Yohanes 10

Si Yesuso si gembala sama'

1Si Yesus maroma' mengapaké in andéan, “En ulitna icua-Ku mangé ai camu, si séike' si muntep am pakurungan é domba, wo ra'ica icumiit im papalen taan asaloke' ilumaput am pager, sia itu rombit wo tou mengarampok. 2Taan si tou si muntep cumiit im papalen, isiao si gembala é domba. 3Si matéir im papalen muka' im papalen torona i gembala itu, wo towan i gembala itu sé dombana kumiit i ngaran i esa wo i esa, sia pengalingan éra. Wo akinen i gembala itu séra kumesot. 4Sa sé domba aicesoto waya, si gembala itu maya' an dior éra wo sé domba itu kumiit ai sia ampa'paan katuusan éra en suarana. 5Taan séra tantu ra'ica kumiit oka si tou ra'ica katuusan éra. Séra tumincas ai sia ampa'paan ra'ica katuusan éra en suarana.”

6Aicua i Yesus en andéan itu ai séra, taan ra'ica kaangéan éra sapa em peangé-angén-Na cumua in taniitu ai séra.

7Ampa'paan in itu icua ka'i i Yesus, “En ulitna icua-Ku mangé ai camu, Yakuo em papalen é domba itu. 8Pakasa é tou sé mai rumior a Yaku séra itu rombit wo perampok, wo séra ra'ica lininga é domba itu. 9Yakuo em papalen itu. Si séike' e muntep lumangkoi a Yaku, sia lowiren oka. Sia muntep oka wo kumesot, wo meta'up oka in tana' rerukutan. 10Si rombit maai asaloke' i rumombit, wo mengapaté wo en luméwo'. Taan Aku mai wosama' séra makéré ing katouan si wuta ing kamang.

11Yakuo si gembala sama'. Si gembala sama' sumarakan in owakna en lumowir sé dombana. 12Awéan tou pengawéran en tuméir sé domba taan sia ra'ica gembala, wo ka'i ra'ica makaanu domba. An tutuw séréna awéan serigala maai, itela'una sé domba itu wo sia tumincas, akar awéan domba sé kinarét i serigala wo sé walina tumincas akar icasera-serar. 13Si tou itu tumincas ampa'paan sia asalo pate'tekan, wo ra'ica pandungenna sé domba itu.

14Yakuo si gembala sama'. Katuusan-Ku sé domba-Ku, wo sé domba-Ku ka'i makatuus Yaku, 15#Mat. 11:27; Luk. 10:22; Yoh. 3:35 meputé si Amang makatuus Yaku wo ka'i si Amang katuusan-Ku. Wo isarakan-Ku en owak-Ku a sé domba-Ku. 16Taan Yaku awéané' ka'i domba walina sé ra'ica asi kurungan anio', sé domba itu musti ka'i akinen-Ku wo lingan oka éra en suara-Ku. Wo séra mamuali oka sangareru' wo sé domba-Ku ang kurungan anio', wo makaanu esa gembala, siituo Aku.

17Si Amang-Ku mengaupus Yaku, ampa'paan aisarakan-Ku en owak-Ku wosama' Aku touen sumawel. 18Ra'ica ka'i wana esaan tou e ro'na maté Yaku, taan kasalé'an-Ku in esa en sumarakan in owak-Ku. Ampa'paan Aku awéan kawasa e méé in owak-Ku im patén, wo Yaku ka'i awéan kawasa en tumou sumawel in owak-Ku. Si Casuruan Amang-Ku e rumu'du'o Yaku méma' in itu.”

19Kelinga é tou Yahudi si Yesus kumua in taniitu, séra meindo-indoano roma'. Kelian ai séra makua, 20“Sia rinasuko i sétang wo imanganga'o! Kéitu réén lingan iow Sia?”

21Taan awéan tou walina e makua, “Si aicua-Na itu ra'ica nunuwuun i tou rinasuk i sétang! Awéan réén sétang mengaéma' si tou wola ro'na suméré?”

Ra'ica kiim é tou Yahudi tumerima si Yesus

22Mayo en témpona sé tou Yahudi en tuma'néi in endo wangko' tinahbisan im Balé Le'nas an Yerusalam.#10:22 Asi ta'un 168 kuma'pa 167 SM, sé suraro Siria ipawali i kikiiten Antiokus Ephipanes imandét ing kota Yerusalem wo airagés éra sé wawi a si Zeus opo' éra am Balé Le'nas. Kekawus in telu ngata'un, sé tou Yahudi ipawali i kikiiten Yudas Makabius mandét sumawel in Yerusalem wo le'nasenna em Balé Le'nas torona i Amang Kasuruan. Sé tou Yahudi tuma'néi ing kamamualian anio' susur in serap Desember eng kauréna walu ngando. En endo wangko' itu paémaan kekawus in dua ngaserap in endo wangko' Terung Lalaina. An tutuw itu oras ing kautingan. 23Ang karoro'an i Yesus am Balé Le'nas, Sia mawaya-waya' an lésar i Salomo. 24Wo sé tou Yahudi mali'usai wo lumi'cir a si Yesus wo icua éra, “Akar kawisa réén iwaya-Mu kami marua-rua wasa? Sa Ko Mesias, icuao mai ai cami tioo ipaene-enep.”

25Isowat i Yesus ai séra, “Aicua-Kuo ai camu, taan ra'ica percayan iow. Sé tawoien niéma'-Ku ang karapi i ngaran i Amang-Ku, siituo eng kasairian andumoro' Yaku. 26Taan ra'- ica pinercaya miow, ampa'paan kamu ra'ica domba-domba-Ku. 27En suara-Ku pengalingan é domba-Ku. Katuusan-Ku séra wo séra kumiit Yaku. 28Wo iwéé-Ku ai séra eng katouan akar ing kauré-uré, wo séra ra'ica iwaya-Ku maté akar ing kauré-uré. Wo ra'ica ka'i wana esaan tou e ro'na mandét iséra ang kama-Ku. 29Séra aiwééo mai i Amang-Ku a Yaku. Si Amang-Ku lébé' wangko' mai asé im pakasa, wo ra'ica ka'i wana esaan tou e ro'na mandét iséra ang kama i Amang-Ku. 30Yaku wo si Amang-Ku esa.”

31An tutuw é tou Yahudi luminga si Yesus icumua in taniitu, séra mitong ka'i watu em basa éra mangkil woo Sia. 32Icua i Yesus ai séra, “Kelian en tawoien loor asi Amang Kasuruan owo sé aituru'-Kuo ai camu. Asé pakasa in tawoien loor itu, si wisa réén si méma' icamu masalé' mangkil im batu a Yaku?”

33 # Im. 24:16 Isowat é tou Yahudi itu, “Ra'ica ampa'paan in tawoien loor itu akar icasalé' ami mangkil im batu ai Co, taan ampa'paan Ico maojat si Amang Kasuruan! Ico asaloke' tou taan en owak-Mu pengapeputé-Mu wo si Amang Kasuruan.”

34 # Mzm. 82:6 Isowat i Yesus ai séra, “Aipatic ang Kitap Le'nas, si Amang Kasuruan icumua a sé kikiiten é agama Yahudi, ‘Icua-Ku, icamu sé nianggap tanu kasuruan.’ 35Kailekan iow eng Kitap Le'nas pengapakén akar ing kauré-uré. Anaé, sa sé tou tumerima in taar i Amang Kasuruan patuulen ‘sé kasuruan,’#10:35 Ang kitap Mazmur 82, Si Amang Kasuruan itumowa sé kikiiten asé tou-Na itu ‘sé kasuruan’, ampa'paan Sia sumisir iséra mamuali wakil-Na ang kayo'baan e makim sé tou-Na. Am bia'i ka'i, si Yesus inumuwu' wuntulke a sé kikiiten é tou Yahudi. 36kéitu réén ipakua miow Aku maojat si Amang Kasuruan, tutuw-Ku makua Yaku anio' Toyaang i Amang Kasuruan? Yaku si sinisir-Na wo ayutus-Na mai ang kayo'baan. 37Sa Aku ra'ica mengaéma' in tawo-tawoien i Amang-Ku, tioo percayaan iow Aku. 38Taan sa Aku mengaéma' in tawoien itu, mandé ka'i ra'ica kiim iow mercaya Yaku, percayano mio' en tawo-tawoien sé niéma'-Ku itu mai asi Amang-Ku owo. Wo in taniitu, kaangéan iow oka sa si Amang meesa wo Yaku wo Yaku meesa wo si Amang.”

39Kekawus i Yesus kumua in taniitu, séra rumaméji ka'i en tumangka' Sia, taan Sia aicaséipke' en tangkaan éra.

40 # Yoh. 1:28 Wo si Yesus mangé ka'i an lewet angé in doyongan Yordan, an tampa i Yohanes indior mengabaptis sé tou. Wo Sia mento' am bitu. 41Keli en tou sé mai a si Yesus wo séra mengkuanan, “Si Yohanes ra'ica iméma' ing kakaya'kaan, taan wutul waya sé aicua i Yohanes andumoro' i Yesus.” 42Wo kelian tou a mangé mbitu maéman a si Yesus.

Currently Selected:

Yohanes 10: TNT

Highlight

Copy