Lukas 24

Si Yesus tumou sumawel

(Mat. 28:1-10; Mrk. 16:1-8; Yoh. 20:1-10)

1Asi ari Duminggu, si endo kataré asi duminggu itu, imamoondopé' keli, sé wéwéné itu mangé an tampa kinuburan i mayat i Yesus. Séra maali nanamur wo solo mawou manam sé tinu'tulo éra. 2Icateka' mangé ang kubur itu, sérén éra em batu aipénet ing kubur itu miléio. 3Wo séra muntep, taan ra'ica kinaséréan éra e mayat i Apo' Yesus. 4Ang karoro'an éra i makatulung, séra tanuoka taré tou bingo ampa'paan memero-merot ing kinamamualian itu wo tumarépé'anke' mapaturu'o mai rua tou mekarai ing kulo' menéla-nélap, makatulung an duru éra. 5Séra maindé' keli wo séra kumundu wo en amo éra akar an tana'. Wo icua é rua tou itu ai séra, “Kéitu réén kamu maéré-éré si Tou tumou an uner é tou imaté? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33 Sia ra'io am bia'i. Sia itumouo sumawel. Ta'néien iow sumawel si aicua-Nao ai camu an tutuw Sia ang Galileapé'. 7Aicua-Nao sapaoka si Toyaang i Tou musti isarakan a sé tou mengaéma' ing kamesé-meséaan, Sia isalip éra wo asi endo katelu tumou sumawel.”

8Wo kata'néiano éra sé aicua i Yesus itu. 9Kekawus in itu itela'u éra eng kubur wo mangé isisil éra waya eng kamamualian itu a sé sangapulu' esa murit i Yesus wo pakasa sé poo-poow walina sé makii-kiit si Yesus. 10Sé wéwéné itu si Maria tou Magdala, si Yohana, si Maria inang i Yakobus wo ka'i sé wéwéné walina sé mewali-wali wo iséra. Séra im bayao eng kumua ing kinamamualian itu a sé murit i Yesus sé patuulen ruru'du'an.

11Taan anggapen é murit i Yesus sapaoka en abar aicua é wéwéné itu ra'ica wutul. Anaé, ra'ica pinercaya éra en abar é wéwéné itu.

12Mandé in taniitu, si Petrus makala'us tumulung wo tuméron angé ang kubur itu. Icateka' mangé am bitu, sia kumuru wo suméré in an untep, sérénna waya oka ing kaéng si pinaké aisaput a mayat i Yesus. Wo sia maréng sumawel wo memué-muéi an untep in aténa, ‘Sapa réén si mamualio?’

Si Yesus mapaturu' in owak-Na a sé rua tou sé mawaya' maangé an Emaus

(Mrk. 16:12-13)

13 # Mrk. 16:12 Asi ari Duminggu ituke', awéan rua tou a sé tou mengakiit si Yesus ang karoro'an i maangé an esa roong makangaran Emaus. En doong itu, eng katayangna wona' sangapulu' esa kilometer an Yerusalem. 14Ang karoro'an éra imawaya' maangé asi roong itu, séra memaa-maar andumoro' im pakasa sé imamualio a si Yesus. 15An tutuw éra memaa-maar wo membum-buéien andumoro' ing kinamamualian itu wo si Yesus mapaturu' mai in owak-Na wo maya' mewali-wali wo iséra in dua. 16Taan em beren éra tanuoka awéan eng kumawu' akar ra'ica katuusan éra si Yesus.

17Wo wuéien i Yesus ai séra, “Sapa réén em pemaa-maaren iow ang karoro'an iow mawaya'?”

Wo séra mento', en amo éra wendu keli. 18Esaan ai séra makangaran Kleopas, icuana a si Yesus, “Si Amang in esake' réén si manangkéi an Yerusalem, si ra'ica makailek ing kinamamualian asi weru-weru anio'?”

19Wo wuéien ka'i i Yesus ai séra, “Sapa réén e imamuali?”

Isowat éra, “Andumoro' si mamuali a si Yesus Tou Nazaret. Sia Nabi, e nunuwu'-Na wo em pengaémaan-Na uli-ulit wuta ing kawasa an dior i Amang Kasuruan wo an dior é tou. 20Taan Sia aisarakan é kikiiten é imam wo sé kikiitenta tou Yahudi a sé pemerénta Romawi in ukumen patén. Wo Sia aisalipo éra. 21En ulitna Siao woo si paarapen ami e mai mekar icami tou Israel ang kakawasaan é pemerénta Romawi. Wo tumo'tolai ing kepaté-Na akar asi endo anio', muntepo in telu ngando. 22Wo piraan wéwéné am paesaan ami, iméma'o icami mangaya'ka'. Ampa'paan kawoondo an tutuw matawio mando, séra imangéo ang kubur kinuburan i Yesus, 23taan e mayat-Na ra'ica aipeta'up éra. Wo séra maréngai ai cami wo kumua sapaoka séra asalo isuméré sé malaékat wo icua é malaékat itu sapaoka si Yesus tumouo sumawel. 24Kelinga in itu, piraan tou karapi ami mangé ka'i ang kubur itu wo sérén éra sapaoka pakasa sé aicua é wéwéné itu wutul. E mayat i Yesus ra'io kaséréan éra.”

25Wo icua i Yesus ai séra in dua, “Kamu anio' taloso bodok. Taloso ngenger en até miow e mercaya pakasa sé aicuao é nabi ang Kitap Le'nas. 26Ra'ica réén kailekan iow sapaoka si Kristus musti sumangkum owo waya ing kawenduan itu, kumawus in itu Sia tumerima i rarayo wo in sisiri'?”

27Wo isisil-Na waya ai séra in dua sapa sé aipatic am pakasa ing Kitap Le'nas andumoro' in owak-Na, tumo'tolai ang kitap-kitap aipatic i Musa akar ang kitap-kitap aipatic é nabi walina.

28An tutuw éra matawio in doong Emaus, si roong angéan é rua tou itu wo si Yesus tanuoka kéndo' masalé' lumala'us im bawayaan-Na. 29Taan peleséén éra Sia wosama' tumuli. Icua éra, “Mentoo am bia'i mewali-wali wo icami, ampa'paan tawio mawengi wo ka'i mekeremo.” Wo si Yesus muntep am balé itu wo mento' mewali-wali wo iséra. 30An tutuw Sia lumukut kuman mewali-wali wo iséra, Sia mindo roti wo kumua i makapulu'sama' a si Amang Kasuruan wo te'bi-te'biin-Na e roti itu wo yéké-Na ai séra. 31An tutuw ituke', em beren éra makala'us masendot akar katuusan éra si Yesus. Taan asi témpo ituke' Sia makala'us tumala in owak-Na an uner éra. 32Wo séra in dua mengkuanan, “Tarépé' an lalan, an tutuw Sia memaa-maar wo icita wo masisil andumoro' sé aipatic ang Kitap Le'nas, en atéta tanu taré makaincaya'ke'?”

33 # Mrk. 16:13 Asi témpo ituke' séra in dua makala'us tumulung wo maréng angé sumawel an Yerusalem. A mangé mbitu séra in dua meta'up wo sé sangapulu' esa murit i Yesus sé ang karoro'an i mali'u-li'us wo sé tou maémano walina. 34Wo icua é murit i Yesus itu ai séra in dua, “Wutul, si Apo' Yesus itumouo sumawel wo imapaturu'o in owak-Na a si Simon.”

35Wo isisil ka'i é rua tou itu andumoro' in sapa e imamuali ai séra in dua an uner im bawayaan maangé an Emaus wo ka'i tambisa séra ro'na makatuus si Apo' Yesus an tutuw Sia mene'bi-ne'bi' i roti.

Si Yesus mapaturu' in owak-Na a sé murit-Na

(Mat. 28:16-20; Mrk. 16:14-18; Yoh. 20:19-23; Kis. 1:6-8)

36Ang karoro'an éra i memaa-maar andumoro' im pakasa eng kinamamualian itu, tumarépé'anke'mai si Yesus tumulung an uner éra wo icua-Na, “Siri' ang kaeluran torona miow!”

37Séra mangaya'ka' wo maindé', pawasan éra, en sinéré éra mu'kur léwo'.

38Taan icua i Yesus ai séra, “Kéitu réén kamu maindé'? Wo kéitu réén en até miow marua-rua wasa andumoro' Yaku? 39Sérénai eng kama wo eng kécéi-Ku. Yakuo in esa si anio'. Isuuno mai en owak-Ku wo sérén sumama-sama', ampa'paan e mu'kur léwo' ra'ica wana sama'na wo ru'i tanu si pasérén iow a Yaku anio'.”

40Ang karoro'an imakua in taniitu, ituru'-Na ka'i eng kama wo eng kécéi-Na ai séra. 41Taan séra ra'ipé' mercaya en suméré Sia ampa'paan séra arui keli wo mangaya-ngaya'ka'pé'. Wo icua-Na ai séra, “Awéan kakanen ai camu am bia'i?” 42Wo wéé éra ai Sia esa ngapokol sera' rinarang. 43Indon-Na en sera' itu wo kanen-Na an dior éra. 44Makakanai Sia wo icua-Na ai séra, “An tutuw-Ku i mewali-walipé' wo icamu, sumangkumo icua-Ku ai camu, sapaoka pakasa en aipatic andumoro' Yaku ang Kitap Torat, ang kitap é nabi wo ang kitap Mazmur, musti mamuali.” 45Wo émaan-Na em pakawerot éra mawuka' akar ro'na kailekan éra sapa sé aipatic ang Kitap Le'nas.

46Wo icua-Na ai séra, “Aipatic ang Kitap Le'nas tana'i: Si Mesias, si Colano Lumolowir, musti mawendu wo maté wo asi endo katelu tumou sumawel an uner é tou imaté. 47Wo aipatic ka'i sapaoka en abar anio' musti sisil angé maké ing kawasa i ngaran-Na a sé pakasa im bangsa tumo'tol an Yerusalem akar am pakasa ing kayo'baan: Si séike' e mape'dis ang kamesé-meséaan ampungan oka i Amang Kasuruan. 48Wo icamuo en suméré an tutuw-Ku i mawendu, maté wo tumou sumawel. Anaé, sapa en sinéréo miow, icuao mangé a sé pakasa in tou. 49#Kis. 1:4 Wo iwéé-Ku oka ai camu e Roh Le'nas si aijanjio i Amang-Ku indior. Taan kamu musti mento' owo ang kota anio' akar kamu wutan ing kawasa i Roh Le'nas asi Amang Kasuruan owo.”

Si Yesus icaangkai angé an sorga

(Mrk. 16:19-20; Kis. 1:9-11)

50 # Kis. 1:9-11 Wo iwali i Yesus sé murit-Na mangé ang kesot ing kota matawio in doong Betania. Asi tampa itu Sia mangkai ing kama-Na wo kumamang iséra. 51An tutuw Sia kumamang iséra, tumo'tolo Sia icaangkai angé an sorga akar imetalicur wo iséra. 52Wo séra kumundu maapo' ai Sia wo séra maréng angé an Yerusalem mawuta-wuta ing kaaruian. 53Susur in endo séra mengaangé am Balé Le'nas e rumayo wo sumiri' si Amang Kasuruan.

Currently Selected:

Lukas 24: TNT

Highlight

Copy