Mphattuwelo 39

Yusufu uwannyawe Putifari

1Yusufu ahorwaninya wIciipitu. Wonwo Putifari wanthumilyawe Yusufu mmatatani mwa annasumayili. Putifari ari nhooleli a mayorontta inupa ya Farawoo, mwene o wIciipitu, ahonthuma mmatatani mwa annasumayili yammwiihile. 2Mwanene Nluku aari ni Yusufu, ni uyo aanareriya venci, n'upwaherera ni aakhala wapuwani wa nkunya awe munnaciipitu. 3Putifari ucuwela wawe wiira Mwanene Nluku aari ni Yusufu ni aammunnuwiha n'ureriha miteko cothene caavarawe, 4uyo ahoncivela Yusufu mpaka unvaha ukhala nlamuli o wapuwani wawe wothene. Putifari ahonhiyera Yusufu ulamula wapuwani wawe wothene ni citthu cothene caarinawe. 5Ukhuma ukati wanhiyenryawe ulamula wapuwani wothene ni citthu cothene, Mwanene Nluku ahovaha iparakha inupa ya munnaciipitu, mwa nlattu wa Yusufu. Iparakha ca Mwanene Nluku cahomwareela mwa citthu cothene carinawe Putifari, ukhuma wapuwani mpaka umattani. 6Vano, ahohiya citthu cothene caarinawe mmatatani mwa Yusufu, ni khaarina isukuli w'etthu phi itthu, aawehererya ulya paahi. Yusufu aari oorera ni aancivela na atthu.

7Waakhanlyawe ukati vakani, amwaara a nkunya awe yahanca unthokoca numwiihana yiiraka: Uwe wakirupane! 8Nanso ule ahokhotta ni aheera: Nkunya aka khanasukuli weetthu phi itthu ciri wapuwani ni cothene cirinawe hiile mmatatani mwaka. 9Khaawo wapuwani va ookipwaha mi, ni khiiwo ikaateelihilyawe, nanso nyu paahi, kontha amwaarawe. Kaahala upankelani itthu yoonanara toko ila, n'unkosera Nluku? 10Toko coo, ale yaanankhanyereriha Yusufu khula nihuku, nanso uyo anawakhotta ni khaatthuna waattamanana.

11Nihuku nimoca ahokela mpaani wiira avare miteko cawe ni yooyo ukati uyo, khaariwo ntthu hata mmoca. 12Vano ale yahovara ikuwo awe ni yahomwiirela tho: Nrwee, ukirupane! Nanso uyo ahokhuma mpaani mmo ni waahiyera ikuwo eyo mmatatani mwaya. 13Waatthawawe va, yahoona wiira hohiya ikuwo awe mmatatani mwaya, 14yaheehana akarumeya ni weerelaca: Nkoonani! Ula nheperi ula niwiiheriyehu ula uwa uniruwana! Ule hokela mu ni aaphavela ukirupana, nanso mi kihokhuwela. 15Wakiiwilyawe kikhuwaka, hokihiyera ikuwo awe n'utthawa mpaani mmo. 16Vano ale yahosunka ikuwo eyo mpaka waawilyawe nkunya uwani. 17Vano yahaakulela uttonka itthu yaakhumile yiiraka: Ile ipottha yo nheperi ile iniwiihenryaa iyo, yahowa ukiruwana. 18Nanso waakhuwenlyaka wiira kaakuveliye, uyo hokihiyera ikuwo eyo n'utthawa. 19Weewilyawe nkunya awe itthu yaattonkaya amwaarawe yiiraka: Co phikipankilyaya ipottha iyo, ahorusiya. 20Ahoruma wiira arweeliye Yusufu ni ahovonyeriya nkalaposo mwaatthukeliyaya anantthukiya a amwene. Yusufu ahokhala nkalaposo.

21Nanso Mwanene Nluku aari ni ule, ahomweettiha nnema, mpaka wiiwanana ni nhooleli o nkalaposo. 22Phimaana nhooleli o nkalaposo ahonvaha Yusufu iyuulupale ya anantthukiya, ni yooyo phaakhulela citthu cothene caakhumelela nkalaposo mmo. 23Nhooleli khaarina masukuli ni Yusufu, kontha Mwanene Nluku aari ni Yusufu ni ahonvaha iparakha wo miteko cothene caavarawe.

Currently Selected:

Mphattuwelo 39: NNI

Highlight

Copy