Kisah Rasul-rasul 4

Si Petrus wo si Yohanes witu u sinaru né Mahkamah Agama

1Karegas si Petrus wo si Yohanes mahnuwu' wia sé tou lakez, a méyé sé walian, si tonaas né mahtéiz um Walé ni Opo Empung wo sé tou wia sé sana réwok tou Saduki.#4:1 Sé sana réwok Saduki én zéi'kan ma'éman sa si tou nimatémo én toro matou sumaup. 2Sé tou itii én totoz maupi' pahpaan si Petrus wo si Yohanes é mahtuzu' wia sé tou lakez wo mahwoka' i sé tou nimatémo én itou sumaup tanu si Yesus i méitoumé sumaup ni Opo Empung. 3Niitumo si Petrus wo si Yohanes én tinionan nérala an iuntepa witi bui makaz i nimasandomé im woondo pahpaan in toro niitu ém wengimo. 4Taan im wia sé tou timalinga an tutuzu' itii é lakez sé nima'éman, taka-takazan sé tou ma'émano, sé tuama é nimaéndomoma woo limana riwu tou.

5Masandomé, sé tonaas né tou Yahudi, sé pahtutu'an né tou Yahudi wo sé tou tulap un Torat é nimeruz witi Yerusalem. 6Si Walian Wangko' Hanas wo si Kayafas, si Yohanes, si Aleksander wo sé walina sé méikauntep sana awu ni Walian Wangko' é niméyé witi pengengeruzan itii. 7A si Petrus wo si Yohanes iwali néramé witu um paheruzan né Mahkama Agama im pahtata'un um winangun néra. Tumondong niitu a séra meligau in téntii, “Séi si niméhé ung kawasa wia ni kamu? Kaapa karia u ngaran ni séi kamu i mahwangun péléng niana?”

8A si Petrus si kinawasa ni Roh Lenas mingkotla in téntii, “É kamu in tonaas wo pahtutu'an né tou Yahudi, 9sa in tarékan ni kai é léwo'zéi' im pahligauan niou pahpaan ni kai i nimangun u lé'os wia si tou lailai, wo kasii léwo'zéi' ing kumuama karia ung kawasa ni séi si tou itii liné'osa, 10ni kamu wo péléng sé tou Israel é léwo'zéi' i mata'ula, i si tou lailai makarendai witu u sinaru niou kenu é nimalé'osa karia ung kawasa u ngaran ni Yesus Kristus, si tou Nazaret si sinalip niouola itii taan méitoumomé sumaup ni Opo Empung im wia sé nimaté. 11#Mzm. 118:22 Si Yesus itii é,

‘Um watu mémoitia' né memamangun am walé

taan ni Sia é nimaéndomola watu to'tolan.’

12Akaz uman si Yesus si toro milot sé tou im witu un ukuman wana a singkéla', zéi'kan siapa ngaran walina. Pahpaan im wia ung kaayahan kenu, zéi'kan siapa ngaran walina si winéhan ni Opo Empung ung kawasa i milot sé tou im witu un ukuman wana a singkéla' néra.”

13Sé tou méikauntep witu u Mahkama Agama é mengusi-ngusingsing i nimilekla si Petrus wo si Yohanes zéi'kan maindé' i mahwingkoté wo ni séra kasii é mata'u i ni séra zua én tou kanaramen wo zéi'kan simikola.#4:13 Ung kalakoan un zéi'kan simikola é masuat wo si zéi'kan tulap un Torat. Kinata'uan néra kasiila i ni séra zua é mahkii-kiit si Yesus. 14Taan ni séra én zéi'kan mata'u kumua ing kura, pahpaan nimilekla si tou lailai woan itii é rimendaio witu u rété né aatu zua itii. 15Kumawusa niitu, si Petrus wo si Yohanes é méipekiondol néramé im witu um paheruzan itii, a séra rengan i meruz. 16Ni séra mahliligauan, “Apa u léwo'zéi' im wangunenta wia ni séra zua? Pahpaan péléng sé tou wia Yerusalem é mata'umo i ni séra é nimangunola u makakompo'en un zéi'kan mata'u iwuni wo ni kita én zéi'kan mata'u kumélong niitu. 17Taan wo u makakompo'en winangun nérama itii zéi'kan kalousna in ikawoka'ma, tawimo kita menérola lalan i ma'indé' wo suméro' ni séra. Wangunentama téntu wo séra zéi'mo mahnuwu' wia sé tou tumoro u ngaran itii.”

18Kumawusa niitu, tawahen néramé si Petrus wo si Yohanes i muntepé sumaup witu um pengengeruzan itii, a séro'en nérala in zéi'kan toro mahkua kaapa mahtuzu' wia sé tou karia u ngaran ni Yesus.

19Taan si Petrus wo si Yohanes é nimingkotla in téntii, “Totozen niouola in esa wisa un ulit im witu u sinaru ni Opo Empung: mahtali-talinga wia ni kamu kaapa mahtali-talinga wia si Opo Empung. 20Pahpaan zéi'kan mamuali a niilek wo an tinalinga naimo, zéi'kan ikua nai wia sé tou.”

21Tumalingamé niitu, sé tonaas né tou Yahudi éng kalousna i ma'indé' si Petrus wo si Yohanes. Taan sé zua aatu itii é méipilot néramé pahpaan ni séra zéi'kan méikailekla ung kawalian i mukum ni séra, wo kangkasii maindé' én taa sé tou lakez maupi'. Pahapaan sé tou lakez itii é mahlooz u ngaran ni Opo Empung i si tou lailai itii liné'osa. 22Pahpaan ung katou-touan ni tou lailai woan itii é limangkoio epatna pulu' ta'un, wo in tarékan é lé'oso.

Um pengaléien wo zéi'kan maindé' i mahwoka' u Nuwu' Lé'os

23I si Petrus wo si Yohanes mémoiondolé im witi pengengeruzan itii, a séra mawurima wia sé kakaria néra. An isirita nérala zua a méikuamé né tonaas né walian wo né pahtutu'an né tou Yahudi wia ni séra. 24#Kel. 20:11; Neh. 9:6; Mzm. 146:6 In tinalingala né kakaria néra niana péléng, a séra mengaléi mahwali-wali in téntii, “O Opo Empung, ni Komo si nimangun u langit wo ung kaayahan, un tasik wo péléng am witu. 25#Mzm. 2:1-2 Im puuna, si Roh Lenas éng kimua mengiité si nimaopo nai Daud in téntii,

‘Kaa sé tou é maupi'?

Wo kaa sé tou é megena-genang an zéi'kan siapa torona?

26Sé kolano wia ung kaayahan én timégamo wo sé mahkawasa é nimaréwoko, i sumaru si Opo Empung wo si Kristus si méitaaz-Na.’

27 # Mat. 27:1-2; Mrk. 15:1; Luk. 23:1, 7-11; Yoh. 18:28-29 Pahpaan un ulitna wia um wanua tua'na kenu é nimaréwoko si Herodes, si Pontius Pilatus, wo sé tahsasana wanua karia né suzu né Israel i sumaru si Yesus, si Ata-Mu Lenas, si Pinéléng-Mu. 28Um winangun néra én tinotoz-Mumo rengané im puuna. Péléng niana é nimamuali pahpaan ung kawasa wo um paaz-Mu. 29Wo in tarékan o Opo Empung, ilekené am pahmualin néra i ma'indé' ni kai sé ata-Mu wo wangunené ni kai in zéi'kan maindé' i mahwoka' u Nuwu'-Mu. 30Iayomé u lengen-Mu i lumé'os sé tou saki wo ipapaileké a makakompo'en wo an zéi'kan kakuaan mengiité u ngaran ni Yesus, si Ata-Mu Lenas.”

31Karegas i mengaléi, un tampa kinaréwokan néra é mahogémo. Ni séra péléng éng kinawasamo ni Roh Lenas, a séra mahwoka' u Nuwu' ni Opo Empung karia in zéi'kan siapa un ikaindé'.

Ung katou-touan né tou ma'éman

32 # Kis. 2:44-45 Péléng sé tou ma'éman én esa genang wo nimaesaan, wo zéi'kan siapa zozo' in esa si mahkua im péléng an anuna én anuna in esa, taan péléng an anuna én anu néra péléng. 33Karia ung kawasa totoz wangko', sé aatu ni Yesus mahkua a niilek néra tumoro si Yesus si méitoumomé sumaup ni Opo Empung. Wo ni séra péléng kasii é menou-nou karia in tinambéran ung kamang totoz lakez. 34Pahpaan zéi'kan siapa zozo' in esa im wia ni séra sé zéi'kan nimawutul am pemandungenna. Pahpaan péléng sé tou makauma kaapa makawalé é nimangkér an anu néra itii, wo an zoit kinailekan néramé itii ém pinahali nérama, 35an iwéhéla wia sé aatu ni Yesus. Wo péléng an zoit itii é méipeméténgla né aatu ni Yesus wia si esa wo si esa mengiit am pemandungen néra.

36Si Yusuf si pahkuan né aatu ni Yesus im ‘Barnabas’ ung kalakoana é mahenté' un até né tou wo ni sia kangkasii é suzu ni Lewi si nimatou witi Siprus é nimangun kangkasii un téntu. 37Ni sia nimangkér un umana wo nimahalima un zoit itii an iwéhénala wia sé aatu ni Yesus.

Currently Selected:

Kisah Rasul-rasul 4: LAITOM

Highlight

Copy