontha ayo iyolya yoothana anhala ulya ni mi. 17Ni ule ahopanka yahimeriyawe ni ahaakusaca mpaka inupa ya Yusufu. 18Ayo yahoovaca waakusiyaya arwaaniyaka uwannyawe Yusufu ni yahoopuwela yiiraka: Niwiiheriye va nlattu wo'pheeta ihokoloseriye mmirinttini cihu ikwaha yoopacera: Uyo nophavela unittarusa, unihuviha, unipanka ipottha n'ukusa inama cihu nnyo. 19Phimaana, yahorwaa wa nhooleli o'nupa ya Yusufu ni yahomwiirela waakelaya wankhora. 20Uviriyane, yoowe nkunya! Ikwaha yoopacera yawilehu va khweli naawile uthuma iyolya. 21Nanso nipuro neemenlehu wiira nimake, nahotthukula mirintti cihu ni utthukula woono khula ntthu wakhalacenrehu ahophwanya ipheeta yawiihilyawe uwani yoolikanene. Phimaana nihohokolosa, 22n'uwiiha ipheeta ikina wiira nithume iyolya. Khanincuwenle ntthu nihelenle ipheeta mmirinttini mwihu mmo. 23Vano nhooleli ule aheera: Nkhalane nnema, nhoove. Nluku inyu, phi Nluku a athumwaninyu, phuvahileni nhakhu munrinttini mwinyu mmo, kontha ipheeta enyu kahaakhela. Vano ahontthukula Simeyoni n'unrweha waryaya asunnawe. 24Wahoolo, ahaarwana inupa ya Yusufu, ni ahaavaha maasi, uwiwululacera inyaa ni inama caya nnyo ahovaha iyolya. 25Vano ayo yahototokaniha coovaha caya cahalaya unvaha Yusufu uthana, kontha yahocuwela wiira phahalaya unlyana.

26Waphilyawe Yusufu yahonvaha cammwiihenryaya ni yahonlapela yooromaka mpaka vathi. 27Vano uyo ahaakohaca isalama ni aheerela tho: Ari eehaalini athumwaninyu, nlopwana owuuluvala kihimenryenyu uyo? Nanlelo haawo nkumi? 28Ayo yahaakhulaca yiiraka: Nrumeyi aa, athumwanihu, nanlelo akumi, ahaawo salama, ni othene yahonlapela.

29Awehaka nceresere ni amoonaka nhimawe Pencamii, mwana a anumwane, Yusufu ahokoha eeraka: Ula phi yooyo nhimenyu eetthyako kihimenryenyu uyo? Ni ahopwaherera tho eeraka: Nluku oovahe nnema, mwanaka, 30nlattu wotteeliya woomoona nhimawe, Yusufu ahokhuma aakuvyacaka wiira aphavele nipuro nowunla, ni akelaka mpaani, ahoonla. 31Wakhucilyawe, ahokhuma ni eewehawehaka, aheera: Iliyeke iyolya eyo. 32Ahomeeliya iyolya veekhawe Yusufu, woohaatakaneelana asunnawe ale, ni annaciipitu yalyanawe na ayo yahomeeliya veekha, kontha annaciipitu khayaalamuliya walyana annaheperi. Uyo waari mwiikho aya. 33Asunnawe yaheesiya wameca, attharanihiyaka mookomelo ayo, maciso eeyarelo, ukhuma omuulupale mpaka omwankani ni yammwehanaca atikhinacaka. 34Vano yahomeeliya iyolya ya Yusufu wa meeca. Ni mencivelo o iyolya ya Pencamii yaari yoopwaha imaara thanu menciviheriyo o'yolya ya asunnawe, ni yaholyaca venci n'uwurya caatthunaya.

Currently Selected:

Mphattuwelo 43: NNI

Highlight

Copy