Lukas 19

Si Zakheus tumerima si Yesus

1Icateka' mangé si Yesus ang kota Yerikho, Sia maya' melala'us lumangkoi ing kota itu. 2Ang kota itu awéan si esa tou kikiiten é matagi im pajak, sia ka'i tou siya' e ngaranna Zakheus. 3Sia rumaméji suméré tambisa si Yesus itu. Taan ra'ica kaséréanna si Yesus, ampa'paan keli asé tou wo en owakna ka'i kompéng. 4Wo sia tuméron rumior angé asé tou keli itu wo lumaput an tuura in ara wosama' ro'na kaséréanna si Yesus en lumangkoi am bitu.

5An tutuw i Yesus icateka'o an duru in tuura in ara itu, kanaten-Na mangé si Zakheus wo icua-Na, “Zakheus, morak tumumpao mai ko! Ampa'paan asi endo anio' Aku musti lumosér am balému.”

6Wo sia mario-rior tumumpa wo terimanna si Yesus ang karapi in arui en até. 7Taan pakasa é tou sé makaséré in itu mengimbu-ngimbulu. Icua éra, “Sia lumosér oka am balé i tou ang kamesé-meséaan!”

8An tutuw i Yesus am balé i Zakheus wo sia tumulung wo kumua a si Apo' Yesus, “Tuang! Sangaperua ing kasiyaanku, iwééku oka a sé tou lengéi. Wo si séike' mangé si sumangkumo niuwak wo niindoanku in doit, iwaréngku oka sumawel ai sia makaepat lumepet!”

9Wo icua i Yesus ai sia, “Asi endo anio', pakasa sé am balé anio' linowiro i Amang Kasuruan, ampa'paan ko wutu-wutul maéman a si Amang Kasuruan meputé si apo'mu Abraham. 10Ampa'paan si Toyaang i Tou mai e mangéré sé tou itumayango asi Amang Kasuruan wo lumowir iséra an ukuman ing kamesé-meséaan.”

En andéan andumoro' in doit mina

(Mat. 25:14-30)

11Ang karoro'an é tou keli malingapé' si Yesus maroma' wo lala'us-Na ka'i in sumisil esa andéan, ampa'paan Sia matawio an Yerusalem wo pawasan ka'i é tou itu, sapaoka Sia makala'- uso merénta tanu Kolano ai séra. 12Icua i Yesus, “Awéan esa tou wangko' wo pasiri-siriin, mangé an esa roong wangker wo tayang en lantiken mamuali kolano. Pakalantikenai, sia maréng sumawel an doongna. 13An tutuwna ra'ipé' mangé, towanna owo sé sangapulu' atana wo wéanna makélé esa mina.#19:13 Em bééna in esa mina kaputé in ‘sangaatus dinar’. En sangaatus dinar itu meputé wo im pate'tek si tou tumawoi sangaatus ngando. Wo icuana ai séra, ‘Pakéno en doit anio' e mangkér akar aku maréngai sumawel.’

14Taan sé tou an doongna itu masuut isia. Anaé, an tutuw sia imangém wo iru'du' éra tou mangé an doong wangker wo tayang itu, eng kumua tana'i, ‘Ra'ica kiim ami si tou itu mamuali kolano ami.’

15Taan si tou itu kasake' in linantik mamuali kolano. Wo sia maréng sumawel an doongna wo towanna sé ata sé winéanna roit mina, ampa'paan casalé'na kakailekanna pira eng kauntungan kinéréan éra asi esa wo si esa.

16Si ata kataré mai wo kumua ai sia, ‘Tuang, si esa mina aiwéému a yaku itu, intarépé' imamualio sangapulu' mina.’

17Wo icua i tuang itu a si ata itu, ‘Wutu-wutul loor e niéma'mu itu. Ico ata loor wo le'tek. Ampa'paan ko ro'na tinokéan in tawoien teké', anaé wéanku ko kawasa e merénta sangapulu' kota.’

18Mai ka'i si ata karua wo kumua, ‘Tuang, si esa mina aiwéému a yaku itu, intarépé' imamualio lima mina.’

19Wo icua i tuang itu a si ata itu, ‘Sa taniitu wéanku ko kawasa e merénta lima kota.’

20Mai ka'i si ata walina wo kumua, ‘Tuang, nio' en doit mina i tuang, sinaputku in lénso wo ayéma'ku sumama-sama'. 21Icaindé'ku si tuang ampa'paan si tuang tou bengis. Si tuang mengaindo sapa si ra'ica anu i tuang wo mengaupu' si ra'ica ayusew i tuang.’

22Wo icua i tuangna a si ata itu, ‘Éi ata léwo'! Akimenku ko iciit in aicuamu in esa. Kailekanmuo em periku keté, mengaindo si ra'ica anuku wo mengaupu' si ra'ica ayusewku.’ 23Sa taniitu kéitu réén en doitku itu ra'ica ayéma'mu am bank, wosama' an tutuwku maréngai sumawel, terimanku oka en doit itu ang karapio i rénténa?

24Wo icua i tuang itu a sé tou makatulung am bitu, ‘Indono e mina itu ai sia wo iwééo mio' a si ata si makaanu in sangapulu' mina.’

25Taan icua é tou itu, ‘Tuang, sia makaanuo sangapulu' mina.’

26 # Mat. 13:12; Mrk. 4:25; Luk. 8:18 Isowat i tuang itu, ‘Wutu-wutul icuaku ai camu: Sé tou ro'na pengatokéan in sapake' mangé, séra wéan oka lébé keli mai. Taan sé tou ra'ica toro patokéan in sapake' mangé, sapa ka'i sé ai séra pakaindo-indon oka. 27Wo intarépé', pakasa sé kaséké'ku itu sé ra'ica masalé' yaku mamuali kolano éra, iwali mai wo patén an diorku!’ ”

Si Yesus sinungkul in arui wo iparayo-rayo an Yerusalem

(Mat. 21:1-11; Mrk. 11:1-11; Yoh. 12:12-19)

28Kekawus i Yesus sumisil in andéan itu, Sia lumala'us im bawayaan maangé an Yerusalem. Sia maya' rumior asé murit-Na. 29An tutuw matawio im Betfage wo im Betania sé roong an Tolaina si makangaran Zaitun, si Yesus rumu'du' sé rua murit-Na. 30Icua-Na ai séra, “Mangém kamu asi roong an dior itu. An tutuw iow muntep am bitu, kaséréan iow oka esa keledai wo'bas ipakawa'kes si ra'ipé' sumangkum ako pinaké. Wukaano mio' en talina wo paalinai. 31Wo sa awéan tou mamuéi, ‘Kéitu réén pawukaan iow en tali i celedai itu?’, sowateno mio' in tana'i, ‘Paperlun i Tuang ami.’ ”

32Wo sé rua murit itu mangé wo pakasa sé ipeta'up éra meputé wutul wo en aicua i Yesus. 33An tutuw éra mawuka' in tali i celedai itu wo icua é tou sé makakeledai itu: “Kéitu réén wekar iow si celedai itu?”

34Icua éra, ‘Paperlun i Guru.’ 35Paalin éra mai si celedai wo'bas itu a si Yesus, wo ya'li' éra eng karai éra an licur i celedai itu. Wo atasan éra si Yesus sumaké am bawo i celedai itu. 36Ang karoro'an i Yesus malangkoi makasaké asi celedai itu, sé tou keli maa'li' ing karai éra an lalan. 37An tutuw Sia matawio in Yerusalem, an lalan maperos in Tolaina in Zaitun, pakasa é tou sé makiit Sia tumo'tolo maaru-arui wo marayo-rayo si Amang Kasuruan in suara taangko' ampa'paan pakasa eng kakaya'kaan sé sinéréo éra. 38#Mzm. 118:26 Icua éra,

“Rayoo Sia si mai tanu Kolano si mai ang karapi i ngaran i Amang Kasuruan!

Kita pineeluro wo si Amang Kasuruan si an sorga

wo rayoo wo siriino Sia asi tampa Rumangka-rangka'!”

39Piraan tou Farisi sé mewali-wali wo sé tou keli itu kumua a si Yesus, “Guru, romaanio' sé makii-kiit si Guru wosama' séra menes.”

40Isowat i Yesus, “Icuaku ai camu, sa séra menes, sé watu anio' oka e mangko' rumayo Yaku.”

Si Yesus maamé' an tutuw suméré ing kota Yerusalem

41An tutuw i Yesus makatawio in Yerusalem wo sérén-Na eng kota itu wo amé'an-Na. 42Icua-Na: “Oré wéta' ko é kota Yerusalem! Lébé loor woo sa asi endo anio' kamu sé maento' am bitu makailek tumambisa meeluran wo si Amang Kasuruan. Taan intarépé' pakasa en itu ra'ica kailekan iow! 43Taan maai oka en endona, ko li'ciren oka ing kakala' é kaséké'mu, yémbong éra oka wo am bisa-wisake' mai serangen éra. 44Wo ko é kota Yerusalem pakatongka-tongkaren oka wo sé tou ang kotamu pakapaté-patén oka. Wo ra'io iwaya éra esa watu e meliunsunan am bawo im batu walina. En itu si mamuali oka, ampa'paan ra'ica kailekanmu sapaoka intarépé' si Amang Kasuruan imayo lumowir ico.”#19:44 “Si Amang Kasuruan imayo lumowir sé tou-Na”, tumuru' a si Yesus an tutuw Sia mai ang kayo'baan en lumowir sé tou. Taan Sia aicélong é tou an Yerusalem.

Si Yesus musér sé tou mawangkér am Balé Le'nas

(Mat. 21:1-17; Mrk. 11:15-19; Yoh. 2:13-22)

45Wo si Yesus muntep am Balé Le'nas. Wo tumo'tolo yusér-Na sé tou mawangkér am bitu. 46#Yes. 56:7; Yer. 7:11 Icua-Na ai séra: “Ang Kitap Le'nas aipatic in tana'i, ‘Em balé-Ku walé pengasombayangan.’ Taan niéma'o miow tampa mengauwak sé tou.”

47 # Luk. 21:37 Susur in endo si Yesus masusui am Balé Le'nas. Sé kikiiten é imam é tou Yahudi wo sé makailek wutul in Torat wo sé tou pasiri-siriin é tou Yahudi rumaméji maté Sia. 48Taan ra'ica kailekan éra tumambisa e maté si Yesus, ampa'paan pakasa en tou masalé' mengalinga in sususuien-Na.

Currently Selected:

Lukas 19: TNT

Highlight

Copy