Mphattuwelo 17

Wuula icantto phi ikanyero yo nleehano

1Aparamu unhaleelaka mwakha mmoca wiira apiihere iminya (99) ceyarelo, ahophwanyinya ni Mwanene Nluku ni aheereliya:

Phi mi Nluku o'kuru cothene.

Weette toko cintthunaka ni wiivaherere wa mi.

2Kinaawuleehanana we.

Kinaawuncerera venci ucuulu aa.

3Aparamu ahooromela vathi ni Nluku ahomwiirela: 4Uviriyane. Nna phi nleehano naka we ni mi. We unhala ukhala athumwanaya ilapo cinci. 5Khunhala wiihaninya tho Aparamu. Ncina naa ninhala ukhala Aparahamu, kontha mi kihoohela ukhala athumwanaya ilapo cinci.#17.5 Aroma 4.17

6Kinaahala uwuncerera venci, ni mwa we kinaahala upanka maloko ni unaahala ukhalana mamwene. 7Kimmopanka nleehano naka mi ni we ni ucuulu aa uttuli waya mmalokoni mwaya, wiira kikhale Nluku aa ni Nluku a alokwaa, nimmokhala nleehano noohimala. 8Ilapo yothene yo'Kanaa, uryaa nletto, kimmowuvaha toko yawaa mpaka khalayi we ni ucuulu aa. Ni mi kinhala ukhala Nluku aya.

9Vaavale Nluku ahomwiirela tho Aparahamu: Usunke nleehano naka, ukhuma we mpaka ucuulu aa wothene unhalaa ukhalana. 10Nna phi nleehano naka kimpankaka we ni ucuulu aa, ninlamuliya usunkiya, alopwana othene mwa nyu, anlamuliya wuula icantto. 11Nnolamuliya upanka ila icantto ela toko ikanyero yo nleehano naka mi ni we. 12Ukhuma nloko naa urwaaka uhoolo, mwana mwanlopwana rina mahuku naane, nolamuliya wuula icantto, akhale ooyariya wapuwani waa hata na ayo oothuminya toko ipottha pooti ahiri alokwaa. 13Akhale ooyariya wapuwani waa, atthuna oothuminya ni ncurukhu, anlamuliya wuulihiya icantto wiira nleehano naka nooheliya ikanyero mwirutthuni mwinyu nikhale nleehano noohimala. 14Ntthu phi ntthu mwanlopwana oohuula icantto, nolamuliya Ukumihiya iriyari wo'nethi aka, hohanyuriha nleehano naka.

Sara nannyara mwana

15Nluku ahomwiirela tho Aparahamu: Ukhuma nenna va mpaka wahoolo, amwaaraa khanhala wiihaninya tho Sarayi. Ncina naya ninhala ukhala Sara. 16Mi kinawaareriha ni mwa yaayo kinnowuvaha mwana. Khweli, mi kinawaareriha ni mwa yaayo ammokhuma maloko, mamwene ni ilapo ca atthu.

17Vano, Aparahamu ahooromela vathi, ahothyaa ni aheera: Wanawooryaa nlopwana o myakha iminya ceyarelo unnyara mwana? Wanawooryaa Sara uyara toko waarinawe myakha tuswini (90)? 18Aparahamu ahomwiirela Nluku: Unhiye Sumayili akhale wamiithoni waa! 19Vano Nluku ahomwaakhula eeraka: Khweli Sara amwaaraa, unannyarana mwana ni we ummomwiihana Isaki. Ni yooyo kimmompankana nleehano noohimala wamoca ni ucuulu awe wothene. 20Mwaha wa Sumayili, kiheewa. Uviriyane. Kimmonreriha, kimmonvaha atthu enci ni kimmowuncerera ucuulu awe. Uyo nohala ukhala athumwanaya mamwene khumi na meeli ni mwa yooyo immokhuma ilapo yuulupale. 21Nanso nleehano naka, mi kinhala upanka ni Isaki, mwana nohala unnyara Sara mwahiyu yoola ukati ula. 22Waamanlyawe wuulumaca na Aparahamu, Nluku ahothama n'uwela.

23Nenno nihuku nno, Aparahamu ahonkusa Sumayili ni othene yayarenle wapuwani wawe na ale yathuminye, alopwana othene o wapuwani wawe ahooliha icantto toko Nluku canlamulenlyawe.

24Ukati woolihiyaya, Aparahamu waahaleela mwakha mmoca wiira apiihere iminya (99) ceyarelo, 25ni mwanawe aarina myakha khumi na miraru. 26Aparahamu ni Sumayili yoonle icantto nenno nihuku nno. 27Wamoca na Aparahamu, yahoolihiya icantto atthu othene owapuwani wawe, ooyareela vaava na ale oothuminya uttayi.

Currently Selected:

Mphattuwelo 17: NNI

Highlight

Copy