Yohanes 4

Si Yesus wo si esa wéwéné Samaria

1Sé tou Farisi ilumingao sapaoka kelio sé tou mengakiit a si Yesus wo nibaptis-Na, akar ilumébéomai wo sé nibaptis i Yohanes. 2(Mandé ka'i lininga éra en abar itu, taan em butulna ra'- ica si Yesus si mengabaptis taan sé murit-Na e mengabaptis.) 3An tutuw ing kailekano i Yesus sapaoka sé tou Yahudi ang golongan Farisi ilumingao in abar itu, itela'u-Na en Yudea wo maréng angé an sangkum ing Galilea. 4Am bawayaan-Na maangé ang Galilea, musti langkoien-Na en sangkum in Samaria. 5#Kej. 48:22; Yos. 24:32 Wo Sia icateka' an esa kota an sangkum in Samaria, e ngaran ing kota itu Sikhar. Eng kota itu mentawian wo en tana' si aiwéé i Yakub indior a si toyaangna Yusuf. 6Am bitu awéan esa parigi i Yakub. Si Yesus mala'léo keli ampa'paan tayang em binayaan-Na, ampa'paano in itu Sia lumukut an tembir im parigi. An tutuw itu wona' katoorao i yéndo.

7Wo mai si esa wéwéné Samaria e masu rano am parigi itu. Wo icua i Yesus ai sia, “Inang, ro'na Aku mangilek rano elepen?”

8Ampa'paan sé murit-murit-Na mangém ang kota en tumeles kakanen.

9 # Ezr. 4:1-5; Neh. 4:1-2 Isowat i wéwéné Samaria itu ai Sia, “Ra'ica patus si Tuang mangilek elepen a yaku. Si Tuang tou Yahudi wo yaku tou Samaria, kéitu réén si Tuang mangilek elepen a yaku?” (Icuana in taniitu ampa'paan sé tou Yahudi ra'ica mengakarapi wo sé tou Samaria).

10Isowat i Yesus ai sia, “Sa raké' woo kailekan i inang sapa si casalé' iwéé i Amang Kasuruan wo makailek si séi réén Aku si mangilek woo elepen, tantu si inang mangilek oka a Yaku, wo iwéé-Ku oka a si inang en dano si mawéé ing katouan.”

11Icua i wéwéné itu a si Yesus, “Si Tuang ra'ica wana ipasaap in dano, wo em parigi anio' rarem keli. Tumambisa réén si Tuang makéré in dano si mawéé ing katouan itu? 12Em parigi anio' indior niéma' i Yakub amang é apo-apo' ami wo awéané' akar intarépé'. Sia in esa imelepo in dano asi parigi anio', taniitu ka'i sé toyaangna wo sé binatang papiaranna. Tumambisa réén si Tuang ro'na méé rano si lumoorai wo si rano nielepo i Yakub apo' ami? Si Tuang réén en lébé wangko'mai wo sia?”

13Isowat i Yesus ai sia, “Si séike' e melep in dano anio', tantu sia maré'om oka sumawel. 14Taan si séike' e melep in dano si aiwéé-Ku, sia ra'io ka'i maré'om akar ing kauré-uré, ampa'paan en dano si iwéé-Ku itu mamuali oka palemboian in dano an owakna. En dano itu melembo-lemboi an owakna akar sia menonou akar ing kauré-uré.”

15Icua i wéwéné itu ai Sia, “Sa taniitu, wééo mai a yaku en dano itu, wosama' aku ra'io ka'i maré'om wo ra'io sangali maréngai e mindo rano asi parigi anio'.”

16Icua i Yesus ai sia, “Mangé towanai si penanaanmu, wo kamu in dua maréngai sumawel am bia'i.”

17Isowat i wéwéné itu ai Sia, “Yaku ra'ica wana penanaan.”

Wo icua i Yesus ai sia, “Wutul si aicuamu sapaoka ko ra'ica wana penanaan. 18Ampa'paan ko makalimao kinawéng, wo intarépé' si tuama mewali-wali wo ico itu, ra'ica ka'i penanaanmu. Anaé, si aicuamu, ico ra'ica wana penanaan, en itu wutul.”

19Icua i wéwéné itu ai Sia, “O, asi oras anio' kailekankuo si Tuang uli-ulit nabi. 20Sé apo-apo' ami tou Samaria, indior mengaapo' a si Amang Kasuruan am bawo ing kuntung anio',#4:20 Si kuntung anio' kuntung Gerizim si an sangkum in Samaria. Sé tou Samaria imangun im paapo'an ang kuntung Gerizim wona' asi ta'un 400 SM. Mandé ka'i em paapo'an itu tinongkar asi ta'un 128 / 129 SM, taan séra kasake' imengaapo' am bitu. Papercayan érapé' sapaoka ang kuntung Gerizim em paapo'an, ampa'paan iséra wina'kes in lima kitap i Musa, tanumai an Ulangan. 11:29, 12:5, 27:12. taan ipakua é tou Yahudi an Yerusalemke' en tampa é tou mengaapo' a si Amang Kasuruan.”

21Icua i Yesus ai sia, “Inang, percayano mangé en icua-Ku anio': Maai oka en témpona sé tou maapo' a si Amang Kasuruan am bisa-wisake', ra'ica sangali sumosor asi kuntung anio' wo mangé an Yerusalem. 22Kamu tou Samaria, kamu mengaapo' a si Amang Kasuruan taan ra'ipé' katuusan iow wutu-wutul si séi Sia, taan kami tou Yahudi mengaapo' a si Amang Kasuruan si wutu-wutul katuusano ami si séi Sia. Ampa'paan aijanjio i Amang Kasuruan sapaoka an uner ami tou Yahudi awéan esa Tou si lumowir oka pakasa in tou. 23Taan maai oka en témpona, wo intarépé' an témponao sé tou maapo' oka a si Amang Kasuruan Amangta ang karapi ing kawasa i Roh Le'nas wo iciit in sususuien wutul-Na. Ampa'paan sé tou maapo' ai Sia tanu siitu, pangérén-Na. 24Si Amang Kasuruan itu Roh, wo si séike' e maapo' ai Sia, musti maapo' mangé ai Sia ang kawasa i Roh Le'nas wo kumiit in sususuien wutul i Amang Kasuruan.”

25Icua i wéwéné itu a si Yesus, “Kailekanku sapaoka si Mesias si patuulen ka'i Kristus maai oka. An tutuw Sia maai, icua-Na oka waya ai cami sé icasalé' i Amang Kasuruan.”

26Icua i Yesus ai sia, “Yakuo si Mesias, si mapaar ang karapimu.”

27Asi témpo itu, sé murit i Yesus mai sumawel ai Sia. Séra mangaya'ka' keli sapaoka Sia memaa-maar ang karapi i esa wéwéné. Taan ra'ica wana esaan ka'i ai séra sé mamuéi “Sapa réén en casalé'mu?” kuma'pa, “Sapa réén em papaaren i Guru wo sia?”

28Wo itela'u i wéwéné itu en tampayangna am bitu wo makala'us mangé ang kota wo icuana a sé tou a mangé mbitu, 29“Mayoo, mangéta sérén si Tou si cumuao andumoro' im pakasa sé niéma'ku! Siao wona' si Kristus?” 30Wo sé tou ang kota itu kumesot wo mangé a si Yesus.

31Ang karoro'an in itu, uwasen é murit-Na Sia eng kuman wo icua éra, “Mayoo kuman é Guru.”

32Taan icua-Na ai séra, “A Yaku awéan kakanen si ra'ica kailekan iow.”

33Kelinga éra in itu sé murit-Na membum-buéian, “Awéan réén tou si maalio mai ing kakanen ai Sia?”

34Icua i Yesus ai séra, “Eng kakanen-Ku mengaéma' ing kasalé'an i Amang Kasuruan si mutusai Aku wo lumekep in tawoien si aiwéé-Na a Yaku. 35Ra'ica réén icamu en icumua, epaté' ngaserap ka'i an orasnao i mupu'? Taan icua-Ku mangé ai camu, séréno sé an li'cir wo téintengeno em pangumaan makuni'o wo an orasnao in upuun. 36Sé tou mengaupu' mato'tolo tumerima in laasana. Séra maumung im bua'na, siituo sé tou sé maémano wo makéré ing katouan akar ing kauré-uré. Anaé, sé tou muras wo sé maupu' mewali-wali maarui. 37Wutulo sé paandé é tou, ‘Si esa tou e muras in lulumbo, wo sé tou walina e imupu'.’ 38Kamu ayutus-Ku mangé mupu' im bua'na am pangumaan, si indior tou walina e mangé imusew. Séra e imusew wo intarépé' icamu e mupu' im bua'na am pinaraméjian éra.”

39Kelian tou Samaria ang kota itu mercayao si Yesus ampa'paano aicua i wéwéné itu tanu si anio', “Aicua-Na a yaku andumoro' im pakasa sé sumangkumo niéma'ku.” 40Anaé, tutuw é tou Samaria icateka' mangé a si Yesus, pekiupusen éra wosama' Sia ro'na mento' ang karapi éra. Wo Sia mento' am bitu rua ngando eng kauré.

41Makakelio sé tou iluminga in sususuien-Na wo mercaya ai Sia. 42Icua éra a si wéwéné itu, “Percayaan ami si Yesus ra'icake' ampa'paan sé aicuamu asi kaawii makasa, taan ampa'paan intarépé' icami in esa lumingao Sia. Kailekan amio sa Sia itu wutu-wutul Lumolowir é tou.”

Si Yesus maréng ang Galilea

43Si Yesus mento' ang kota Sikhar rua ngando eng kauré wo Sia mangé an sangkum ing Galilea. 44#Mat. 13:57; Mrk. 6:4; Luk. 4:24 Sia in esa sumangkumo icumua sapaoka ra'ica wana nabi pengasiriin an doongna in esa. 45#Yoh. 2:23 Taan an tutuw i Yesus icateka' ang Galilea, Sia sinungkul é tou am bitu ampa'paan sinéré érao waya sé niéma'-Na an Yerusalem tutuw éra tuma'néi in endo wangko' Paska. Asi témpo itu séra ka'i an Yerusalem e méma' in endo wangko' Paska.

Si Yesus sumama' si toyaang tuama si matawoi an istana

46 # Yoh. 2:1-11 Wo si Yesus mai sumawel ang kota Kana ang Galilea. Am bitu Sia sumangkumo méma' in dano mamuali anggor. Eng Kana mentawian wo eng kota Kapernaum. Asi témpo itu ang Kapernaum awéan esa toyaang tuama sumakit, toyaang i matawoi an istana. 47An tutuw lininganna si Yesus si an Yudea owo wo icateka'o mai ang Galilea, wo sia mangé a si Yesus ang kota Kana wo mekiupus sa woo si Yesus maai ang Kapernaum en sumama' si toyaangna sumakit wo tawio maté.

48Icua i Yesus ai sia, “Sa ra'ipé' sinéré miow en tuu-tuus wo eng kakaya'kaan, ra'ipé' percayan iow.”

49Icua i matawoi an istana ai Sia, “Tuang, mayoo angénta, oréoka si toyaangku maté.”

50Icua i Yesus ai sia, “Maréngo ko, si toyaangmu menonou.” Si aicua i Yesus itu pinercayana wo sia maréng.

51Am bawayaanna imawaréng, sia sinungkulo é atana wo icua éra sapaoka si toyaangna menonou.

52Wo wuéienna ai séra, “Jam pira réén si toyaangku itu tumo'tolo masama'?”

Isowat éra ai sia, “Kaawii i ninia asi jam satu, en sakit paso'na icatalao.”

53Wo kata'néiano i amang i toyaang sumakit itu asi jam ituo si aicua i Yesus ai sia, “Si toyaangmu menonou.” Wo sia wo sé am pamaléna waya mercayao a si Yesus.

54Siituo eng kakaya'kaan karua si niéma' i Yesus ang Galilea kekawus-Na imaréngai an Yudea owo.

Currently Selected:

Yohanes 4: TNT

Highlight

Copy