Mphattuwelo 38

Yuta ni Tamari

1Yooyo ukati uyo, Yuta ahaahiya asunnawe ni ahorwaa ukhala inupa ya nlopwana eehaninya Hiira, ilapo yo wAtulami. 2Vano Yuta ahomoona mwanthiyana mmoca nkanani eehaninya Suuwa. Ule ahonkusa n'unthela. 3Ni mwanthiyana ole ahorupala n'unnyara mwana n'ummaha ncina na Eeri. 4Ahorupala tho irukulu, ahonnyara mwana nlopwana n'unvaha ncina na Onani. 5Ahaakulela tho n'unnyara mwana ni ahonvaha ncina na Seela. Yooyo annyanre nari uKesipi.

6Vano Yuta ahomwaaverya Eeri, mwanawe ontthaara, nthiyana eehaninya Tamari wiira anthele. 7Nanso Eeri, mwana ontthaara a Yuta, aari oohiloka wamiithoni wa Mwanene Nluku, phimaana Mwanene Nluku ahomwiiva. 8Vano Yuta ahomwiirela Onani: Ukhale nkelanupa a munnaa, wiira munnaa akhalane ipyo. 9Nanso Onani waacuwenlyawe wiira asaana ayo khanhala ukhala awawe, ukati waathukumananawe amwaara a munnawe, aarihakacela vathi ipyo awe wiira hinyarele asaana munnawe. 10Ni yaapankawe ile yaari yoonanara wamiithoni wa Apwiya, phimaana ni uyo yahomwiiva. 11Vano Yuta ahomwiirela Tamari: Weenaneleke unankhwelyaa uyo wapuwani wa athumwana mpaka wanhalawe wunnuwa mwanaka Seela. Kinawuvaha wiira unthele, kontha Yuta oolumacenre commo aaceraka wiira Seela ni uyo hikhwe toko cikhwilyaya asunnawe. Phimaana Tamari ahorwaa waathumwane.

12Anavinrene mahuku menci, yahokhwa amwaara a Yuta, yaari mwana a Suuwa. Wahoolo Yuta aheepisiha nrima ni ahorwaa ni mpwanawe Hiira, nnatulami, waaweha ahakheli awe o'khontwaa uTimina. 13Vano ahohimeriya Tamari wiira atiithyaa anrwaa uTimina uthikila mapururu o'khontwaa. 14Tamari ahorula ikuwo co nankhwele ni aheettiyelela wiitho nwo ni nleeso wiira hicuweliye, ni ahonkoma wankhora wo'Nayimi, uri iphiro yo Timina, kontha ahoona wiira Seela honnuwa ni khanvahiya tho wiira akhale awannyawe. 15Vaavale Yuta umoona wawe Tamari amoonihile toko puuta, kontha anookhuneela ikhove awe iyo. 16Yuta ahorwaa waryawe Tamari n'umwiirela: Nkaawe, kinawuvekela kuuthukumanane. Kontha khaacuwela wiira amwaara-mwanaka. Ni ule ahonkoha eeraka: Unhala ukivahani wowiira ukithukumanane? 17Ule ahaakhula eeraka: Kinawuveleelihera ipuri yo muncicini mwaka. Ni Tamari aheera: Mwemesere itthu mpaka wanhalenyu uwiiha. 18Vano ule ahonkoha eeraka: Kemesereke isiyani? Ule ahomwaakhula eeraka: Ikanyero eyo, ni nleeso naa nno ni nttontto uri mmatatani mwa uyo. Yuta ahonvaha calepenlyawe, n'unrupana mpaka unrupaliha. 19Wahoolo Tamari ahonwa n'urula nleeso nawanryawe, ni ahowara ikuwo co nankhwele cawe.

20Yuta ahonvaherera mpwanawe nnatulami wiira oopole citthu ceemesenryawe mmatatani mwa nthiyan'ole, nanso khaamphwanyile. 21Hiira ahaakoha alopwana o yoole nttetthe ule eeraka: Ri vayi puuta nonkomesa wakhiviru waya iluusi piili ciri ni iphiro yo'Nayimi? Ayo yahomwaakhulaca yiiraka: Mu mmwani mu khanirina puuta. 22Vano uyo ahohokoleela wa Yuta ni ahomwiirela: Akimphwanyile. Uhiya commo, atthu o yoole nttetthe ule yiinre nwo khaawo nthiyana puuta. 23Yuta aheera: Mweeco, ahalaneke cennyo cinhiyenryaka nnyo. Akintthuna wiira nitarawyaace. Maana mi kahoovaherera ila ipuri ila wiira wanvahe, nanso we khumphwanyile.

24Cinavinre myeeri miraru, Yuta ahohimerya wiira: Tamari aheetta uluva ni horupala irukulu. Vano Yuta aheera: Akumiheriye vate ni apahiye. 25Ukati wakumiheriya awe vate wiira apahiye, Tamari aholeehera nhupi wa amaathi awe eeraka: Kirupalihile phi mwanene nnya citthu nnya. Ni ahopwaherera eeraka: Nkoonani nnya, ni mmwaavye mwanene ila ikanyero ila, nna nleeso nna ni ula nttontto ola. 26Vano Yuta ahocuwela citthu nnyo ni aheera: Amwaara-mwanaka ayo ahaana isariya yookivikana mi kontha kinoohavaha mwanaka Seela. Ni khaathukumananne tho.

27Vano waphilyaya ukati wooyara, wahoonnyaa wiira haana mavatta mmirimani mmo. 28Wayarawe va, mmoca uyo ahokumihera ntata nawe vate ni nthiyana mayoyariha ahonvara moono uyo n'untthuka nluuci nookhwiila, eeraka: Ula phi oopacera. 29Ukati waturusa awe mwana ule ntata nawe nno, nhimawe ule phaphovawe n'upacera uyaryaa, ni nthiyana mayoyariha aheera: Uphwanyile cani ikhato yoovira? Ni ahovahiya ncina na Peresi maanaya wiira ikhato. 30Wahoolo ahoyarya munnawe, natthukiye mmoononi nluuci nookhwiila, ni ahovahiya ncina na Seraa.

Currently Selected:

Mphattuwelo 38: NNI

Highlight

Copy