Lukas 20

Em buwuéien andumoro' ing kawasa i Yesus

(Mat. 21:23-27; Mrk. 11:27-33)

1Asi sangando, an tutuw i Yesus masusui a sé tou keli wo makua in Abar Kaaruien am Balé Le'nas, wo mai am bitu sé kikiiten é imam, sé makailek wutul in Torat wo sé matu'a é tou Yahudi. 2Icua éra, “Icua mai ai cami, maké réén ing kawasa sapa akar ro'na émaan-Mu waya en itu? Wo si séi réén e iméé ing kawasa itu ai Co?”

3Isowat i Yesus ai séra, “Yaku ka'i méé oka esa wuwuéien ai camu. Icua mai a Yaku, 4an tutuw si Yohanes Mabaptis maptis sé tou, imaké ing kawasa i séi réén, asi Amang Kasuruan kuma'pa asé tou owo?”

5Wo séra mengkuanan a si esa wo si esa, “Sa icuata imaké ing kawasa asi Amang Kasuruan owo, tantu icua-Na oka, ‘Sa taniitu kéitu réén sia ra'ica percayan iow?’ 6Taan sa icuata asé tou owo, tantu kita wangkilen é tou im batu, ampa'paan percayan éra sapaoka si Yohanes itu esa nabi.”

7Wo isowat éra a si Yesus, “Ra'ica kailekan ami kawasa i séi owo em pinaké i Yohanes an tutuw mengabaptis sé tou.”

8Wo icua i Yesus ai séra, “Sa taniitu, ra'ica icua-Ku ka'i ai camu asi séi owo eng kawasa a Yaku akar émaan-Ku waya en itu.”

En andéan andumoro' é tou matawoi an uma in anggor

(Mat. 21:33-46; Mrk. 12:1-12)

9 # Yes. 5:1 Kekawus in itu sisil i Yesus en andéan anio' a sé tou keli: “Awéan esa tou muka' in uma en usewanna in anggor. Wo iséwana en uma itu a sé tou matawoi in uma. Wo sia mangé an doong walina wo uré-uréan toyo' mento' a mangé mbitu. 10An tutuw in orasnao imupu' in anggor, iru'du'na si esa ata mangé a sé tou matawoi in umana e mangilek im bagéanna am buéna in anggor itu. Taan si ata itu pinangkurke' é tou matawoi in uma wo iru'du' éra maréng ra'ica maali sapa-sapa. 11Kumawus in itu iru'du'na ka'i mangé esa ata walina. Taan si ata itu ka'i pinangkur érake' wo ipapalawi' éra wo iru'du' éra maréng ra'ica imaali sapa-sapa. 12Wo iru'du'na ka'i mangé si ata katelu. Taan si ata itu ka'i pinangkur éra akar i mapéla' wo iwangkil éra ang kesot in uma itu.

13Wo icua i makauma itu an untep in aténa, ‘Sapapé' e musti émaanku? Aweso taré iru'du'ku si toyaangku si paupu-upusku, tantu sia siriin éra oka.’

14Taan an tutuw si toyaang i makauma itu sérén é tou matawoi in uma itu wo séra mengkuanan asi esa wo sé walina, ‘Siao e makaanu in uma anio' sa. Mayoo paténta sia, wo en uma anio' mamuali oka anuta.’ 15Wo iwangkil éra sia ang kesot in uma in anggor itu wo patén éra.

Intarépé', sapa en émaan i makauma in anggor itu ai séra? 16Sia maai oka wo paténna sé tou matawoi in umana itu wo en umana itu ipapatawoina a sé tou walina.”

Kelinga éra in itu wo icua é tou keli itu a si Yesus, “En itu tioo mamuali ai cami!”

17 # Mzm. 118:22 Taan téintengen-Na sé tou keli itu wo icua-Na, “En itu musti mamuali, ampa'paan siituo eng kaangéan i nats si aipatic ang Kitap Le'nas tana'i:

‘Watu aitiya' é bas,

imamualio watu patuuran.’

18Si séike' en lumepok asi watu itu, sia mamu'muk oka wo si séi e rongkoran im batu itu, sia makamu'mu-mu'muk oka tanu in awu.”

19Kelinga in andéan aicua i Yesus, kailekano é makailek wutul in Torat wo sé kikiiten é imam sapaoka en andéan itu tumuru' iséra. Ampa'paan in ituo asi témpo ituke' raméjin éra in tumangka' Sia, taan caindé' éra sé tou keli.

En andumoro' i mawér im pajak a si Kaisar

(Mat. 22:15-22; Mrk. 12:13-17)

20Wo si Yesus peméa-méan rékén é makailek wutul in Torat wo sé kikiiten é imam. Wo iru'du' éra mangé tou e mawere-weren si Yesus wo séra mapa in loor kéndo'. Sé tou itu mamuéi a si Yesus maké im buwuéien tanu kéndo' awéan si masalé' kailekan éra wosama' ro'na ta'kongen éra Sia. Wo sa Sia suméa' sumowat, isarakan éra oka Sia a si gubernur Romawi si makakawasa an sangkum itu en ukumen im patén. 21Icua é tou itu a si Yesus in tana'i, “Guru, kailekan ami pakasa sé aicua wo sé aisusui-Mu itu wutul wo si Guru ra'ica masisir tou em pasiriin, wo ka'i si Guru masusui ang karapi i makakii-kiit andumoro' ing kasalé'an i Amang Kasuruan. 22Anaé, wuiéien ami a si Guru, sa kumiit in atoran in agamata Yahudi, ro'na réén kami mér im pajak a si Kaisar kuma'pa ra'ica?”

23Taan kailekan i Yesus em basa éra léwo'. Ampa'paan in ituo icua-Na ai séra in tana'i, 24“Ituru' mai a Yaku esa dinar! Gambar wo ngaran i séi asi roit anio'?”

Isowat éra, “Gambar wo ngaran i Kaisar.”

25Wo icua i Yesus ai séra, “Sa taniitu iwééo mangé a si Kaisar sapa si musti iwéé miow a si Kaisar wo iwééo mangé a si Amang Kasuruan sapa si musti iwéé miow a si Amang Kasuruan.”

26Anaé, Sia ra'ica kinata'kongan é tou mawere-weren itu an tutuw Sia sumowat séra an dior é tou keli itu. Taan taré séra mangaya-ngaya'ka' luminga in aisowat-Na akar séra makapenes oka.

Em buwuéien andumoro' é tou imatéo itumou sumawel

(Mat. 22:23-33; Mrk. 12:18-27)

27 # Kis. 23:8 Kekawus in itu, piraan tou Saduki mai a si Yesus. Ra'ica pangakun éra sa sé tou imatéo touen oka sumawel. Wuéien éra a si Yesus, 28#Ul. 25:5 “Guru, aipatic i Musa en atoran anio' ai cita tou Yahudi, tana'i: Sa si esa tuama icumawéngo wo sia maté wo si wewéné kinawéngna menonoué' taan ra'ica imakéré toyaang, si wéwéné balu itu musti kawéngen i tuama metuari wo si tuama imatéo itu, wosama' si tuama imatéo itu ro'na imakéré taranak. 29Awéan pitu tuama metuari, si luluna kumawéng wo si esa wéwéné wo si tuama itu maté taan ra'ica imakéré toyaang. 30Kumawus in itu si wéwéné itu kawéngen ka'i i tuama karua, 31wo si tuama katelu, taniitu e imamuali akar a si tuama kapitu. Wo séra im baya maté taan ra'ica makéré toyaang. 32Sumiwakio', si wéwéné itu ka'i maté. 33Anaé, tambisa wo si wéwéné itu asi endo i Amang Kasuruan tumou sumawel sé tou imatéo. Si séi réén asé pitu tou itu e mamuali penanaan i wéwéné itu? Ampa'paan séra im pitu imenana'o sia.”

34Isowat i Yesus ai séra, “Sé tou menonou ang kayo'baan anio' kumawéng wo kawéngen. 35Taan sé tou tinou sumawel i Amang Kasuruan wo nianggap patus makéré im bagéan ang kayo'baan weru, séra ra'io kumawéng wo kawéngen. 36Ampa'paan séra ra'io kawisa maté kaputé é malaékat sé ra'ica maté. Wo sé tou itu toya-toyaang i Amang Kasuruan ampa'paan séra tinou-Nao sumawel am papaté. 37#Kel. 3:6 Wo aicuao ka'i i Musa andumoro' sé tou imatéo touen oka sumawel. Aipaticna en itu an sisilen andumoro' in dukut tutunéan mengembu-ngembung, aicuana sapaoka si Amang Kasuruan kumua in tana'i, ‘Yakuo si Amang Kasuruan i Abraham, Ishak wo si Yakub.’ 38Si Abraham, Ishak wo si Yakub imatéo, taan kailekan i Amang Kasuruan sapaoka séra touen oka sumawel. Anaé, si Amang Kasuruan itu ra'ica Amang Kasuruan é tou imaté, taan Amang Kasuruan é tou menonou. Ampa'paan an dior i Amang Kasuruan pakasa e roh é tou menonou, mandé ka'i en owak éra imatéo.”

39An tutuw luminga in aisowat i Yesus wo icua é piraan tou sé makailek wutul in Torat, “Guru, en aisowat-Mu itu wutul!” 40Ampa'paano in itu ra'io wana ai séra em brani mamuéi in sapake' mangé a si Yesus.

En ubungan i Kristus wo si Daud

(Mat. 22:41-46; Mrk. 12:35-37)

41Wo icua i Yesus ai séra, “Ipakua é tou sapaoka si Kristus itu taranak i Daud owo. Taan wutul réén Sia taranakke' i Daud? 42#Mzm. 110:1 Ampa'paan sia in esa imatico ang kitap Mazmur andumoro' i Kristus tana'i,

‘Si Amang Kasuruan icumuao a si Tuangku tana'i:

Lumukuto mai asi tampa pasiri-siriin ang kakan-Ku

43akar sé kaséké'-Mu iweta'-Ku am palara ing kécéi-Mu.’

44Anaé, sa si Daud in esa mengatuul si Kristus itu Tuangna, tambisa réén wo icuata Sia itu taranakna ka'i?”

Icua i Yesus wosama' mareti-reti a sé tou makailek wutul in Torat

(Mat. 23:1-36; Mrk. 12:38-40)

45Ang karoro'an é tou keli makalinga si Yesus maroma' wo icua-Na a sé murit-Na, 46#Luk. 11:43 “Mareti-retio mangé kamu a sé makailek wutul in Torat, sé masalé' mawaya-waya' mepaké in juba wo masalé' pengasiriin ang kakelian in tou tanumai am pasar. Wo masalé' ka'i mengalukut an tampa pasiri-siriin am balé paapo'an é agama Yahudi wo am pésta-pésta. 47Wo ka'i mengauwak sé wéwéné balu e maandét im balé éra. Wo mengaakal ka'i sé tou mengasombayang in lalambotan wosama' paanggapen é tou loor. Séra itu tantu makéré oka in ukuman si uter keli.”

Currently Selected:

Lukas 20: TNT

Highlight

Copy