Mphattuwelo 40

Yusufu naataphulela ittora nkalaposo

1Unavinre ukati vakani, hutumu ni mayamikatthe o wamwene o wIciipitu, yahonkosera nkunya aya, mwene o wIciipitu. 2Farawoo ahorusiya na ahooleli awe ale, nhooleli o mahutumu ni nhooleli o mayamikatthe, 3ni aholamula utthukelaciya uwannyawe nhooleli o mayorontta, nkalaposo mwaaryawe Yusufu. 4Nhooleli o mayorontta aahiile anantthukiya mmatatani mwa Yusufu ni eera aawehawehaka, ni yahokhala ukati vakani nkalaposo. 5Vano yaholohaca hutumu ni mayamikatthe a mwene o wIciipitu, yatthukeliye nkalaposo. Khula ntthu aholoha nttora nawe, oyeeli uhiyu mmoca yooyo ni khula nttora wahaana mataphuleleliyo aya. 6Yusufu warwawe waaweha wicisu, ahoona wiira yanacukulaca. 7Phimaana ahaakoha akhulupale a Farawoo, ni ale yaatthukiye wawaanyawe nkunya aya, eeraka: Nlattuni nyu ilelo nkhalaka oohitta? 8Ale yahaakhulaca yiiraka: Nihaana nttora ehu ni khaawo oonitaphulela. Yusufu aheerelaca: Utaphulela nwo khunakhala wa Nluku? Nkihimerye mittora nnyo.

9Vano hutumu ahonttonkela Yusufu nttora awe uyo eeraka: Munttorani mwaka kihoona mwiri unari wakhiviru ni mi, 10ni mwiri uyo wahaana miritta miraru. Ni uyo wahophuwa, mpaka ukhalana ithutu ni wiima ni uttokottha mavarene. 11Ikoomisi ya Farawoo yaari mmatatani mwaka. Kahokusa cowiima nnye ni waamela nkoomisini mwa Farawoo n'unvaha mmatatani mwawe. 12Yusufu ahomwiirela: Mataphuleleliyo aya ph'ala: Miritta miraru nnyo phi mahuku mararu. 13Ukati wo mahuku mararu, Farawoo nowoowusa muru aa, ni nowowuutaphula ni wuhokolosera nteko aa ni we ummomvaha ikoomisi mmatatani mwawe toko caalemalenlyaa umpanka waarya hutumu awe. 14Ukiviriyane cothene caweettelaka ratta ukuupuweleleke mi, wakihimye woorera wa Farawoo nwo, wiira kikhume nkalaposo mu. 15Maana kiwiihiye utthuna n'uhitthuna, ukhuma ilapo yo annaheperi, ni ciicammo, uno khiiwo ipankilyaka yoorerela utthukeliya nkalaposo mu.

16Weewilyawe muulupale o mayamikatthe mataphuleleliyo omaana ale, ahomwiirela Yusufu: Ni mi ciicammo kihaana nttora aka: Wamuru waka cahaawo itthuttu ttharu co mikatthe cootteela. 17Itthuttu yooculu iyo cahaawo mikatthe co khula nnanna ni cooviyola cikina caancivela Farawoo, nanso asaanuni yaanaawa ulya ntthuttuni yaarinaka wamuru iyo. 18Ni Yusufu aheera: Ala phi mataphuleleliyo aya: Itthuttu ttharu nnyo, phi mahuku mararu. 19Ukati wo mahuku mararu, Farawoo nowowutthukacera ni wuuthomya mmwirini, ni asaanuni anaahala ukhura irutthu aa.

20Waphilyaya nihuku noneeraru, naari nihuku napiiherawe Farawoo myakha ceyarelo ni ahaalattula mayonlaka othene ni waavaha iyolya. Wamiithoni waya atthu ale ahaawusaca myuru nhooleli o mahutumu ni nhooleli o mayamikatthe. 21Ahonhokolosera nteko awe hutumu, mpaka wakhanlyawe tho yoole mayonvaha ikoomisi Farawoo. 22Nanso, ahoruma wiiviya wootthukaceriya nhooleli o mayamikatthe toko Yusufu caahimenryawe muutaphulelani nttora. 23Paahi, nhooleli o mahutumu ule khamuupuwenle tho Yusufu, mpaka ahonliyala.

Currently Selected:

Mphattuwelo 40: NNI

Highlight

Copy