Lukas 14

Si Yesus sumama' tou an endo Sabat

1Asi makasa tumena in endo Sabat, si Yesus mai am balé i esa kikiiten é tou Farisi eng kuman am bitu. Pakasa sé tou am bitu meméé-méé rékén ai Sia sa sapa en émaan-Na. 2Asi témpo ituke', tumulungai an dior i Yesus si esa tou sumakit, eng kama wo eng kécéina sumega. 3Wo wuéien i Yesus a sé makailek wutul in Torat wo sé tou Farisi am bitu, “Sa kumiit in ukum agamata, ro'na kuma'pa ra'ica en sumama' in tou asi endo Sabat?”

4Séra im baya makapeneske'. Wo timboian i Yesus eng kama i tou sumakit itu wo samaan-Na wo iru'du'-Na sia maréng. 5#Mat. 12:11 Wo icua ka'i i Yesus ai séra, “Sa woo awéan esaan ai camu makatoyaang kuma'pa makasapi wo capumpun am parigi tumena wutul asi endo Sabat, ra'ica réén mangé cesot iow si toyaang kuma'pa si sapi itu asi témpo ituke'?”

6Taan ra'ica wana esaan ai séra makawoo sumowat a si Yesus andumoro' in itu.

Si Yesus sumusui sé tou wosama' ko'kos en até

7Wo si Yesus meméé-méé rékén a sé sakéi sé nienot, masisirke' im palukutan pasiri-siriin an dior, ampa'paano in itu icua-Na esa sususuien anio' ai séra, 8#Ams. 25:6-7 “Sa kamu enoten é tou mangé am pésta kawéng, tioo kamu mangé lumukut an dior. Ampa'paan awéan wona' si tou en lébé pasiri-siriin wo icamu si nienot ka'i i makawalé. 9Sa si makawalé si menot ico wo si tou pasiri-siriin itu mai ai co, iru'du'na oka ko tumulung ampa'paan em palukutan itu aitu'tulo a si tou pasiri-siriin itu. Wo ang karapi in lawi' ko méra wo mangé lumukut an somoi. 10Anaé, sa kamu enoten, mangé taré sumisir im palukutan an somoi. Wosama' sa si tou imenot itu mai, wona' icuana ai co, ‘É karapi, mayoo mangé lumukut an dior.’ Wo in taniitu kamu siriin oka an dior é sakéi walina. 11#Mat. 23:12; Luk. 18:14 Ampa'paan, si séike' mengarangka' in owak, sia iwawa' oka wo si séike' e mengawawa' in owakna, sia iparangka-rangka' oka.”

12Wo icua i Yesus ka'i a si tou imenot Sia, “Kawisa mangé, sa ko méma' im pésta endo kuma'pa wengi, tioo ko menot sé kara-karapimu, sé katuarimu, sé poo-poowmu, kuma'pa sé katana'mu siya'. Ampa'paan kawisa mangé enoten éra oka ko wo in taniitu suliin éra oka ai co sapa si niéma'mu. 13Anaé, sa ko méma' im pésta kuman wo melep, enoteno mangé sé tou lengéi, sé tou ra'ica lekep en owak, sé tou késo' wo sé tou wola. 14Pakakamangen oka ko, ampa'paan séra ra'ica wana sapa-sapa en suli' ing kalooranmu. Suliin oka i Amang Kasuruan eng kalooranmu itu an tutuw touen-Na sumawel sé tou wutu-wutul maéman wo le'tek ai Sia.”

En andéan andumoro' im pésta wangko' an sorga

(Mat. 22:1-10)

15An tutuw éra luminga en aicua i Yesus, esaan a sé tou icuman mewali-wali wo si Yesus kumua ai Sia, “Pakakamangen si tou icuman an tampa i Amang Kasuruan kumawasa tanu Kolano sa.”

16Taan icua ka'i i Yesus a si tou itu maké in andéan, “Asi makasa awéan esa tou méma' im pésta wangko' wo sia menot keli en tou. 17An tutuw em pésta itu tumo'tolo, iru'du'na sé atana mangé kumua a sé tou nienotna tana'i, ‘Mayoo ampa'paan pakasa tu'tulo.’ 18Taan pakasa sé tou nienot, esa wo si esa icumélongke'. Si cataré kumua, ‘Mekiampung aku ra'ica maangé ampa'paan aku makatelesé' uma weru, anaé mangékupé' sérén en uma itu.’ 19Sé walina icumua, ‘Mekiampung aku ra'ica maangé, ampa'paan aku makatelesé' lima par sapi, anaé mangékupé' yepé' itawoi sé sapi itu.’ 20Wo sé walina icumua ka'i, ‘Makakawéngé' aku, anaé aku ra'ica icaangé.’

21Wo si ata itu maréng angé sumawel wo icuana waya en itu a si tuang si méma' im pésta. Wo si tuang itu mae'bow keli wo icuana a si atana, ‘Mario-rioro mangé an lala-lalan wangko' wo an lala-lalan pesut ang kota wo iwali mai sé tou lengéi, sé tou ra'ica lekep en owak, sé tou wola wo sé tou késo'.’ 22Wo si ata itu mangé, émaanna tanu si airu'du' i tuangna. Kumawus in itu si ata itu mai a si tuang itu, icuana, ‘Pakasa sé airu'du' i tuang niéma'kuo, taan keliané' em palukutan ra'ipé' linukutan.’

23Wo icua i tuang itu a si atana, ‘Mangém an lala-lalan wangko' wo an lala-lalan pesut ang kesot ing kota wo leséénai waya sé tou am bitu wosama' em palukutan mawuta.’ 24Icua i tuang itu, ‘Ra'- ica wana mandé esake' tou sé nienotku kataré e mepé' ing kakanen si aitu'tulkuo am pésta anio'.’ ”

Si Yesus kumua tumambisa mamuali murit-Na

(Mat. 10:37-38)

25Asi makasa, keli en tou mawaya' makiit si Yesus. Wo Sia maréng in somoi wo kumua, 26#Mat. 10:37-38, 16:24; Mrk. 8:34; Luk. 9:23 “Sa si esa tou uli-ulit kumiit Yaku, sia musti uli-ulit maupus Yaku lumébémai ing kaupusanna a si amangna wo si inangna, a si penanaan i tuama, a sé toyaangna, a sé poo-poowna wéwéné kuma'pa tuama wo ka'i lumébémai ing kaupusanna an owakna in esa. Sa sia ra'ica mengaupus Yaku tanu siitu, sia ra'ica toro mamuali murit-Ku. 27Si séike' si ra'ica muléng in salipna in esa wo ra'ica kumiit Yaku, sia ra'ica toro mamuali murit-Ku.

28Sa awéan esaan angé ai camu tumoor esa wangunan rangka', sapa eng kataré-taré émaanna? Tantu sia lumukut owo rumékén pira eng kakeli in doit pakén tumoor im bangunan itu. Wo in taniitu ro'na kakailekanna sa en doit itu ro'nao pakén en tumoor im bangunan itu akar i malekep. 29Ampa'paan sa em batu pandasi aituliro wo em bangunan itu ra'ica kalekepan, pakasa en tou suméré in itu suméro' sia. 30Wo sé tou isuméré in itu kumua, ‘Si tou itu tumoor im bangunan taan ra'ica kinalekepanna.’

31Kuma'pa tanu si andéan anio': Awéan esa kolano makasuraro sangapulu' ngariwu tou wo mangé mensunduran wo si colano walina makasuraro rua ngapulu' ngariwu tou. Tantu si colano makasuraro sangapulu' ngariwu tou itu, musti lumukut merot sumama-sama' makawoo kuma'pa ra'ica en sumundur si colano makasuraro rua ngapulu' ngariwu tou itu. 32Sa kailekanna sapaoka sia ra'ica makawoo sumundur, tantu an tutuw tayangé' si colano makasuraro rua ngapulu' ngariwu tou itu, si colano makasuraro sangapulu' ngariwu tou itu rumu'du' owo si touna mangé meta'up wo si colano itu e mamuéi tumambisa meeluran wo iséra.” 33Wo icua i Yesus, “Taniitu ka'i kamu, sa kamu masalé' mamuali murit-Ku, weroten owo sumama-sama', sa kamu makawoo tumela'u ing kasiyaan iow kuma'pa ra'ica. Sa kamu ra'ica makawoo, tioo mamuali murit-Ku.”

Sé tou kumiit si Yesus ayandé tanu in asin keli eng katoronaanna

(Mat. 5:13; Mrk. 9:50)

34 # Mat. 5:13; Mrk. 9:50 “En asin itu mémang loor, taan sa en asin itu imata'pé'o, tumambisa en itu asinen sumawel? 35En itu ra'io wana ka'i torona, mandé mangé wuras an uma, kuma'pa émaan ipasowor in tinanem. Ampa'paan en itu, itiya' oka é tou. Si séi si makalunteng, lumingao mai sumama-sama'!”

Currently Selected:

Lukas 14: TNT

Highlight

Copy