Lukas 15

En andéan andumoro' i domba si aicatala

(Mat. 18:12-14)

1 # Luk. 5:29-30 Kelian sé matagi im pajak wo sé tou ang kamesé-meséaan mai a si Yesus en luminga Sia. 2Wo sé tou Farisi wo sé makailek wutul in Torat tumo'tolo mengimbu-ngimbulu. Icua éra, “Si Tou anio' tumerima sé tou iméma ing kamesé-meséaan wo kuman mewali-wali wo iséra.”

3Ampa'paano in itu, isisil i Yesus en andéan anio' ai séra: 4“Sa esaan ai camu makadomba sangaatus wo katalaan esa, sapa en émaanna sa? Tantu itela'una sé siow ngapulu' siow domba itu an tana' rerukutan wo mangé mangéré si esa domba si aicatala itu. 5Wo sa si domba itu kinéréannao, ang karapi in arui wuléngenna sia wo uwitenna mangé am balé. 6An tutuw icateka'o am balé, towanna sé kara-karapina wo sé katana'na wo icuana ai séra, ‘Mayoo maaru-arui ang karapiku ampa'paan si dombaku icatala kinéréankuo.’ 7Icua-Ku ai camu, taniitu ka'i pakasa sé a mangé en sorga séra maaru-arui oka sa awéan esa tou ang kamesé-meséaan mape'dis. Séra lébé arui ampa'paano i esa tou si mape'diso itu, wotaré sé siow ngapulu' siow tou sé mengaéma'o im butul sé ra'io sangali mape'dis.”

En andéan andumoro' in doit pérak icatala

8“Awéan esa wéwéné makaanu sangapulu' roit pérak. Wo sia kinatalaan esa. Sapa en émaanna? Tantu sia méngkét in sosoloan, ka'isanna em balé wo érénna sumama-sama' en doit itu akar ing kéréan. 9An tutuw en doit itu kinéréannao, towanna sé kara-karapina wo sé katana'na wo icuana, ‘Mayoo maaru-arui ang karapiku, ampa'paan en doit pérakku si catala kinéréankuo.’ 10Icua-Ku ai camu, tanu siitu ka'i sé malaékat i Amang Kasuruan an sorga séra ka'i maaru-arui oka sa awéan esa tou mape'dis ang kamesé-meséaan.”

En andéan andumoro' i toyaang si aicatala

11Sisil ka'i i Yesus esa andéan, “Awéan esa amang makatoyaang, rua tuama. 12Asi makasa, si toyaang ka'karan kumua a si amangna, ‘Amang, iwééo mai a yaku asi endo anio', si mamuali bagéanku asi kasiyaanta.’ Wo iwéténg i amang itu eng kasiyaan éra a sé rua toyaangna. 13Asaloke' maya' im piraan ngando wo iwangkér waya i toyaang ka'karan em bagéanna itu wo sia mangé an esa roong tumaya-tayang. A mangé mbitu sia menonou asaloke' makiit ing kasalé'anna sé ra'ica loor wo menga'pu-nga'puke' in doit. 14An tutuw en doitna imaka'puo waya, wo pakasa sé roong an sangkum itu tinenao ing kaareman wangko', akar si toyaang ka'karan anio' tumo'tolo mawendu. 15Wo sia mangé tumawoi a si esa tou an doong itu. Wo sia iru'du' i tou itu mangé an uma en tuméir sé wawina. 16Sia maaremo keli, akar casalé'nao woo kuman ing kakanen é wawi itu. Mandé ka'i sia maaremo keli, ra'ica wana mandé esake' tou e méé ing kakanen ai sia.

17Wo sia manesel in owak wo memero-merot waya sé niéma'nao wo kumua, ‘Am balé i amangku pakasa sé atana kumeli-keli eng kakanen, taan am bia'i aku tawio maté in arem.’ 18Aweso taré aku tumu'tulo wo maréngo mangé a si amangku wo icuaku oka ai sia, ‘Amang yaku méma'o ing kamesé-meséaan a si Amang Kasuruan wo a si amang. 19Ra'io patus ka'i aku patuulen toyaang i amang. Émaano mai aku esaan tou matawoi a si amang.’

20Wo sia tumu'tul wo maréng angé a si amangna. Tayangé' im balé, sia kinaséréano i amangna. Wo mai eng kaupusan i amangna wo sia tuméron angé sumungkul si toyaangna itu, ke'kep- enna wo ciomenna.

21Wo si toyaang itu kumua a si amangna, ‘Amang, aku méma'o ing kamesé-meséaan a si Amang Kasuruan wo a si amang. Ra'io patus aku patuulen toyaang i amang.’

22Taan si amangna itu asalo tumowa sé atana wo icuana, ‘Mario-rior, paalinai eng karai si lumoo-loor wo pakéo mio' ai sia. Wo ka'i pakéano mio' cincin am bua'na ing kamana wo sapatu ang kécéina. 23Kumawus in itu sisiro mio' sapi wo'bas kemel, pokoleno, siwon wo mayoo kuman wo masalé-salé'. 24Ampa'paan si toyaangku anio' imatéo taan itumouo sumawel. Wo ka'i sia icatalao taan kinéréano sumawel.’ Wo tumo'tolo séra maaru- arui.

25Asi témpo itu si toyaang luluna an umapé'. An tutuw sia mawaréngo wo matawio im balé, kalingaanna en suara musik wo kakantaren maéngké. 26Kumawus in itu towanna esaan asé ata itu wo mamuéi ai sia, ‘Sapa réén e mamuali am baléku?’

27Isowat i ata itu, ‘Si tuarimu maréngo mai sumawel wo si amangmu rumu'du' mokol sapi wo'bas kemel, ampa'paan kinéréannao si toyaangna ang karapi in owak sama'.’

28Kelinga in itu, si toyaang luluna anio' mae'bow akar sia ra'- ica kiim muntep am balé. Wo si amangna kumesot, lepéienna sia wosama' muntep.

29Taan sinowatnake' taré si amangna, ‘Ta'uno aku mawendu-wendu matawoi wo maselewir a si amang wo ra'ipé' kawisa aku kumélong im perénta i amang, sapao en aiwéé i amang a yaku? Mandé esake' mémbé' teké', ra'ipé' kawisa iwéé i amang a yaku e méma' ing kasalé-salé'an wo sé kara-karapiku! 30Si toyaang i amang itu kuma'puo ing kasiyaan i amang ang karapi é wéwéné sundal. Taan an tutuw sia maréngai, si amang mokol sapi wo'bas kemel iwéé ai sia!’

31Wo isowat i amangna, ‘Toyaangku, ico tatap mewali-wali wo yaku am bia'i. Pakasa eng kasiyaanku, kasiyaanmu ka'i. 32Anaé, intarépé', kita musti masalé-salé' wo maaru-arui, ampa'paan si tuarimu itu imatéo taan intarépé' itumouo sumawel, sia aicatalao taan intarépé' kinéréano.’ ”

Currently Selected:

Lukas 15: TNT

Highlight

Copy