Lukas 6

Anak Manusia ada kuasa for ator tu hari Sabat

(Mat. 12:1-8; Mrk. 2:23-28)

1 # Ul. 23:25 Satu hari pas hari Sabat, tu hari yang orang nimbole bakarja, Yesus deng De pe murit-murit bajalang lewat di kobong gandum. Samantara bajalang di situ, Dia pe murit-murit bapete gandum kong dong se bersi tu gandum itu dari pa de pe kuli pake dong pe tangan, trus dorang makang. 2Waktu itu, ada bebrapa orang dari golongan Farisi yang ada di situ kong dorang babilang, “Sebenarnya kalu iko atoran agama, ngoni nimbole bakarja di hari Sabat, mar ngoni langgar tu atoran itu.”

3Kong Yesus manyao pa dorang, “Tantu ngoni so perna baca di Kitab Suci tu cirita tentang raja Daud waktu Dia deng de pe orang-orang so lapar. 4Dia maso ka dalam Tuhan Allah pe tenda ibada, kong makang tu roti yang da kase persembahan for Tuhan Allah, trus dia kase berbage tu roti itu pa de pe orang-orang. Padahal kalu iko atoran agama, yang bole makang tu roti itu cuma tu imam-imam, mar dorang langgar itu.”

5Kong Yesus lei bilang pa dorang, “Tu Anak Manusia ada kuasa for ator apa tu manusia bole mo beking di hari Sabat.”

Yesus kase bae tu orang yang de pe tangan kanan cacat

(Mat. 12:9-14; Mrk. 3:1-6)

6Waktu di hari Sabat laeng, Yesus maso ka ruma ibada agama Yahudi kong mangajar. Di situ ada satu orang yang dia pe tangan kanan cacat. 7Kong di situ lei ada ahli-ahli Taurat deng orang-orang dari golongan Farisi. Dorang da lia-lia trus pa Yesus, dorang mo cari tau kalu Dia mo kase bae orang saki di hari Sabat supaya dorang ada alasan for se sala pa Dia. 8Mar Yesus tau tu dorang pe pikiran, kong Dia babilang pa tu orang yang de pe tangan kanan cacat, “Mari jo badiri di tenga-tenga sini!” Kong tu orang itu pi badiri di tenga-tenga pa dorang. 9Abis itu Yesus bilang pa orang-orang yang ada di situ, “Kita mo tanya pa ngoni dulu. Kalu iko tu torang pe atoran agama, mana tu bole mo beking di hari Sabat? Beking tu bae ato tu jaha? Mo se slamat orang ato mo bunung?” 10Trus Yesus lia sekliling pa dorang samua, kong Dia bilang pa tu orang yang de pe tangan kanan cacat, “Co se kamuka kamari tu ngana pe tangan!” Tu orang itu beking bagitu kong de pe tangan jadi bae.

11Pe lia itu, tu ahli-ahli Taurat deng orang-orang dari golongan Farisi itu jadi mara skali. Kong dorang mulai baku skongkol apa tu dorang mo beking pa Yesus.

Yesus pili dua blas orang jadi rasul tu Dia pe utusan

(Mat. 10:1-4; Mrk. 3:13-19)

12Kong satu kali, Yesus pigi ka bukit for basombayang. Di situ Dia basombayang satu malam pa Tuhan Allah. 13Serta so siang, Yesus pangge Dia pe murit-murit kong pili dua blas orang dari pa dorang. Tu dua blas orang itu Dia ja bilang rasul. Tu dorang pe nama-nama: 14Simon tu Dia ja pangge lei Petrus, Andreas tu Petrus pe ade, Yakobus, Yohanes, Filipus, Bartolomeus, 15Matius, Tomas, Yakobus tu Alfeus pe anak, Simon tu dari Gerakan Yahudi Merdeka, 16Yudas tu Yakobus pe anak, deng Yudas Iskariot yang nanti mo bahianat pa Yesus.

Yesus kase bae banya orang

(Mat. 4:23-25)

17Abis itu, Yesus turung dari bukit sama-sama deng Dia pe dua blas murit, kong dorang brenti di satu tampa yang rata. Di situ banya tu Dia pe murit so bakumpul deng banya orang laeng lei yang da datang dari sluru daera Yudea, dari Yerusalem, dari Tirus deng Sidon tu ada di daera pinggir pante. 18Dorang datang for dengar Yesus da mangajar deng lei supaya Yesus kase bae tu dorang pe panyaki, kong tu orang-orang yang da kemasukan setang-setang lei jadi bae. 19Samua orang itu brusaha mo bapegang pa Yesus lantaran ada kuasa yang kaluar dari pa Dia yang beking dorang samua jadi bae.

Tu hal-hal yang mo beking snang deng mo beking cilaka

(Mat. 5:1-12)

20Yesus lia tu Dia pe murit-murit kong babilang,

“Tu orang-orang yang nyanda ada apa-apa,

dorang itu yang paling snang,

lantaran dorang itu jadi orang-orang dari Tuhan Allah yang Berkuasa sbagai Raja.

21Tu orang-orang yang skarang lapar,

dorang itu yang paling snang,

lantaran Tuhan Allah mo se puas pa dorang.

Kong tu orang-orang yang skarang ini manangis,

dorang itu yang paling snang,

lantaran Tuhan Allah mo beking dorang tatawa.

22 # 1Ptr. 4:14 Tu orang-orang yang da iko pa Anak Manusia,

dorang itu yang paling snang,

biar lei orang laeng binci pa dorang,

nimau mo bergaul deng dorang,

ja hina pa dorang

deng lei se basae tu dorang pe nama.

23 # 2Taw. 36:16; Kis. 7:52 Soalnya dulu tu torang orang Yahudi pe nene moyang lei binci tu nabi-nabi dulu.

Jadi kalu ada orang-orang yang iko pa Anak Manusia kong orang-orang laeng binci pa dorang,

dorang itu yang paling snang,

lantaran Tuhan Allah so se sadia upah basar for dorang di sorga.

24Mar tu orang-orang yang skarang ini kaya,

cilaka jo dorang lantaran dorang so lebe dulu rasa tu snang dari tu dorang pe kekayaan.

25Tu orang-orang yang skarang ini so kanyang,

cilaka jo dorang lantaran dorang nanti mo lapar.

Kong tu orang-orang yang skarang ini tatawa,

cilaka jo dorang lantaran nanti dorang mo manangis.

26Tu orang-orang yang da dapa puji dari samua orang,

cilaka jo dorang lantaran dulu tu dorang pe nene moyang lei da puji-puji bagitu pa tu nabi-nabi palsu.”

Yesus suru pa torang supaya sayang tu tong pe musu-musu

(Mat. 5:38-48, 7:12)

27“Mar for ngoni tu da dengar pa Kita, Kita mo bilang kalu ngoni musti sayang tu ngoni pe musu deng beking tu bae pa orang yang binci pa ngoni. 28Ngoni sombayang minta akang berkat for orang yang da kutuk pa ngoni, deng sombayang akang lei for orang yang da beking jaha pa ngoni. 29Kalu ada orang yang tampeleng ngoni pe pipi satu, kase lei tu ngoni pe pipi sabla. Kong kalu ada orang rampas tu ngoni pe juba, kase biar lei dia ambe tu ngoni pe baju. 30Sapa jo yang baminta apa-apa pa ngoni, ngoni kase jo tu dia da minta itu. Kong kalu ada orang yang rampas tu ngoni punya, ngoni nyanda usa suru pa dia se pulang ulang itu. 31Samua tu ngoni suka orang laeng beking pa ngoni, ngoni musti beking bagitu lei pa orang laeng.

32Kalu ngoni sayang cuma pa orang yang sayang pa ngoni, apa tu ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei sayang pa orang-orang yang sayang pa dorang. 33Kalu ngoni ja beking tu bae cuma for orang yang ja beking tu bae pa ngoni, apa ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei ja beking tu bae cuma for orang-orang yang ja beking tu bae pa dorang. 34Kalu ngoni kase pinjam doi cuma pa orang-orang yang ngoni harap bole mo kase pulang ulang tu ngoni pe doi, apa ngoni pe untung di muka pa Tuhan? Nyanda ada kasiang. Soalnya tu orang-orang yang nyanda ja iko pa Tuhan lei kase pinjam doi pa dorang pe tamang-tamang, supaya dorang bole trima ulang tu doi sama de pe banya.

35Mar ngoni musti sayang tu ngoni pe musu-musu deng beking tu bae pa dorang. Ngoni kase pinjam tu ngoni punya pa dorang, kong ngoni nyanda usa pikir kalu dorang mo se pulang itu pa ngoni. Kalu ngoni ja beking rupa itu, ngoni mo dapa upah yang basar, deng lei kalu ngoni beking rupa itu, itu se tunjung kalu ngoni ini Tuhan Allah Yang Mahatinggi pe anak-anak. Soalnya Tuhan itu bae pa tu orang-orang yang nintau ja bilang makase, deng Dia lei bae pa tu orang-orang yang ja beking tu jaha. 36Ngoni musti sayang pa orang laeng, sama deng torang pe Bapa di sorga lei sayang pa samua orang.”

Yesus kase ajar supaya jang ja hakimi pa orang laeng

(Mat. 7:1-5)

37Yesus kase tau lei, “Ngoni jang hakimi pa orang laeng, supaya Tuhan nyanda mo hakimi pa ngoni. Ngoni jang hukum pa orang laeng, supaya ngoni nyanda mo dapa hukum. Ngoni kase ampung jo pa orang laeng, supaya ngoni bole dapa ampung. 38Ngoni bakase jo pa orang laeng, supaya Tuhan lei mo kase bale pa ngoni deng talebe-lebe. Tuhan mo bakase pa ngoni deng talebe-lebe, itu bole se sama deng orang yang baukur pake tu ukuran yang bagus, trus dia goyang-goyang sampe jadi padat, kong dia tamba akang lei sampe tabuang-buang, kong dia kase pa torang. Soalnya kalu ngoni bakase sadiki, Tuhan lei mo kase sadiki pa ngoni. Mar kalu ngoni bakase banya, Tuhan lei mo kase banya pa ngoni.”

39Yesus bilang lei satu prumpamaan pa dorang, “Bole so orang buta tuntun pa orang buta? Tantu nimbole. Soalnya dorang dua itu pasti mo sama-sama taisi ka lobang. 40Nyanda ada murit yang lebe dari de pe guru. Mar nanti kalu tu murit so klar blajar, dia mo jadi sama deng de pe guru.”

41Yesus bilang lei, “Ngoni pe capat ja tarukira tu orang laeng pe sala yang pe kacili, mar tu ngoni pe sala yang pe basar, ngoni se biar. Ngoni itu bole mo se sama deng tu orang yang da lia tu serbuk kayu pa de pe sudara pe mata, padahal tu balak yang ada pa dia pe mata, dia nyanda dapa lia. 42Jadi bagimana ngoni bole babilang pa ngoni pe sudara bagini, ‘Mari jo, kita se kaluar tu serbuk kayu pa ngana pe mata.’ Padahal pa ngoni pe mata sandiri ada balak yang ngoni kase biar. Hei orang munafik! Ngoni musti se kaluar dulu tu balak dari pa ngoni pe mata, baru ngoni bole mo balia deng jelas for se kaluar tu serbuk kayu dari pa ngoni pe sudara pe mata.”

Dari orang pe kalakuan, dapa tau de pe hati bae ato nyanda

(Mat. 7:16-20, 12:33-35)

43Yesus bilang lei, “Nyanda ada pohong yang bagus kong de pe bua nyanda bagus. Kong nyanda ada pohong yang nyanda bagus kong de pe bua bagus. 44Orang bole dapa tau tiap pohong dari de pe bua. Soalnya orang nyanda mungkin mo pete bua ara dari rumpu baduri, deng lei nyanda mungkin orang mo pete bua anggor dari duri-duri. 45Orang yang bae-bae ja beking tu hal-hal yang bae, lantaran samua yang ada pa dia pe dalam hati bae. Mar tu orang jaha ja beking tu hal-hal yang jaha, lantaran samua yang ada pa dia pe dalam hati jaha. Soalnya tu bae deng tu jaha yang ngoni ja beking, itu iko apa yang ada pa ngoni pe dalam hati.”

Orang yang ja iko pa Tuhan bole mo se sama deng tu ruma yang de pe fondasi kuat

(Mat. 7:24-27)

46Kong Yesus bilang lei, “Kiapa ngoni pangge-pangge pa Kita, ‘Tuhan, Tuhan’, padahal ngoni nyanda ja beking tu Kita da suru. 47Kalu ada orang yang datang pa Kita, trus dia dengar tu Kita da bilang kong beking itu, Kita mo kase tau pa ngoni kalu tu orang itu bole mo se sama deng apa: 48dia itu bole mo se sama deng orang yang da se badiri ruma. Lebe dulu dia gale tana dolong-dolong kong dia beking fondasi dari batu. Trus dia se badiri tu ruma di atas fondasi itu. Waktu banjer datang, trus tu banjer bage tu ruma itu, tu ruma tetap kuat lantaran da se badiri di atas fondasi yang kuat. 49Mar tu orang yang da dengar apa tu Kita da bilang kong nyanda ja beking itu, dia itu bole mo se sama deng satu orang yang da se badiri ruma di atas tana kong nyanda pake fondasi. Waktu banjer datang trus banjer bage tu ruma itu, tu ruma iko rubu kong ancor skali.”

Currently Selected:

Lukas 6: MDO

Highlight

Copy