Mphattuwelo 23

Ukhwa wa Sara

1Vano Sara ahokhala myakha iminya wo sirini na saapa (127) ceyarelo, 2ni yahokhwa anari uKiriyati-Arapa uneehaninya Eforoni, ilapo yo'Kanaa. Aparahamu aheekhupanya ni wonlela Sara. 3Aparahamu ahiyaka mayithi ahonwa arwaaka wa ahete ni aheerela: 4Mi ki nletto, ni mweettakaci. Kinaalepela nipuro noopanka mahiye wiira kivithe mayithi aka. 5Vano ahete yahomwaakhula Aparahamu yiiraka: 6Univiriyane muulupale, nhooleli a Nluku uri ni hi. Waavithe amwaaraa ayo mahiye anhalaa utthuna. Khaawo nohala wuuthuwa mahiye wiira waavithe amwaaraa.

7Vaavale, Aparahamu ahonwa ni ahooromela vathi wamiithoni wa asinene ilapo, ahete. 8Ule aheera: Wakhala wiira nhokitthunihera waavitha amwaaraka mu, nkiviriyane. Mwakuulumele Eforoni, mwana a Sowari, 9wiira kitthune akivahe nikhuku no'Makipela niri umaverihela imatta awe iyo, ni akihimerye ihisapu inoncivela wiira akhale mahiye aka.

10Vano Eforoni onkomile wamoca na ahete, ni Eforoni, nhete, ahomwaakhula Aparahamu, yiiwaka ahete ni atthu othene yaari wa nkhora wo'parasa eeraka: 11Mena, muulupale, ukiviriyane. Imatta iyo kinawuvaha, ciicammo nikhuku niri mmattani ni kinawuvaha wamiithoni wa amuci aka, uvithe mayithi aa ayo.

12Vaavale Aparahamu ahooromela wiitho waya asinene ilapo. 13Ahomwiirela Eforoni yiiwaka atthu othene: Ukiiwe, wakhala wiira unaakupali ukihimerye ihisapu yo'matta iyo mi kinawuliva, waakhelele ncurukhu aka uyo wiira kivithe mayithi aka.

14Vano Eforoni ahomwaakhula Aparahamu eeraka: 15Ukiiwe muulupale aka: Imatta iyo ncurukhu aya uri iminya cese wo'pheeta. Isiyani vaava va we ni mi? Uvithe mayithi aa ayo. 16Aparahamu ahokupali ihisapu ile ni ahokumiha ncurukhu n'unliva Eforoni wahimyacilyawe yiiwaka ahete othene, ncurukhu iminya cese wo'pheeta wathumeliya itthu nnakosoni.

17Phimaana nthala na Eforoni naari uMakipela uhoolo waya uManree. Ukhuma nthala nno, nikhuku naari munthalani mmo, ni miri caari munthalani mmo ni nnyo caari nceresere nnyo, 18cahokhala ca Aparahamu maana ahothuma yoonaka ahete na ale othene yaari wa nkhora wo'parasa.

19Wahoolo Aparahamu ahaavitha amwaarawe yeehaninya Sara nnikhukuni niri imatta yo Makipela uhoolo waya uManree uneehaninya Eforoni, ilapo yo'Kanaa. 20Phimaana imatta iyo ni nikhuku nari mmattani mmo yahokhala mahiye Aparahamu kontha anotumiheriya na ahete.

Currently Selected:

Mphattuwelo 23: NNI

Highlight

Copy