Mphattuwelo 32

Yakopi natthonkomaniha ikwaha yonkumanana Isawu

1Wahoolo Yakopi ahokhuma ni ahaakumanana ancelo a Nluku. 2Vano woona wawe, Yakopi aheera: Ala anakhotto a Nluku! Ni ahovaha nipuro nno ncina na Manayimu.

3Vaavale, Yakopi ahaaveleeliha mayanhupi awe wa Isawu munnawe, akhala uSeyiri ilapo yo wEtomi. 4Ni aheerela: Mwanhimerye muulupale aka Isawu wiira: Mi karumeya enyu Yakopi kaari wamoca ni Lapanu, kihaawo mpaka ilelo. 5Kihaana imope na apuuru, ikhontwaa, ipuri, ipottha cithiyana ni cilopwana. Muulupale aka, kinoveleelihera ula nhupi ula, wiira ukaakhelele wo'salama.

6Vano mayanhupi yahoturuwela wa Yakopi phimwiirelaka: Nihomphwanya munnaa Isawu ni uyo nowa wonwo, nawuphavela, ni haana alopwana iminya cese.

7Vano Yakopi ahoova venci ni ahocukula. Phimaana ahaakawaniha atthu ayo miphwinko miili, ciicammo ahokawaniha ikhontwaa, ipuri, imope ni inkamira miphwinko miili, 8kontha oopuwela coo: Isawu awaaka na anakhotto awe atuphelaka mphwinko mmoca, nkina uyo unkohala. 9Vano Yakopi ahoswali eeraka: Nluku a apaapa Aparahamu, Nluku a apaapa Isaki, we Mwanene Nluku ukiirenle: Uturuwele uwanyaa waalokwaa kinawupanka yoorera. 10Mi kinaacuwela wiira khaninkiphwanela nifento neekhweli ninkipankaa mi karumeya aa. Kilapuwile mooloko Yortani ni nttontto aka paahi, nanso nna va kihaana miphwinko miili. 11Contte ukoopole mmatatani mwa munnaka Isawu, kontha mi kinamoova, wiira hiiwe ukiiva mi wamoca na asaaraka na asaanaya. 12Kontha we uheera: Kinaweettiha ratta. Kinawuvaha ucuulu mwinci toko nhaava wo mpharyaa ni mphwinko wa atthu wohaalikelyaa.#32.12 Mphattuwelo 22.17

13Yoole uhiyu ule Yakopi ahorupa nenne nipuro nne ni ahothanla mihuwo coonvaha munnawe Isawu: 14ipuri cithiyana iminya piili (200) ni anapinkula sirini (20), ikhontwaa cithiyana iminya piili (200) ni anapinkula sirini (20) o'khontwaa, 15inkamira talathini (30) cithiyana co waamwinya na asaanaya, imope cithiyana arupayini (40) ni imope khumi cilopwana, apuuru onthiyana sirini (20) ni apuuru onlopwana khumi. 16Ahaakawela mihuwo nnye ipottha cawe wiira awacawace, ni wo khula nhuwo waari mphantte aya, ni aheerela: Nhoolelaceke ni nhiye ikhato nhuwo ni nhuwo nkhwaya. 17Ahonlamulela oopacer'ole: Munnaka Isawu oophwanyaka, ni ookohaka wiira: We uri naani, unrwaa vayi ni nhuwo urinaa ula wawani? 18Vano umwakhuleke wiira ca karumeya enyu Yakopi. Ciri itthuvo cinonveleeliherawe muulupale awe Isawu ni uyo neera awaka uttuli wihu. 19Ciicammo ahonlamulela onayeeli, oneeraru nale othene yaawa uttuli mihuwo eeraka: Oophwanyakani Isawu othene munhimyacere nuulumo nimoca nenna. 20Munhimerye tho wiira: Karumeya aa Yakopi naawa uttuli uno. Kontha Yakopi hoopuwela coo: Kahoolihaka itthuvo caka nnyo, kinattipiha urusiya wawe nwo, vano nakumanacaka mi n'uyo, atthunaka nakaakhelela woorera. 21Phimaana inama co'tthuvo nnye cahohoolihiya, nanso ule ahohala veekhawe nipuro nomakiya nne ni ahorupa uhiyu wothene.

Nkhitto wa Yakopi uPeniyeli

22Yoole uhiyu ule ahonwa ni ahaakusa asaarawe eeli, ipottha cawe piili cithiyana, wamoca na asaanawe khumi na mmoca, ni yaholapuwaca nsepa no Yapoko. 23Ahaalapusaca nsepa nno asaarawe ayo ni citthu cothene caarinawe. 24Vano Yakopi ahohala veekhawe ni ahomwaanana nlopwana uhiyu wothene mpaka usa. 25Nlopwan'ole, woona wawe wiira khaamoorya untthema, ahomwaatta Yakopi wanatarani, ni ule ahorepenyuwa ukati waanaaya.

26Nlopwan'ole aheera: Ukihiye, kirwee kontha uhosa. Nanso Yakopi ahomwaakhula eeraka: Akinoohiya urwaaka wahikireriheke. 27Ni ahonkoha: Ncina naa tipani? Ule ahomwaakhula: Mi kineehaninya Yakopi. 28Vano nlopwan'ole aheera: Ncina naa khaninhala wiihaninya tho Yakopi, nanso Sirayeli, kontha we uhomwaanana Nluku na atthu ni uhotthema.

29Yakopi ahonkoha eeraka: Kinapheela ucuwela ncina naa. Ule aheera: Unkikoherani ncina? Vaavale ahonreriha.

30Vano Yakopi ahovaha ncina na Peniyeli nenno nipuro nno, eeraka: Kontha kihomoona Nluku ni miitho aka ala ni mi kinkumi.

31Aakhumile uPeniyeli, ukati wakhumaya ncuwa ni Yakopi anattumpela. 32Phimaana mpaka nihuku no'lelo annasirayeli khankhuraca ntinka unluttaniha natara ni iyuunu, kontha Yakopi ahaattiya wantinkani ukumanihile natara ni iyuunu.

Currently Selected:

Mphattuwelo 32: NNI

Highlight

Copy