Mphattuwelo 16

Uyaryaa wa Sumayili

1Vano, Sarayi, amwaarawe Aparamu, yaari mwali eekupa. Kamana ahaana ipottha awe yo mwanthiyana o wIciipitu, eehaninya Hakari. 2Sarayi ahomwiirela Aparamu: Toko cikaatelihilyawe Mwanene Nluku uyara, uthukumananeke ipottha aka. Pooti kinaapanka nloko ni ipottha eyo. Aparamu aheewelela yaahimilyawe Sarayi. 3Wakhumelenlyaya ukati wapiihenryaya Aparamu awaanyawe myakha khumi akhalaka uKanaa. Waari yooyo ukati uyo, Sarayi wanvahile awe Aparamu ipottha awe yo wIciipitu yiihaniyaka Hakari. 4Uyo ahonthukumanana Hakari ni ahorupala. Woonnyaya irukulu, Hakari ahopacera waaweha nseru athiyana a akunya awe.

5Vano Sarayi ahomwiirela Aparamu: Uvehiya waka nwo wuumorele we. Kihoovaha ipottha aka mmatatani mwaa, vano woonnyaya wiira ihorupala, inaakitarawa. Mwanene Nluku akhale mayahukhumu, ni mayonihukhumu mi ni we. 6Aparamu ahomwaakhula Sarayi: Ipottha aa iri mmatatani mwaa. Upanke inhala wucivela. Vano Sarayi ahonhuviha Hakari mpaka ule utthawa.

7Ncelo a Apwiya ahomphwanya Hakari wakhiviru ni iluusi muthakoni, ni iphiro inrwaa uSuri, 8ni ahonkoha: Hakari, ipottha ya Sarayi, unkhuma vayi? Unkela vayi? Ule ahaakhula eeraka: Kinontthawa Sarayi, nkunya aka. 9Ncelo a Mwanene Nluku ahomwiirela: Uturuwele wa nkunya aa ni weevaherere. 10Ncelo aheera tho: Kimmowuncerera ucuulu aa ni khaawo nohala woorya waalikela. 11Aheereliya tho ni Ncelo a Mwanene Nluku:

We uhorupala ni unamphwanya mwana

n'urwaa ummaha ncina na Sumayili,

kontha Mwanene Nluku homwiiwa muhuvani mwaa.

12Uyo nohala ukhala toko mwapuuru o ntakhwani.

Ntata nawe ninhala ukhala no waanana othene

ni matata a atthu othene anhala ukhala umwaanana uyo,

ni makhalelo awe anhala ukhala uwaana na asunnawe.

13Nna phi ncina naanvahilyawe Mwanene Nluku amuulumannyawe: We El Royi, kontha eenre: Kihomoona ule nokoona? 14Phimaana iluusi iri iriyariru uKatesi ni uPerete, wiihaninye Iluusi yo Lahayi-Royi.

15Hakari ahonnyara mwana a Aparamu ni ule ahonvaha ncina na Sumayili. 16Aparamu aarina myakha thamanini na siita (86) ceyarelo ukati wannyanryawe Hakari Sumayili.

Currently Selected:

Mphattuwelo 16: NNI

Highlight

Copy