Mphattuwelo 24

Uthela wa Isaki

1Yooyo ukati uyo Aparahamu ahooluvala ni Mwanene Nluku ahonvaha iparakha wo citthu cothene. 2Vano Aparahamu amwiihanaka karumeya awe omuulupale owapuwani aarina nlamulo no citthu cothene caariwo, ahomwiirela: Weese ntata naa nno wanatarani waka, 3ni ulupele wa Mwanene Nluku, mwanene irimu ni itthaya wiira wamphavele nthiyana oonthela mwamwanaka uhinthanle iriyari ya asithiyana annakanani anakhalanehu ala mu. 4Nanso urwee uwani, ilapo iyarelyaka ni wamucyaka ni wanthanle nthiyana nohala unthela mwanaka Isaki.

5Vano karumeya uyo ahokoha: Kaahiki nthiyana uyo aahitthuneke uwa ni miyano uno, kaankuseke mwamwaninyu uyo n'unrwana ilapo ikhumilenyu?

6Aparahamu ahomwiirela: Kaasope. Akimpheela wiira mwamwanaka uyo unturusele uwani. 7Mwanene Nluku, Nluku o wirimu kikumihile ilapo yo mayapaapa ni iyarelyaka aholupela ni ahokikhuluveliha ukivaha mi ni ucuulu aka ila ilapo ela. Ayo anaahala wuveleelihera ncelo uhoolo waa, wiira we waanthanle wonwo nthiyana omaana oohala unthela mwanaka. 8Nanso nthiyan'oyo aahitthuneke uwa ni we uno, unaahala wothopwa ulupela waa nwo. Itthu ihimphavelaka iri unturusela mwan'oyo uwani. 9Vano karumeya ule aheesa ntata nawe wanatarani wa Aparahamu nkunya awe ni aholupela upanka.

10Vaavale karumeya ule ahokusa inkamira khumi ca nkunya awe, ni ahokhuma ni mihakhu ca nkunya awe ule mmatatani mwawe, ni ahorwaa uMesopotamiya, iparasa yo'Nahori. 11Ni ahokhoromihaca inkamira cawe uta wo'parasa, wakhiviru ni iluusi, yocoocilo ukati asithiyana unrwaaya urika maasi. 12Vano aheera: Mwanene Nluku, Nluku a nkunya aka Aparahamu, ukivahe ilelo ukumana woorera, ni umpanke nnema nkunya aka Aparahamu. 13Kinawoona va kemeenle waluusi, ni asaana asithiyana a atthu o'parasa ela ammweesa urika maasi va. 14Nna va kinoolepelani wiira, mwali nohalaka umwiirela uyo: Wiinamihe mwaapu uyo kiwurye, ni uyo akiirelaka mmuryeke ni kinaavaha maasi inkamira cinyu nnyo; yooyo phimwaacilenyu wiira anthele karumeya enyu Isaki, ni mi kinaahala ucuwela wiira nhompanka nnema nkunya aka.

15Vaavale, hinamaliha uswali, ahowa Repeka, mwana a Petuweli, mwana a Milka, amwaara a Nahori, munnawe Aparahamu, nakusile mwaapu wanikhatani. 16Mwanthiyana ole aari oorera venci, mwali oohipaca urupa ni nlopwana. Ahophiya waluusi ni ucariha mwaapu awe n'uturuwa. 17Karumeya awe Aparahamu ahontthimakela ni umwiirela ukivahe maasi aari mmwaapuni ayo kiwurye. 18Ule ahaakhula: Uwuryeke nkunya. Wowaakuvyaca ahorula mwaapu ule n'unvaha mmatatani mwawe wiira awurye. 19Vano namanlene unvaha maasi owurya aheera: Kinaarika tho maasi kivahe inkamira caa nnyo wiira ciwurye maasi ootosa. 20Wowakuvyacawene aheetthela maasi ale nwuryeryoni monkamira, ni ahorwaa tho uluusi urika maasi mpaka uvaha inkamira cothene. 21Nlopwana ole anomaala awehaka ni awehereryaka wakhala wiira Mwanene Nluku khaamweettihacile mahala ikwaha awe eyo.

22Wahoolo inkamira nnyo umala waya uwurya, karumeya a Aparahamu ahokumiha ipaara imoca yo'pirinku co'wooru cookhala imaara siita ceelemelelo aya ni ikhankani piili co'wooru cookhala imaara iminya wo sirini (120) ceelemelelo aya n'unvaha mmatatani mwawe. 23Vano ahonkoha eeraka: We mwana awani? Kinawulepela ukihimyacere. Ni kaahiki nihaawo nipuro waathumwana nwo wiira namake? 24Mwanthiyana ole ahaakhula eeraka: Mi ki mwana a Petuweli, mwana a Milka, annyarannyawe Nahori. 25Ahomwiirela tho: Nihaana malasi, coolya cinci ni nipuro noorupa. 26Vano nlopwan'ole ahooroma phinlepelaka Nluku 27eeraka: Arerihiye Mwanene Nluku a nkunya aka Aparahamu, hitamihile nifento neekhweli wa nkunya aka. Ni Nluku uhokihola mi ikwaha yothene mpaka ukipiiha walokwawe nkunya aka.

28Vaavale mwanthiyana ole ahokhuma atthawaka mpaka waanumwane ni ahottonka yaakhumelenle. 29Repeka ahaana nrokorawe eehaninya Lapanu. Ni Lapanu wiiwa wawe mwaha oyo, wowaakuvyaca ahokhuma atthawaka mpaka umphwanya nlopwan'ole uluusi. 30Kontha weenre coo: Lapanu wamoonyawe mwanrokorawe nawanre ipirinku ni ikhankani nnye, ni wamwiiwilyawe mwanrokorawe uyo ni weewilyawe moolumo amwanrokorawe ayo eeraka: Coo phikuulumacenryawe nlopwana uyo. Vano Lapanu ahonrwela ni ahomphwanya neemenle waluusi ni inkamira cawe nnyo. 31Ni ahomwiirela: Nrwee uwani we oorerihiya ni Nluku unhala urupelani vate? Kontha mi uwani nwo kihotthenkemaniha mapuro oorupa we mpaka inkamira caa nnyo. 32Vaavale nlopwan'ole uphiya wawe uwannyawe Lapanu, ahovahiya nipuro noorupa, maasi oorapiha inyaa cawe, wamoca na atthu yaarinawe, ni inkamira nnye cahoheleliya malasi ni makukhu. 33Vano nawiiheriyene iyolya, ule aheera: Akinlya mpaka kipacereke uhimyaca itthu yawenlyaka eyo. Lapanu ahomwaakhula eeraka: Wuulumaceke. 34Ule pheenryawe: Mi ki karumeya a Aparahamu. 35Mwanene Nluku honvaha iparakha cinci nkunya aka, hokhala thaciri, honvaha ikhontwaa ni imope cinci, ipheeta ni iwooru, haana ipottha cilopwana ni cithiyana, inkamira ni apuuru. 36Mpaka Sara mwaara a nkunya aka, honnyarana mwana nooluvanlene ni citthu cothene honvaha mwan'oyo. 37Vano nkunya aka hokilupeliha mi eeraka: Uhinkuse nthiyana annakanani ri yeela ilapo inkhalaka ila unvahaka mwanaka wiira anthele, 38nanso urwee uwani, ilapo yo mayapaapa ni wamucyaka wonwo wanthanle nthiyana nohala unthela mwanaka. 39Phimaana mi kahonkoha nkunya aka, wiira kaahiki nthiyana uyo aahitthuneke ukitthara uno? 40Ule ahokaakhula eeraka: Mwanene Nluku ri ni mi. Uyo naahala wuuveleelihera ncelo owuuhola iphiro wiira wankuse nthiyana o wanrukuluni waka, o wapuwani wa apaapa wiira anthele mwanaka. 41Nna unhala wootopwaa itthu yurumilyaka weeraka uphiya wamucyaka nwo ukhottiheriyaka uvahiya nthiyana oyo. Paahi uhootopwaa itthu yurumilyaka eyo.

42Phimaana ilelo uphiya waka uluusi kiholepela kiiraka: Contte Mwanene Nluku, Nluku a akunya aka Aparahamu, wakhalaka wiira ikwaha impankaka ila iri yootthuna winyu nkeettihe ratta. 43Nna va kiri waluusi yo maasi, nkiiwe, mwali nohala uwa urika maasi uyo, ni mi kimwiirelaka: Ukivahe maasi kiwurye ommwaapuni mwa ayo. 44Ni uyo akiirelaka: Uwuryeke we, ni ciicammo kinaahala uvaha maasi inkamira caa nnyo paahi yooyo phi nthiyana mwacilyawe Mwanene Nluku wiira akhale amwaara a mwana a nkunya aka.

45Wanowiira kihinamaliha uswali nwo, pha wawe waluusi va Repeka nakusile mwaapu awe wanikhatani ahophiya mpaka waluusi ni ahorika maasi. Vano mi kahomwiirela: Ukivahe maasi kiwurye. 46Ule wowaakuvyaca aheenamiha mwaapu awe n'ukiirela uwuryeke, ni ahovaha uwurya inkamira caka nnyo. 47Vano kahonkoha wiira we mwana awani? Uyo ahokaakhula eeraka: Mi ki mwana a Petuweli mwana a Nahori nnyanryawe ni Milka. Phimaana kihommwariha ipirinku nnyo, ni ikhankani mmyoononi mmo, 48ni kahoromela vathi kinlapelaka n'unsukuru Mwanene Nluku, Nluku a nkunyaka Aparahamu, kiveleenle iphiro yomaana wiira koonkuse mwana a alokwawe nkunya aka wiira anthele mwanawe.

49Nna va munthoonyihere ikhweli nkunya aka, mwatthuna nkihimyacere, ciicammo mwahitthune nkihimyacere wiira mi kicuwele yoweettela.

50Vaavale Lapanu ni Petuweli yahaakhula: Cothene cipankaciye ni Mwanene Nluku, hi khaninoona yowuhimerya yoonanara atthuna yoorera. 51Nna va Repeka uyo ph'ula. Unkuseke ni urweeke wiira atheliye ni mwana akunya aa, toko cihimilyawe Mwanene Nluku. 52Vano karumeya Aparahamu, ahooromela vathi anlapelaka Mwanene Nluku. 53Ni ahokumiha mihaca co'pheeta, co'wooru ni ikuwo phummahaka Repeka. Ciicammo ahokumiha citthu comaana phummahaka nrokorawe eehaninya Lapanu ni anumwane.

54Wahoolo, ule na alopwana yarinawe ale aholya n'urupa. Usa waya, karumeya Aparahamu aholeeha eeraka kihorwaa wankunya aka. 55Nanso anumwane ni mwanrokorawe Repeka yaheera: Unihiyere mwanthiyana ula mahuku vakani, atthuna mahuku khumi paahi uhoolo nwo naarwaka. 56Vano ule aheerela nhikiporonkanihe. Ikwaha ila Mwanene Nluku hokireriha. Nkihiye kituruwele ratta wankunya aka.

57Ale yaheeraca: Nrwee nimwiihane mwanthiyana uyo nankohe. 58Vaavale yahomwiihana Repeka phunkohaka: Unaatthuna urwaa ni ula nlopwana ola? Ule ahaakhula eeraka: Kinaatthuna.

59Vano amuci awe yahonleeha Repeka wamoca ni nthiyana amwamwihile, karumeya Aparahamu na alopwana yarinawe. 60Ni yahonreriha Repeka amwiirelaka:

Mwanrokorihu, wunnuwe ni waayarace asaana ilufu ilufu cene,

ni ucuulu aa uyo waattheme eenani!

61Vaavale Repeka na asikhwawe yahowelaca inkamira, n'untthara karumeya ule. Phimaana karumeya ule ahonkusa Repeka n'urwaa.

62Yooyo ukati uyo Isaki aakhuma iphiro yo'luusi Ulayi-Royi, kontha aakhala ilapo yoohitto. 63Nihuku nimoca ukati woococilo, Isaki anaswali mmattani, ahowusa miitho awe ayo ni ahoona inkamira ciwaka. 64Ciicammo Repeka, ahowusa miitho awe ayo ahomoona Isaki, ni ahokhuruwa nkamirani, 65ni ahonkoha karumeya ule eeraka: Tipani ule nonisicerya mmattani ule? Karumeya ule ahaakhula: Yoole phi nkunya aka. Wowaakuvyaca wene Repeka aheekhuneela wiitho nwo ni ikuwo.

66Wahoolo karumeya uyo ahonttonkela Isaki citthu cothene ceeranele. 67Paahi, Isaki ahonkusa Repeka mpaka nheemani mwa anumwane yeehaninya Sara, ahonthela n'unfenta. Phimaana Isaki ahomaalihiya ni Repeka, ukhwa waya anumwane.

Currently Selected:

Mphattuwelo 24: NNI

Highlight

Copy