Yohanes 21

Si Yesus mapaturu' in owak asé pitu murit-Na

1Wo si Yesus mapaturu' in owak ka'i a sé murit-Na an tembir in lour Tiberias.#21:1 Ngaran walina in Lour Tiberias, lour Galilea. Tana'io eng kinamamualian itu: 2Asi sangando, si Simon Petrus, Tomas si pengatuulen Didimus, si Natanael tou Kana ang Galilea, sé rua toyaang i Zebedeus, wo sé rua murit walina, séra im baya imali'us an tembir in lour itu. 3#Luk. 5:5 Icua i Simon Petrus ai séra, “Icasalé'ku maangé en tumangka' sera'.”

Icua éra ai sia, “Icami ka'i masalé' maangé wo ico.” Wo séra mangé, sumaké an londéi, taan asi wengi itu ra'ica wana sera' eng kinatangkaan éra.

4An tutuw imatawio imando, si Yesus tumulung an tembir in lour itu. Taan ra'ica kailekan é murit sa Sia ituo si Yesus. 5Wo wuéien i Yesus ai séra, “É kara-karapi, awéano réén sera' eng kinatangkaan iow?”

Isowat éra, “Ra'ipé' wana.”

6 # Luk. 5:6 Wo icua i Yesus ai séra, “Ilomboo mio' en lolombo' miow ang kakan in londéi anio', kamu makéré oka sera'.”

Wo ilombo' éra en lolombo' itu, wo ra'io kawéso'an éra en lolombo' itu ampa'paan kelian en sera' an untepna.

7Wo si murit si caupus i Yesus, kumua a si Petrus, “Siao si Tuang!”

Kelinga i Petrus Sia itu si Tuang, sia kumarai ampa'paan sia meke'da', wo sia lumo'tic kuméngkéng angé an tembir in lour. 8Sé murit walina ka'i mai ang karapi in londéi teké' wo pewali-walian éra i mawéso' en lolombo' si mawuta-wuta in sera' itu wo wésoon éra ang katanaan. Eng katayang éra wo ing katanaan wayake' wona' in sangaatus meter.

9An tutuw éra in tumana'o, sérén éra awéan waa in api, wo am bawona awéan sera' wo roti. 10Icua i Yesus ai séra, “Paalianai piraan sera' sé pakatangkaané' miow itu.”

11Si Simon Petrus sumaké an londéi, wo wésoonna ang katanaan en lolombo' si mawuta-wuta é sera' wangke-wangker, eng kakelina sangaatus lima ngapulu' telu. Mandé ka'i in taniitu en lolombo' itu ra'ica imakésé'.

12Wo cua i Yesus ai séra, “Mayoo wo sumokolo.” Ra'ica wana asé murit itu em brani mamuéi a si Yesus, “Si séi réén Ko?” Ampa'paan kailekan éra Sia itu si Apo' Yesus. 13Wo si Yesus rumuru, indon-Na e roti wo iwéé-Na ai séra. Taniitu ka'i mai wo sé sera' itu. 14Siituo ang kumatelu si Yesus mapaturu' in owak a sé murit-Na kekawus Sia tumou sumawel an uner é tou imaté.

Paliarano sé domba-Ku

15Makasokol ako, wuéien i Yesus a si Simon Petrus, “Simon, toyaang i Yohanes,#21:15 Si Yohanes anio' patuulen ka'i Yunus (Mat. 16:17). Si Yohanes itu ra'ica si murit i Yesus si imatic ing kitap Yohanes. icaupusmu réén Aku lumébé mai wo iséra anio'?”

Isowat i Petrus, “Wutul é Tuang, kailekan-Mu sapaoka aku mengaupus Ico.”

Icua i Yesus ai sia, “Paliarano mio' sé domba-Ku.”

16Wuéien ka'i i Yesus ing karua a si Petrus, “Simon, toyaang i Yohanes, icaupusmu réén Aku?”

Isowat i Petrus, “Wutul é Tuang, kailekan-Mu sapaoka aku mengaupus Ico.”

Icua ka'i Yesus ai sia, “Paliarano mio' sé domba-Ku.”

17Wuéien ka'i i Yesus ing katelu a si Petrus, “Simon, toyaang i Yohanes, icaupusmu réén Aku?”

Wo en até i Petrus mawendu, ampa'paan akar i makatelu si Yesus mamuéi ai sia, “Icaupusmu réén Aku?” Wo isowatna a si Yesus, “Tuang, em baya-waya kailekan-Mu, kailekan-Mu sapaoka aku mengaupus Ico.”

Icua ka'i i Yesus a si Petrus, “Paliarano mio' sé domba-Ku. 18En ulitna icua-Ku mangé ai co, an tutuw ko wo'basé', ico in esa mengawa'kes im pinggangmu wo ico mawaya' am bisake' si casalé'mu. Taan sa ko matu'ao, wéému oka eng kamamu wa'kesen é tou walina wo iwali éra oka an tampa si ra'ica icasalé'mu.” 19Icua i Yesus in taniitu, en tumuru' mulur tambisa si Petrus maté, wo irumayo wo sumiri' si Amang Kasuruan. Kekawus i Yesus kumua in taniitu, icua-Na a si Petrus, “Kumiito mai Aku.”

Si murit icaupus i Yesus

20 # Yoh. 13:25 An tutuw i Petrus maréng in somoi, sérénna si murit icaupus i Yesus makiit iséra. Si murit itu si ilumukut an duru i Yesus icuman mewali-wali an tutuw i Yesus ra'ipé' mate wo ka'i si mamuéi a si Yesus, “Tuang, si séi réén en sumarakan Ico?” 21An tutuw sérén i Petrus si murit itu, icuana a si Yesus, “Tuang, sapa réén e mamuali asi tou itu?”

22Isowat i Yesus ai sia, “Sa icasalé'-Ku sia menonouke' melala'us akar Aku maai sumawel, en itu ra'ica urusanmu. Taan ko kumiito mai Yaku.”

23Ampa'paano i nunuwu' i Yesus itu, akar icaseraro en abar a sé poo-poow itu sapaoka si murit itu ra'ica maté. En ulitna si Yesus ra'ica icumua sapaoka si murit itu ra'ica maté, taan aicua-Na, “Sa icasalé'-Ku sia imenonouke' melala'us akar Aku maai sumawel, en itu ra'ica urusanmu.”

E nuwu' ing kumusi'

24Si murit ituo si méé ing kasairian wo imatic andumoro' im pakasa in anio'. Wo kailekanta sapaoka eng kasairianna itu wutul.

25Wo keliané' ka'i en andumoro' im balina sé niéma' i Yesus. Taan sa pakasa e niéma' i Yesus itu ipatic maesa-esa, pawerotenku ra'ica kawooan ing kayo'baan e mamuat pakasa eng kitap si musti ipatic itu.

Currently Selected:

Yohanes 21: TNT

Highlight

Copy