Mphattuwelo 31

Yakopi naathama wa Lapanu

1Yakopi aheewa wiira, asaana a Lapanu yaanawuulumaca yiiraka: Yakopi howyaa citthu ni mihakhu cothene caarinaya apaapehu, phimaana athaciriki. 2Yakopi ahoona wiira makhalelo a Lapanu ni uyo khayaari toko khalayi.

3Vano Mwanene Nluku ahomwiirela Yakopi: Uturuwele ilapo yo mayathumwanaa ni wamucyaa. Mi kinkokhala ni we. 4Vaavale Yakopi ahoruma wiihaninya Rakeli ni Leya wiira arwaace utakhwani yoone mihuwo cawe. 5Uwaca waya aheerelaca co: Kinawoona makhalelo athumwaninyu ayo ni miyano khaanakhala toko khalayi. Nanso Nluku a Apaapa ri ni mi. 6Nyu nnaacuwela wiira kihaavarela ratta nteko athumwaninyu, 7nanso ayo ankipanka mi ntirikhi, avirikanihacaka mpokerero aka imaara khumi. Nanso Nluku khaatthunihenre wiira akipanke yoonanara. 8Yakiirela wiira inama co manepa nnyo cikhaleke cawaa, phuupokera waa, vano mihuwo cothene caakhala co manepa. Ni yakiirela coorephuwaca nnyo cothene cikhaleke cawaa, wonwo phuupokera waa, vano mihuwo cothene caatothola asaana oorephuwaca. 9Nluku ala mananna ala phipankilyawe wowaakha mihuwo athumwaninyu akivahaka mi.

10Weeraceele coo: Ukati warupalaya mihuwo nnyo, mi kahoweha ni kahoona munttorani mmo anapinkula athukumananaka ikhontwaa cithiyana nnyo caari co manepa, co marephurephu ni co mitthottwe. 11Vano ncelo a Nluku ahokiirela munttorani: Yakopi! Mi kahomwaakhula kiiraka: Kiri va! 12Ni ule ahokiirela tho: Uwuse miitho aa ayo, ni unawoona anapinkula othene anthukumanana ikhontwaa cithiyana nnyo, ari o manepa, o marephurephu ni o mitthottwe, kontha kihoona cothene cupankilyawe Lapanu. 13Mi phi mi Nluku o'Peteli wenwe wemeesilyaa nluku uttikitthelaka makhura ni ukoopelaka natiri. Wunwe nna va, ukhume ila ilapo ela ni uturuwele ilapo ya alokwaa.

14Vano Rakeli ni Leya yahonkoha Yakopi yiiraka: Wapaapa nwo uhaawo mphantte wo nhakhu unnaaca? 15Khannalikelela ukhala amalaponi? Maana ahonitumiha ni aholya ncurukhu uyo. 16Kontha nhakhu wothene Nluku ukumihilyawe wathumwanihu uri wawihu ni wa asaanehu. Nna va upanke cothene cinoohimenryawe Nluku.

17Vano Yakopi ahaaweliha asaarawe na asaanawe ayo mmankamirani. 18Ahokusa mihuwo cawe cothene ni mihakhu caphwanyilyawe uPatan-Aramu, wiira arwee ilapo yo'Kanaa, uri Isaki athumwane. 19Ukati Lapanu warwelyawe uthikila mapururu okhontwaa, Rakeli aheennya ananttuntta a athumwane. 20Ni Yakopi ahomwiita Lapanu nramu woohinhimerya itthu kontha anatthawa.

Nluku naamwaakiha Yakopi

21Yakopi ahonwa n'utthawana cothene caarinawe ni aholapuwa mooloko awehaka mphantte wo myaako co'Kiliyati. 22Nihuku noneeraru Lapanu ahohimeriya wiira Yakopi hotthawa. 23Vano ahaakusa asunnawe ni ahontthimakela mahuku saapa eettaka ni ahomphwanya nari mwaako wo'Kiliyati. 24Vano Lapanu nramu ahophwanyinya ni Nluku, uhiyu munttorani phimwiirelaka: Wiisunke, uhuulume itthu ni Yakopi, hata ikhale itthu yoorera atthuna yoonanara. 25Lapanu ahomphwanya Yakopi naakhurutunle aheema awe umyaakoni co'Kiliyati. Ciicammo Lapanu na asunnawe ahaakhurutula aheema awe umwaakoni.

26Vano Lapanu ahonkoha Yakopi eeraka: Ukipankile cani? Yokiita iyo wakusaka asaana ayo toko ipottha coovariya ukhottoni? 27Nlattuni ukitthawaka womwiitiho ni ukisempaka, woohikihimyacera itthu? Hapo mi kaanawuveleelihera wotteeliya ni icipo, ikoma ni aceece. 28Ciicammo khukihile kavahaka alaahuma asaanaka ni ucuulu aka wiira kaaleehe. Uheetta wootirikhi. 29Kahaana ikuru coorera wuuttarusa, nanso Nluku athumwaninyu, hokuulumana ncana uhiyu eeraka: Wiisunke uhimuulumele itthu hata ikhale yoorera atthuna yoonanara. 30Vano we wapheela urwaa, kontha wahoonukhela uturuwela wa athumwanaa, kaahiki wennyerani anluku aka ayo?

31Yakopi ahomwaakhula Lapanu eeraka: Kanawoova. Kontha kooniha wiira unakaakha asaanaa ayo. 32Ule nohalaa umphwanyana anluku aa ayo umwiive. Unikukhuryace mi na asunnaka ayo waphwanya itthu yawaa ukuse. Kontha Yakopi khaacuwela wiira Rakeli pheennyile anluku ayo.

33Vano ahokela Lapanu nheemani mwa Yakopi, nheemani mwa Leya, nheemani mwa ipottha cithiyana piili nanso wohaphwanya anluku ayo. Ni ukhuma wawe nheemani mwa Leya, ahokela nheemani mwa Rakeli. 34Nanso Rakeli ahaakusa ananttuntta ayo ni wattukhunyera munhukhoni yo nkamira ni ahonkomela. Vano Lapanu ahaakukhurya nheemani mothene, ni khaaphwanyile. 35Rakeli aheerela athumwane: Paapa, nhikiviruwele, akinlamuliya wunwa kontha kiri ni nteko wa athiyana. Lapanu ahaawehaweha ananttuntta ayo, nanso khaaphwanyile.

36Vaavale Yakopi ahorusiya n'unviruwela Lapanu amwiirelaka: Kitthekileni? Kukosenre isiyani yoorera we uviruwa ni ukoomolanihaca? 37We uhokukhuryaca mirintti caka cothene wakhala wiira uhophwanya itthu yawaa, uwiihe va yoonaka alokwaa ayo ni alokwaka wiira anihukhumu. 38Myakha sirini kihoovarela nteko. Ikhontwaa ni ipuri cinyu akinarihakaciha ni akinakhura inama yo nhuwo enyu. 39Kakinowiiherani inama yoorakalaca ni masene. Nkilivihaka inama cothene cennyinya uhiyu atthuna uthana. 40Uthana kaakhwa nttukuttha ni uhiyu kaakhwa uririya ni nkaarupa. 41Kihokhala myakha sirini, kuuvarelakani nteko. Myakha khumi na micese kihoovarelani nteko wiira kaathele asaanaa eeli, ni myakha siita kihoovarelani nteko nkipokerihaka inama, nanso nyu nhorukunusaca mapokerero aka imaara khumi. 42Ahaari Nluku a apaapa, Nluku a Aparahamu, Nluku ri ihisima ya Isaki, khweli nyu mwankoomola woohi itthu. Nluku heewa icuku caka ni hoona nteko uvanryaka, phimaana hookuphulani uhiyu wo ncana.

43Vaavale Lapanu ahomwaakhula Yakopi eeraka: Ala asithiyana ala asaanaka ni asilopwana ayo ucuulu aka, nnya mihuwo caka ni cothene cinoonaa nnyo ciri cawaka. Ilelo kinhala weeriha cani asaanaka ala ni asaana yayanryaya ayo? 44Nna va nileehane wiira ukhale usaahiti we ni mi.

45Vano Yakopi ahokusa nluku ni aheemesa upanka nivatta. 46Ni Yakopi aheerela asunnawe: Mpanke nikutta no maluku.

Ni ale yahopankaca nikutta no maluku ni othene yaholelyaca wanikuttani vale. 47Lapanu aheehana nipuro nno Yekar-Saatuta, nanso Yakopi eehanne Kaleeti. 48Vano Lapanu aheera: Nna nikutta nna nikhale saahiti ehu we ni mi. Phimaana wiihaninyaka uKaleeti 49ni Misipa, kontha heera: Mwanene Nluku nniwehawehe we ni mi ni anihukhumu hata nimwalane ntthu ni nkhwawe. 50Waahuvihaka asaanaka ala, waathelaka athiyana akina mi hata kihikhale, ucuwele wiira Nluku nawoona.

51Lapanu ahomwiirela tho Yakopi: Nikutta phi nna, ni nivatta neemesilyaka iriyari yo we ni mi phi nna. 52Nikutta nna nikhale saahiti. Ciicammo nivatta nna nikhale saahiti wiira yakhala yoonanara kihitupihe nikutta nna kiwaanaka nwo, ni we yakhala yoonanara uhituphane nikutta nna ni nivatta nna uwaka uno. 53Nluku a Aparahamu, Nluku a Nahori, Nluku o mayathumwanaya anihukhumu.

Ni Yakopi, mwa nlattu wo ihisima ya Isaki athumwane, aholupela. 54Yakopi ahopanka isataka umwaakoni, ni aheehana asilokwawe yaari wonwo wiira alye. Yaholyaca ni yarupacile umwaakoni wonwo. 55Lapanu ahonwa wicisuru ahaavaha alaahuma asaanawe asilopwana na asithiyana, ahaareriha ni ahoturuwela uwani.

Currently Selected:

Mphattuwelo 31: NNI

Highlight

Copy