Yohanes 1

En Taar mamualio tou

1Asi kataré-taré ra'ipé' niéma' i Amang Kasuruan eng kayo'baan anio', en Taar awéano. En Taar itu mewali-wali wo si Amang Kasuruan wo en Taar ituo si Amang Kasuruan.#1:1 E nunuwu' “Taar” pinaké i Yohanes en tumuru' a si Yesus Kristus Toyaang i Amang Kasuruan. A nunuwu' é Yunani e nunuwu' “Taar” eng kaangéan “nunuwuun” kuma'pa “wewerot”. Sé rua kaangéan itu awéan ubungan, ampa'paan “nunuwu'” tumuru' im “bewerot”. Ampa'paan si Yesus itu si Amang Kasuruan, pakasa sé aicua i Yesus en tumuru' esaan andumoro' i Amang Kasuruan wo im bewerot-Na. Si Amang Kasuruan tumuru' in owak-Na ai cita imaké i nunuwu' wo ing katouan i Yesus. 2En Taar itu tumo'tolai ing kataré-taré mewali-wali wo si Amang Kasuruan an tutuw eng kayo'baan ra'ipé' niéma'. 3Ang karapi in Taar itu émaan i Amang Kasuruan em baya-wayana awéan. Ra'ica wana mandé esake' sé niéma' i Amang Kasuruan sa ra'ica ampa'paan in Taar itu. 4En Taar itu palemboian ing katouan wo eng katouan itu si sendot en sumendot in até é tou. 5En sendot itu sumendot ing kariréimbengan, wo eng kariréimbengan ra'ica makawoo kumala in sendot itu.

6 # Mat. 3:1; Mrk. 1:4; Luk. 3:1-2 Asi sangando awéan esa tou si ayutus i Amang Kasuruan, e ngaranna Yohanes. 7Sia mai eng kumua andumoro' in sendot itu a sé im pakasa é tou wosama' lingan éra eng kasairianna wo mercaya in sendot itu. 8Ra'ica si Yohanes en sendot itu, taan sia mai musti méé ing kasairian a sé tou andumoro' in sendot itu. 9Wo en sendot si uli-ulit itu ang karoro'an i maai ang kayo'baan. Siituo en sendot si sumendot in até im pakasa é tou.

10Sia si patuulen sendot ang kayo'baano. Eng kayo'baan niéma' ampa'paan Sia, taan sé tou ang kayo'baan ra'ica makatuus Sia. 11Sia mai a sé tou-Na Yahudi taan Sia ra'ica tinerima éra. 12Taan sé tou tumerima wo mercaya ai Sia, séra wéan oka hak wosama' mamuali toya-toyaang i Amang Kasuruan. 13Séra mamuali toya-toyaang i Amang Kasuruan ra'ica ampa'paan é matu'a éra, kuma'pa im basa wo ing kasalé'an i tou. Taan si Amang Kasuruan in esa e méma' iséra mamuali toya-toyaang-Na.

14Wo en Taar itu mamualio tou wo Sia mento' an unerta. Wo sinérétao eng kawangko'-Na itu, si tinerima-Nao asi Amang owo ampa'paan Sia Toyaang-Na in Esa-esa. Ampa'paan en Taar si mamualio tou itu, kinailekantao andumoro' in upus aitambér i Amang Kasuruan wo in sususuien wutul-Na. 15Asi makasa, si Yohanes Mabaptis méé ing kasairian andumoro' si pakua in Taar itu. Icuana ang karapi in taangko' tana'i, “Si anioo Sia si sumangkumo aicuaku ai camu! Indior aicuaku, ‘Awéan oka e maai kekawus yaku. Sia en lébé iparangka' mai wo yaku, ampa'paan ra'ipé' itumou aku Sia awéano.’ ”

16Wo en upus-Na ra'io ka'i icakua. Wo ampa'paan in upus-Na itu akar kita ra'ica mento' makéré ing kamang si lumepe-lepet. 17Tinerimata en ukum-ukum i Amang Kasuruan ampa'paan i Musa, taan kinatuusanta en upus aitambér i Amang Kasuruan wo en sususuien wutul-Na ampa'paan si Yesus Kristus. 18Ra'ica wana tou en sumangkumo suméré si Amang Kasuruan, wayake' si Toyaang-Na Esa-esa. Sia meputé wo si Amang wo susut keli ai Sia. Siao en cumua ai cita andumoro' si séi si Amang Kasuruan itu.

Eng kasairian i Yohanes andumoro' in owakna in esa

(Mat. 3:1-12; Mrk. 1:1-8; Luk. 3:1-18)

19Si anioo eng kasairian i Yohanes an tutuw sé kikiiten é tou Yahudi an Yerusalem rumu'du' piraan imam wo tou Lewi mangé mamuéi in tana'i a si Yohanes, “Si séi réén ko?”

20Ang karapi in da'ica wana em ipaene-enep icua i Yohanes, “Ra'ica yaku si Mesias.”#1:20 Mesias eng kaangéanna Kolano Lumolowir

21 # Ul. 18:15, 18; Mal. 4:5 Wo wuéien éra ka'i ai sia, “Sa taniitu si séi réén ko? Ico réén si Elia?”#1:21 Si Elia itumou wona' asi ta'un 850 SM, piraan ngaatus ta'un ra'ipé' itumou si Yohanes Mabaptis. Si Elia niangkai angé i Amang Kasuruan an sorga ang karapi in séléndu'. (2Raj. 2:11). Sé tou Yahudi ang karoro'an imaento-ento' sia maai sumawel ang kayo'baan en tumu'tul si Kristus maai.

Isowat i Yohanes, “Ra'ica!”

Wuéien éra ka'i, “Ico réén si nabi si paento-ento'en ami si maai oka itu?”

Wo isowat i Yohanes, “Ra'ica!”

22Wuéien éra ka'i ai sia, “Sa taniitu em butulna si séi réén ko? Ampa'paan musti icua ami a sé kikiiten sé imutus icami. Sapa réén en icuamu andumoro' in owakmu in esa?”

23 # Yes. 40:3 Isowat i Yohanes, “Yakuo si tou si aicua i nabi Yesaya indior, awéan oka tou mengangko-ngangko' an tana' kapayasan, ‘Rondoren en lalan langkoian-Na!’ ”

24Asé tou sé airu'du' itu awéan piraan tou Farisi, 25séra imamuéi in tana'i ai sia, “Sa ko ra'ica si Mesias Kolano Lumolowir ami, ra'ica si nabi Elia wo ra'ica si nabi wangko' si maai oka itu, kéitu réén ko mengabaptis?”

26Isowat i Yohanes ai séra, “Baptisenku kamu in dano. Taan an uner iow am bia'i awéan Tou si ra'ipé' katuusan iow. 27Siao si maai kekawus yaku, taan Sia en lébé parangka' mai wo yaku akar muka'ke' in tali in sapatu-Na yaku ra'ica patus.”

28Em pepaaren itu imamuali am Betania an lewetico in doyongan Yordan, tampa i Yohanes mengabaptis sé tou.

Si Toyaang i Domba i Amang Kasuruan

29Asi woondona mai sérén i Yohanes si Yesus mai ai sia wo icuana a sé tou, “Sérén, si anioo si Toyaang i Domba i Amang Kasuruan si mai misi ing kamesé-meséaan é tou ang kayo'baan. 30Siao si sumangkumo aicuaku indior, sapaoka Sia si maai kekawus yaku, Siao en lébé iparangka' mai wo yaku ampa'paan ra'ipé' itumou aku, Sia awéanno. 31Yaku in esa ka'i indior ra'ipé' makatuus Sia tanu Mesias. Taan yaku mai am bia'i e maptis sé tou Israel ang karapi in dano wosama' séra ro'na makatuus si séi Sia.”

32Sisil ka'i i Yohanes sapa sé sinérénao in esa wo icuana, “Sinéréku e Roh i Amang Kasuruan tanuoka mombo tumumpa mai an langit owo wo tumeka' am bawo-Na. 33An tutuw itu ra'ipé' katuusanku Sia, taan si Amang Kasuruan si mutus yaku e mengabaptis sé tou ang karapi in dano, icumuao a yaku: ‘Sa sérénmu e Roh itu tumumpa mai an dangka' i esa Tou wo tumeka' am bawo-Na, Sia oka e mengabaptis sé tou ang karapi i Roh Le'nas’. 34Sinérékuo in esa, anaé yaku méé ing kasairian sapaoka Siao si Toyaang i Amang Kasuruan.”

Sé murit i Yesus kumataré-taré

35Asi woondona mai si Yohanes makatulung ka'i an tampa itu ang karapi é rua muritna. 36An tutuwna suméré si Yesus lumangkoi, icuana, “Sérén, Siao si Toyaang i Domba i Amang Kasuruan!”

37Sé rua murit i Yohanes sé luminga sapa en aicuana, wo séra mangé kumiit si Yesus. 38Wo si Yesus maréng in somoi, sérén-Na séra mawaya' makiit Sia. Wo wuéien-Na ai iséra, “Sapa réén em paéré-érén iow?”

Isowat éra, “Guru, am bisa réén em paento'an-Mu?”

39Icua i Yesus ai séra, “Mayoo wo sérén iow oka em paento'an-Ku.”

Wo séra mangé mewali-wali wo Sia en suméré am bisa em paento'an-Na. An tutuw itu wona' jam ampa im bawaando. Asi sangando itu séra mento' mewali-wali wo Sia.

40Esaan asé rua murit itu sé lumingao in aicua i Yohanes wo kumiit angé si Yesus, sia itu makangaran Andreas. Sia metuari wo si Simon Petrus. 41Wo si Andreas mangé meta'up wo si Simon tuarina, wo icuana ai sia, “Aipeta'upo ami si Mesias.” (Mesias meputé wo si Kristus, eng kaangéanna Kolano Lumolowir).

42Kekawus in itu si Simon iwali i Andreas a si Yesus. Wo téintengen i Yesus si Simon wo icua-Na ai sia, “Ico si Simon toyaang i Yohanes. Ico ngaranan-Ku oka ‘Kefas’. (Kefas puté wo i ‘Petrus’ eng kaangéanna, watu enté').”

Si Filipus wo si Natanael tinowa i Yesus

43Asi woondona mai si Yesus musé' e maangé an sangkum ing Galilea. Taan Sia mangé meta'up owo wo si Filipus, icua-Na ai sia, “Mayo kumiito mai Yaku.” 44Si Filipus tou ing kota Betsaida, si kota i Andreas wo si Petrus.

45Wo si Filipus mangé meta'up wo si Natanael, icuana ai sia, “Aipeta'upo ami Sia si aicua i Musa ang kitap Torat, wo si pakua é nabi. Siao si Yesus a Nazaret owo toyaang i Yusuf.”

46Taan isowat i Natanael, “Roong Nazaret? Awéan réén esa tou loor si mai an doong itu owo?” Isowat i Filipus, “Mayo sérénmu oka in esa.”

47An tutuw i Yesus suméré si Natanael maai ai Sia, icua i Yesus, “Sérén, siao si wutu-wutul tou Israel. Si tou anio' ra'ica mengauwak sé tou walina.”

48Wuéien i Natanael a si Yesus, “Tambisa réén Ko wo makatuus yaku?”

Isowat i Yesus ai sia, “Ra'ipé' tinowa i Filipus ko, tutuw ko an darem im panga-pangana in tuura in ara, sinéré-Kuo ko.”

49Icua i Natanael a si Yesus, “Guru, Ico Toyaang i Amang Kasuruan, Ico Kolano é tou Israel!”

50Isowat i Yesus, “Aicua-Kuo ai co sapaoka ko sinéré-Kuo an darem é panga-pangana in tuura in ara. Ampa'paano réén in itu wo ko maéman a Yaku? Sangkumen iow oka sé kamamualian si lébé wangko' mai wo siitu.”

51 # Kej. 28:12 Icua ka'i i Yesus, “En ulitna icua-Ku mangé ai camu, sérén iow oka en langit mawuka' wo sé malaékat i Amang Kasuruan sumosor wo meros maai a Yaku Toyaang i Tou.”

Currently Selected:

Yohanes 1: TNT

Highlight

Copy