Mphattuwelo 37

Yusufu

1Yakopi ahokhala ilapo yo'Kanaa wonwo athumwane warwelyaya weettakaca. 2Ila phi yookhumelela ya nloko na Yakopi.

Yusufu waarinawe myakha khumi na saapa aahakhela inama na asunnawe. Aanawaakavihera asaana a Piila na asaana a Siilipa asaara athumwane ni aanawaahimerya athumwane coonanara caapankaya asunnawe.

3Vano, Sirayeli aananfenta venci Yusufu woopwaha asaana akina ayo kontha aayareele athumwane anooluvanle, phimaana yahonttotthihera ihancu yoorekama. 4Ni waacuwenlyaya asunnawe wiira phinfentiya venci na athumwane woopwaha mwana phi mwana, yaananramaca ni khayaamuulumana wo nnema.

5Vano Yusufu aholoha nttora ni waahimenryawe asunnawe ale, yahanca unrama wootepa. 6Ni aheerela: Nviriyane nttora ulohilyaka: 7Naatthukaca ihayi co tiriku umattani. Vano ihayi aka yahonwa ni weemela, ni ihayi cinyu nnyo cahorukurerya ni wooromela ihayi aka.

8Ni asunnawe yahomwiirelaca: Vano, weva unoona wiira unaahala unilamula? Ni yahonrama tho woopwaha nlattu wo nttora ni itthu yaahimilyawe.

9Wahoolo aholoha tho nttora ni waahimerya asunnawe eeraka: Kiholoha tho nttora nkina. Ila ikwaha ila ncuwa, mweeri ni itthoottwa khumi ni imoca cahokikhoromela. 10Waahimenryawe athumwane na asunnawe, athumwane ayo yahoncaceraca yiiraka: Nttorani yooyo ulohilyaa uyo? Maanaya wiira mi, anumwana na asunnaa ninwowooromela weva mpaka vathi? 11Phimaana asunnawe othene yaananramaca. Nanso athumwane yeera yuupuwelaka itthu iyo.

Yusufu natumihiya na asunnawe

12Asunnawe Yusufu yahorwaa uhakhela inama ca athumwanaya wakhiviru n'uSikeni, 13ni Sirayeli ahomwiirela Yusufu: Toko cincuwelaa asunnaa anhakela inama wakhiviru n'uSikeni. Kimpheela wuruma urwee wonwo. Yusufu ahaakhula eeraka: Aye. Kiheewa. 14Athumwane yahomwiirela: Urwee wonwo woone unari ukhaliyaka ratta, ukhuma asunnaa ni inama ciyo ni ukiwiihere ihapari. Yakopi aanrumile nari nikuwa no Heporoni, ni Yusufu ahophiya uSikeni. 15Vano nlopwana mmoca ahomphwanya akomankomacaka muthakoni ni ahonkoha eeraka: We, unaavyani? 16Yusufu ahaakhula eeraka: Kinaavya asunnaka. Nkihimerye nipuro ninhakhelaya inama nnyo. 17Nlopwan'ole ahaakhula eeraka: Ayo ahokhumaca va. Mi kiheewa yiiracaka: Nrwee uTotani.

Vano Yusufu ahaatthara asunnawe. Ni ahaaphwanya anari wakhiviru n'uTotani. 18Nanso ale yahomoonaca nttayi nttayi, ni hinaphiya Yusufu, yahovaanela umwiiva. 19Yahohimeryana yiiraka: Hophiya nanttora uyo. 20Nrwee nimwiive n'unrihela nluusi, ni neereke hokhuriya ni nsene, noone vano cinhalaya wiira ittora cawe nnyo.

21Vano, wiiwa wawe Rupeni ahomananiha umwaakiha eeraka: Nihimwiive! 22Ni aheera tho: Nhivuvihe iphome. Munrihele nluusi iri muthakoni mu, uyo nhinvaravare. Rupeni oolumacenre commo aavyaka mananna omwaakiha ni wiira anturusele wathumwane.

23Uphiya wawe Yusufu, asunnawe yahonrulaca ihancu awe, yoorekama eyo, 24n'unvaraca n'unrihela nluusi moohi maasi.

25Wookomacilyaya wiira alye yahoona nttayi nttayi mphwinko wa annasumayili waakhuma uKiliyati. Inkamira caya caapakhinre ikaruma coonukhela, makhura o nrette ni makhura oonukhela caarwanaya wIciipitu. 26Yuta aheerela asunnawe: Ninhala uphwanyani namwiivaka nhimehu uyo, nimaalanaka ukhwa wawe nwo. 27Nrwee naathumihere annasumayili. Nihinhasare ula nhimehu iphula ni niitho. Ni asunnawe Yuta yahokupali.

28Wattamenryaya anamarontta annasumayili o'Mitiyani, asunnawe Yusufu yahonkumiha Yusufu nluusi ni yahaathumihera annasumayili ni ncurukhu sirini (20) ni yahonkusa wIciipitu.

29Rupeni warwelyawe unweha nluusi mmo, khaamphwanyile. Woona wawe wiira Yusufu khaawo, ahaahula coowara cawe, 30aturuwelaka wa asunnawe ni aheera: Mmirawo uyo mmwe khaawo! Kinhala wiira cani?

31Vano yahomwiivaca napinkula n'uruwyaa mphomeni ihancu ya Yusufu. 32Ni yahorwaaca waathoonyera athumwanaya yiiracaka: Nihottotta ihancu ila kaahiki khinakhala ihancu ya mwaninyu Yusufu? 33Yakopi ahoona wiira phi yeeyo ni aheera: Ila ihancu ila ya mwanaka! Nsene nihonhasara. Yusufu hokhuriya!

34Vano Yakopi ahaahula coowara cawe n'uwara icakho ni ahomunlela mwanawe mahuku menci. 35Asaanawe othene, asilopwana na asithiyana yaanaawa ummaaliha, nanso aanakhotta umaalihiya nwo eeraka: Mena! Kinaahala wunla mpaka mmahiye nryawe mwanaka. Ni ahopwaherera umunlela. 36Yooyo ukati uyo wIciipitu, annamitiyani yahontumiha Yusufu waPutifari, nhooleli a mayorontta inupa ya Farawoo, mwene o wIciipitu.

Currently Selected:

Mphattuwelo 37: NNI

Highlight

Copy