Yohanes 5

Sinama' i Yesus si esa tou késo' ang kolam Betesda

1Kumawus in itu, si Yesus mangé an Yerusalem, ampa'paan en endo wangko' é tou Yahudi ra'io ka'i uré. 2An Yerusalem awéan esa kolam a nunuwu' é Ibrani patuulen ‘Betesda’. Eng kolam itu an diit im papalen wangko' ang kota si ningaranan ‘Papalen Domba’. An li'cir ing kolam itu awéan lima lésar sé niatepan. 3An lésar itu keli tou sumakit makawé'kél, awéan sé wola, sé kénto' wo sé késo'. Séra mengento-ento' in dano méro' ang kolam itu. 4Ampa'paan awéan en témpona sé malaékat i Amang Kasuruan tumumpa mai ang kolam itu wo en dano yéro' éra, wo si séike' mangé eng kumataré-taré muntep ang kolam itu an tutuw en dano maéro', sapake' en sakitna masama' oka.

5Am bitu, awéan si esa tuama en sakitna teluo ngapulu' walu ngata'un eng kauré. 6Sérén i Yesus si tou itu makawé'kél am bitu, wo kailekan-Na en sakit i tou itu uréo keli wo icua i Yesus a si tou itu, “Masalé' réén ko masama'?”

7Isowat i tou sumakit itu, “Én é Tuang, taan ra'ica wana tou am bia'i en tumumpa yaku ang kolam an tutuw en dano maéro'. Wo an tutuwku masalé' woo tumumpa mio' ang kolam itu, rinioranke' é tou walina.”

8Icua i Yesus ai sia, “Tumulungo, angkaieno en tepému wo maya'o.” 9Asi témpo ituke', si tou itu makala'uso masama', wo angkaienna en tepé patekelan wo sia maya'.

Eng kamamualian itu tumena asi endo Sabat, si endo ra'ica toro patawoi é tou Yahudi. 10#Neh. 13:19; Yer. 17:21 Ampa'paan in ituo, sé kikiiten é agama Yahudi kumua a si tou si makasama'pé' itu, “Si endo anio' endo Sabat. Sa kumiit in atoran é agama Yahudi, ico ra'ica toro mangkai in tepému.”

11Taan isowatna ai séra, “Si Tou isumama'o yaku en rumu'du', wosama' aku mangkai in tepéku wo maya'.”

12Wo sé kikiiten é agama Yahudi mamuéi a si tou itu, “Si séi réén si tou rumu'du' ico, angkaien en tepému wo maya'o?”

13Taan ra'ica kailekan i tou si makasama'pé' itu si séi si tou isumama' sia, ampa'paan si Yesus ra'io kaséréanai an uner é tou keli am bitu.

14Kekawus in itu si Yesus meta'up wo si tou itu am Balé Le'nas wo icua-Na ai sia, “Ta'néino mangé, ico imasama'o. Yentoo mio' mengaéma' ing kamesé-meséaan wosama' eng kawenduan si lébé uterai ra'ica pendamenmu sa.”

15Wo si tou itu mangé a sé kikiiten é Yahudi, icuana sapaoka si Yesuso en sumama' isia. 16Ampa'paan in itu, sé kikiiten é Yahudi rumaméji mokoi si Yesus, ampa'paan sinama'-Na si tou asi endo Sabat.

17Taan icua i Yesus ai séra, “Si Amang-Ku menawo-nawoi akar intarépé', taniitu ka'i Aku menawo-nawoi.”

18Sé nunuwu' itu méma' sé kikiiten é Yahudi lébé rumaméji e maté Sia, ra'icake' ampa'paan Sia ra'ica kumiit in atoran in endo Sabat, taan ka'i ampa'paan Sia icumua sa si Amang Kasuruan itu Amang-Na in esa, wo in taniitu pengapeputé-Na en owak-Na wo si Amang Kasuruan.

Pinangaku i Yesus sapaoka Sia itu Toyaang i Amang Kasuruan

19Wo isowat i Yesus ai séra in tana'i, “En ulitna icua-Ku mangé ai camu, Yaku Toyaang i Amang Kasuruan ra'ica toro méma' in sapa-sapa sa asaloke' kumiit ing kasalé'an-Ku in esa. E niéma'-Ku asaloke' sapa sé sinéré-Ku niéma' i Amang-Ku. Ampa'paan sapa sé niéma' i Amang, siituo en émaan i Toyaang. 20Ampa'paan si Amang mengaupus Yaku Toyaang-Na wo ituru'-Na a Yaku pakasa sé niéma'-Na in esa. Wo ka'i ituru' oka i Amang-Ku a Yaku en tatawoi sé lébé wangko' mai wo sumama' si tou sumakit, akar kamu mangaya'ka'. 21Si Amang tumou sumawel sé tou imaté wo émaan-Na séra menonou akar ing kauré-uré. Taniitu ka'i Aku Toyaang-Na, si séike' en icasalé'-Ku, émaan-Ku oka sia menonou akar ing kauré-uré. 22Si Amang ra'ica makim sé tou, taan aisarakan-Na a Yaku Toyaang-Na. 23Niéma' i Amang taniitu wosama' pakasa en tou sumiri' si Toyaang-Na kaputé éra sumiri' si Amang. Si séike' si ra'ica sumiri' si Toyaang-Na, sia ka'i ra'ica sumiri' si Amang si mutusai si Toyaang.

24En ulitna icua-Ku mangé ai camu, si séike' mangé en luminga i nunuwu'-Ku wo mercaya a si Amang Kasuruan si mutusai Yaku, kéréanna oka eng katouan akar ing kauré-uré. Wo sia ra'ica ukumen. Sia aicawekaro am papaté wo tumerima ing katouan akar ing kauré-uré. 25En ulitna icua-Ku mangé ai camu, awéan oka en témpona wo an témponao, sapaoka sé imatéo, luminga oka in suara i Toyaang i Amang Kasuruan, siituo en suara-Ku. Wo sé tou luminga in suara-Ku menonou oka. 26Ampa'paan si Amang-Ku palemboian ing katouan, niéma'-Na ka'i si Toyaang-Na mamuali palemboian ing katouan. 27Wo si Amang-Ku ka'i mééo ing kawasa a Yaku e makim ampa'paan Yaku Toyaang i Tou. 28Tioo kamu mangaya'ka' in aicua-Ku anio', ampa'paan maai oka en témpona pakasa en tou sé aicuburo luminga oka in suara-Ku, 29#Dan. 12:2 wo tumou sumawel. Sé tou iméma'o ing kalooran touen oka sumawel en tumerima ing katouan akar ing kauré-uré. Taan sé tou iméma'o ing kaléwo-léwo'an touen sumawel in ukumen.”

30Icua ka'i i Yesus, “Yaku ra'ica toro méma' sapa-sapa sa asalo kumiit ing kasalé'an-Ku in esa. Yaku mengaakim kumiit in sapa en lininga-Ku asi Amang-Ku owo. Wo Yaku maakim ra'ica marapit ampa'paan ra'ica kumiit ing kasalé'an-Ku in esa taan kumiit ing kasalé'an i Amang si mutusai Yaku.

31Sa Aku méé kasairian sapaoka Aku ayutus i Amang Kasuruan, weroten réén iow eng kasairian-Ku itu ra'ica wutul. 32Taan si Amang Kasuruan e méé kasairian andumoro' Yaku, kailekan-Ku sapaoka eng kasairian-Na andumoro' Yaku itu wutul.

33 # Yoh. 1:19-27, 3:27-30 Ayutuso miow sé tou a si Yohanes Mabaptis e mamuéi andumoro' Yaku, wo sia mééo ing kasairian andumoro' Yaku wo sapa sé aicuana itu wutul. 34En ulitna Yaku ra'ica mamangén ang kasairian é tou, taan asalo ita'néi-Ku mangé ai camu andumoro' si aicua i Yohanes e maéman a Yaku wosama' kamu lowiren oka i Amang Kasuruan. 35Si Yohanes itu kaputé in sosoloan maembung wo masendot. Wo kamu arui tumerima in sendotna itu, taan en itu ang karoro'anke'.

36Taan eng kasairian-Ku en lébé wangko' mai wo ing kasairian i Yohanes. Eng kasairian-Ku sapaoka en tawoien-Ku an uner iow intarépé', siituo en tawoien si aiwéé i Amang a Yaku. Sé tawoien pengaémaan-Ku itu méé tuus sapaoka Yakuo si ayutusai i Amang. 37#Mat. 3:17; Mrk. 1:11; Luk. 3:22 Wo si Amang-Ku si mutusai Yaku, Siao in esa e iméé ing kasairian sa si séi Aku en ulitna. Kamu ra'ipé' kawisa luminga Sia maroma' ai camu wo ra'ipé' sumangkum ka'i suméré in amo-Na, 38wo en taar-Na ra'ica aiwéé miow an dékén, ampa'paan ra'ica percayan iow Aku si ayutus-Na mai. 39Eng Kitap Le'nas pengati'tiren iow in sumama-sama' ampa'paan paweroten iow ang karapi imaéma' in taniitu kamu makéré oka ing katouan akar ing kauré-uré uré. Wo an untep ing Kitap Le'nas itu awéan aipatic andumoro' si séi Aku en ulitna, 40taan ra'ica kiim iow mai a Yaku e makéré ing katouan akar ing kauré-uré.

41Yaku ra'ica maperlu in siriin é tou. 42Taan kailekan-Ku andumoro' sé an até miow, kamu uli-ulit ra'ica mengaupus si Amang Kasuruan. 43Yaku mai ang karapi i ngaran i Amang-Ku, taan ra'ica kiim iow tumerima Yaku. Taan sa tou walina e mai ang karapi i ngaranna in esa, icasalé' miow tumerima sia. 44Kamu maéré-éréke' i rarayo asé kakélé miow, wo ra'ica rumaméji mangéré i rarayo asi Amang Kasuruan si wayake' in esa. Sa taniitu, tambisa réén ro'na percayan iow Aku?

45Tioo mawerot sapaoka tudun-Ku oka kamu an dior i Amang asi endo pengaakiman. Si tumudu icamu itu si nabi Musa, mandé ka'i siao si pengaarapen iow. 46Taan sa wutu-wutul percayan iow sapa en aipatic i Musa, tantu percayan iow ka'i Aku, ampa'paan siao e matic andumoro' Yaku. 47Taan en ulitna ra'ica pinercaya miow sapa sé aipatico i Musa, anaé tambisa réén percayan iow sapa sé ipakua-Ku?”

Currently Selected:

Yohanes 5: TNT

Highlight

Copy