Kisah Para Rasul 6

Sé pitu tou kinasisiran en sumelewir sé tou lengéi

1Sé tou mengakiit in sususuien i Yesus makaaweso eng kakeli. An tutuw itu sé tou Yahudi sé manuwu' i nunuwu' é Yunani mangingimbulu a sé tou Yahudi sé menganuwu' i nunuwu' é Ibrani. Ampa'paan sé wéwéné balu é tou Yahudi menganuwu' i nunuwu' é Yunani itu, ra'io pawéan rékén é tou an tutuw mengaéké ing kaperluan mengendo-ngendo. 2Ampa'paano in itu, sé sangapulu' rua ruru'du'an itu tumowa pakasa sé tou makiit in sususuien i Yesus, icua éra, “Kami in sangapulu' rua tou musti mengua-ngua in Taar i Amang Kasuruan. Suméa'o keli sa yento' ami mengua-ngua in Taar itu ampa'paano i menu'tu-nu'tulke' ing kakanen é tou keli. 3Anaé, tana'io é poo-poow, aweso taré sisiren iow pitu tou an uner iow. Séra itu musti tou sama', kinawasa i Roh Le'nas wo awéan kapinteran asi Casuruan owo. Sé tou anioo em béan ami oka in tawoien en tumu'tul ing kakanen. 4Wo in taniitu, kami asaloka mengasombayang wo mengakua in Taar i Amang Kasuruan.”

5Pakasa sé jamaat tumerima in sama' sé aicua ai séra itu. Anaé, séra sumisir pitu tou anio': Si Stefanus si wutu-wutul maéman wo kinawasa i Roh Le'nas, si Filipus, si Prokhorus, si Nikanor, si Timon, si Parmenas wo si Nikolaus si ra'ica tou Yahudi taan imuntepo agama Yahudi, sia mai an Antiokhia owo. 6Sé pitu tou itu iwali éra a sé sangapulu' rua ruru'du'an wo séra maro ing kama an dangka' é pitu tou itu wo sumombayang.

7En Taar i Amang Kasuruan makaseraro wo sé tou maéman a si Yesus an Yerusalem makaaweso eng kakeli. Kelian sé imam sumarakan in owak éra wo maéman a si Yesus.

Si Stefanus tinangka'

8Si Amang Kasuruan tumambérai in upus wo ing kawasa-Na a si Stefanus, ampa'paan in ituo sia méma' ing kakaya'kaan wo in tuu-tuus sé ra'io icakua an uner é tou keli. 9Am bitu awéan ka'i piraan tou Yahudi ang Kirene owo wo an Aleksandria, wo awéan piraan ka'i mai ang Kilikia wo an Asia owo. Séra itu indior sumangkumo mamuali ata é tou taan intarépé' ra'io. Em balé paapo'- an éra makangaran ‘Walé paapo'an é tou sé indior sumangkumo mamuali ata.’ Ra'ica icasalé' éra si Stefanus, ampa'paan in ituo séra meindoan roma' wo sia. 10Taan émaan i Roh Le'nas si Stefanus pinter keli maroma' akar ra'ica kawooan éra en sumundur sia. 11Ampa'paan in itu, ang karapi i memene-menes ru'du' éra piraan tou en sumairi in towo, tana'i, “Pinalingao ami sé nuwu' i Stefanus maroma' ang karapi i maojat si Musa wo si Amang Kasuruan.”

12Tanu siituo em pengaémaan éra mengawéé in léwo' a sé tou keli, a sé matu'a, a sé makailek wutul in Torat. Wo tangkaan éra si Stefanus wo wésoon éra sia wo iwali éra mangé a Mahkamah Agama. 13Asi tampa itu ru'du' éra piraan tou en sumairi in towo andumoro' i Stefanus. Icua é tou sé mengasairi itu, “Si tou anio' ra'ica mento' mengawéé in léwo' andumoro' im Balé Le'nas anio' wo en ukum Torat. 14Lininga ami, ipakuana sa si Yesus tou Nazaret itu e tumongkar oka im Balé Le'nas anio' wo rumoba ing kanaramen si aisusuio i Musa indior, si pemaké-makénta akar intarépé'.”

15Asi témpo itu, pakasa é tou sé makalukut a Mahkamah Agama tuméinteng si Stefanus wo sérén éra en amona masélap tanuoka malaékat.

Currently Selected:

Kisah Para Rasul 6: TNT

Highlight

Copy