Mbete Marki 12
12
1Wara mí Zezu ɓah lawɓayay hi̧ niri : « Nzuk mbew laɓ waka kpuh viyȩh#12.1 Ɓay lah ɓay lawɓayay le í ki̧ Mbete Esaïe 5.1-4,7.. Ke vba̧ kpaŋ ɗoŋ ri gbik gbik. Ke laɓ gel-ha̧h mbih lehna kpuh-u ké ɓilu. Ke laɓ gel ƴona nzuk-kɔr wakari ɓa gaŋu dara mí ke ndoh waka ra hi̧ nzuk-laɓ pihna-uri ɓáy. Ke tɔr si gahru ɓa ɗih-u.
2Few-hal lehna kpuh ka̧h, mí nzuk waka pih gun nzak pihna ye mbew#12.2 Gun nzak pihna ɓa gun nzak pihna Ŋgerzahri kandɔk Za̧h batisi, Eli, Ezay. Í ki̧ Mbete Jérémie 7.25-26 ke Mbete Zacharie 1.6. si ta̧w nzuk-laɓ pihna wakari ɓá fa̧h lehna kpuh-u gi keni hi̧ ni. 3Mí nzuk-laɓ pihna wakari ra mgba ni, ku vboŋ ni, mí ku el ni̧h ni ndɔk ndikpo. 4Nzuk waka pih gun nzak pihna a ɓoru si, mí nzuk-laɓ pihna wakari ra mgba ni. Ku vba̧ tul ye ɓa no̧k. Ku laɓ ni se su̧hru. 5Nzuk waka pih gun nzak pihna ye a ɓoru si waka ra ɓáy, mí ku i ni. Ke el pih gun nzak pihna ye a ɓoruri ɓa ŋgi̧-u ɓáy. Mí nzuk-laɓ pihna wakari ra vboŋ a haniri, ku i a ɓoruri.
6Ɔh tɔr bale, ke pih gun sana ye si. Ke ker ɓahri, ku ɓay hȩk gun ye. 7Nzuk-laɓ pihna wakari ɓá ko gun nzuk waka ƴo gina bale, ku lek ɓay mbew ɓahri : “A ye ké gi-aw ra, ke ɓa gun-ya̧ fe bah ye munu. Náh i wuri ni dale, waka-ay ɓay ti̧h ɓa fe wahri.”
8Gun ra ka̧h ba, mí nzuk-laɓ pihna wakari mgba ni. Ku i ni, mí ku mbi hul ye vbu fal kpaŋ. »
9Zezu el ɓahri : « Kaŋaw ba, nzuk waka-aw ɓay laɓ ani mí ziŋ nzukawri ɓáy le ? Nzuk waka-u ɓay ur, ke si-u, ke í nzuk-laɓ pihna wakari-aw, mí ke él ndoh waka kpuh ra hi̧ nzuk a ɓoruri. 10Ɓay ké na ɓil mbete Ŋgerzah-ay, i ki̧-ki̧, kaŋ ya le ?
Kasaw ké nzuk-mboh vul kani Ŋgerzahri poŋ kan kpah ra,
kasawu mí el ti̧h ɓa mah kasaw-mboh diŋ vulu # 12.10 Í ki̧ gun ɓay ké si ke gel ki̧na Mbete Matiye 21.42 ɓay tu ɓay kasaw-mboh diŋ vulu..
11 Miƴori mí hi̧ kasaway el ti̧h ɓa mah kasaw,
mí ɓa fe saŋ ké nun wah. »
12Ŋgernzukri ra ƴah ful ɓay mgba ni ɓayu kú-u tu ɓahri se, Zezu ɓah lawɓayaw si tul woyri. Mí ku poŋ ni, ku tɔr ɓay hȩkme daɓa nzukri ké laɓ niri.
13Ku pih farizi a hani-uri ke nzuk mbay Eroɗri si ta̧w Zezu. Ku hɔl ndaw ɓay mgba ni keni. 14Ku ɓahri : « Metere, nah tu ɓahri, i ɓa nzuk a ketina. I lu nun nzuk ya ɓayu ké hȩkme nun nzuk se wuri ya. Wara le i firma nzukri sí siŋ sina a ketina Ŋgerzah. Bolkusol Ŋgerzah hi̧ na gun Izarayelri ful ɓay puh lampoh hi̧ ŋgermbay sa̧wnzuk a ɓoruri kandɔk sezar mini ani le#12.14 Í ki̧ gun ɓay ké si ke gel ki̧na Mbete Matiye 22.17 ɓay tu ɓay puh lampoh hi̧ ŋgermbay sa̧wnzuk a ɓoruri. ? »
15Zezu tu ɓay kú-u mu̧h ké law woyri tu bale, ke ɓahri : « Ɓay fe mí i gi ndoh law bi ke ɓay kandɔkay le ? Í gi ke lari ké nzukri puh keni lampoh ra hi̧ mí ko. »
16Ku ten lari-u hi̧ ni, mí Zezu el ɓahri : « Tem nzuk a suŋ mí ku vbeh kan ri-ay le ? Riŋ nzuk a suŋ mí ku vbeh kan ri-ay le ? »
Mí ku ɓahri : « Temu ɓa tem sezar. Riŋu kara pi. »
17Bale ke ɓahri : « Kaŋ dale fe sezar le, í hi̧ sezar. A wo nzuk pirmatul ké Ŋgerzah laɓ mu ɓa fe tem ye le, mú hi̧ Ŋgerzah gaŋ ba. »
Gosoɓay mba niri.
18Mí sadusiri gi ta̧w Zezu. (A woyri-aw, ku ɓahri, nzuk hu le, záh ye ta-a. Ke ta ziŋ pa̧ymun a foyu ya pi.) Mí ku vbi ni ɓay ɓahri : 19« Metere, Moyiz vbeh ɓil mbete bolkusol Ŋgerzah ɓahri, gelke nzuk ya̧ wu̧y mí ke hu dan mbuŋ gun le, yi̧n ye ɓá ya̧ wu̧y kaŋpele ra, ké mbuŋ keni gun ɓa mi̧hri yi̧n ye ké hu-aw#12.19 Ɓayu na ɓil Mbete Deutéronome 25.5-6. . 20Aŋay nzuk ɓil mahri ɓa toŋndɔk say ƴo ri. Ŋgernzuk ya̧ wu̧y, mí ke hu dan mbuŋ keni gun. 21Toŋnafal ye el ya̧ wu̧y kaŋpele ra, ke hu dan mbuŋ keni gun. Nzuk a sayu ya̧ wu̧y ra, ke hu dan mbuŋ keni gun pi. 22Kaŋ mí nzukri ké toŋndɔk sayaw, ku ya̧ wu̧y ra ke gel woyri mbew mbew gbam, mí ku hu dan mbuŋ gun ɓa mi̧hri yi̧n woyri. Ɔh tɔru bale, wu̧y ra hu pi.
23Seh ké záhri ɓay ziŋ pa̧ymun a foyu ra wa, wu̧y ra ɓay na ɓa wu̧y nzuk a suŋ le wo ? Ɓayu ké nzukri ké toŋndɔk sayaw ya̧ ni ke gel woyri mbew mbew gbam. »
24Kandɔkaw mí Zezu ɓah ɓayay hi̧ niri : « Sa̧wu mí a woiri-ay, i reh ful. I sa tu sa̧wɓay ké na ɓil mbete Ŋgerzah ya, i sa tu ŋgerna Ŋgerzah ya pi. 25Seh ké záhri ziŋ pa̧ymun a foyu le, yá̧ hani ɓay ta-a. Wara le ku káɓ ké nunmbam ɓa ŋgɔh kandɔk tem nzak pihna Ŋgerzahri. 26Ɓay a ɓoru ké si tul záhri le, ku ziŋ pa̧ymun a foyu gaŋ. Gel ki̧na a a̧y ké Ŋgerzah ti̧h nun Moyiz ké ɓil rim hɔrɔ ké gay kpuh, mí hɔrɔ-u se gay kpuh ra ya, i ki̧-ki̧ kaŋ ya le ? Mbete vbehna ye sɔk ani mí Ŋgerzah ɓah hi̧ ni ɓahri se, a ye Ŋgerzah ke ɓa záh zih yeri Abaraham, Isak, Zakoɓ#12.26 Ɓayay na ɓil Mbete Exode 3.6,16. . 27Kaŋ dale ziihri ƴo ri. Ŋgerzah ta ɓa záh nzuk a huluri ya. Wara le ke ɓa záh nzuk a ƴo ke ɔknari ké kaɓ ke pa̧ymun a foyu sew ke sew ɓa ŋgɔh. A woiri-ay, i vbo-vbol. »
28Nzuk-sɔk mbete bolkusol Ŋgerzah mbew ƴo gel fahɓay sadusiri ke Zezu. Ke ƴo lah ɓay ké Zezu el keni hi̧ sadusiri ra su-su, mí ke vbi Zezu ɓahri : « Ké sakra ɓayri ɓil mbete bolkusol Ŋgerzah ra wa, ɓay a suŋ mí ŋger mba ɓay a ɓoruri gbam le ? »
29Zezu yih nzak ye ɓahri : « Bolkusol ké ŋger mba mbaŋuri mí na-ay : Gun Izarayelri, í lah, Miƴori mí ɓa Ŋgerzah wah. Miƴori ɓa mbew yaŋ#12.29 Ɓayay na ɓil Mbete Deutéronome 6.5.. 30Miƴori ɓa Ŋgerzah wo, mu sá ni ke law wo gbam ke mun wo gbam ke kerɓay wo gbam ke huhrumun wo gbam. 31Ɓay a seɗe-u ƴo ri mí na-ay : Mu sá nzuk mbaŋ wo eŋ mun wo kaŋ. Ɓay a ɓoru ké ŋger mba bolkusolri ké seɗe-ay ta-a. »
32Mí nzuk ra el ɓahri : « Ŋgernzuk, ɓay wo su garɓay. Ɓayu ɓa ketina gaŋ. Gaŋ tul feri riw ke hȩk ye mí ɓa Ŋgerzah wah mbew yaŋ, deɓ ye a ɓoru ta-a. 33Nzuk ɓay sa ni ke law ye gbam ke kerɓay ye gbam ke huhrumun ye gbam pi, ke él sa nzuk mbaŋ ye eŋ mun ye kaŋ. Ɓayay kal tul fe puhnari gbam ké nzukri nzuh hi̧ Ŋgerzah ke fe puhna a ɓoruri kú-u gi keni hi̧ ni. »
34Zezu tu ɓahri, nzuku yih nzak ye ɓa suki, ke el ɓahri : « Lák mbay Ŋgerzah ɗih ya ziŋ mu. »
Nzuk mbew ké hi̧ tul ye ɓay vbi Zezu ɓay ta mba.
35Zezu ba, el ke ɓay a ɓoru ƴo firma nzukri ɓil ila vul kani Ŋgerzah, ke ɓahri : « Ani mí nzuk-sɔk mbete bolkusol Ŋgerzahri ɓahri, Ŋgermbay ɓa gun zih ŋgermbay Daviɗ le#12.35 Ɓayu na ɓil Mbete Siŋ 110.1. ? 36A ye ŋgermbay Daviɗ gaŋ, Tempuki mgba tem ye hi̧ ni ke ten siŋ kandɔkay : “Miƴori ɓah hi̧ Ŋgermbay bi ɓahri, mú kaɓ ɓel bi ɓa ndɔk lakna bi, mi ƴo ɔh ŋgerna nzukbaa wori hi̧ kú ti̧h ɓa gel-ku̧ bɔk wo.” 37Ŋgermbay Daviɗ gaŋ kara ɗi gun zih ye ɓa “Ŋgermbay” ye ra ba wa, ani mí Ŋgermbay ɓa mi̧hri ye ɓáy le ? »
Daɓa nzukri ɓa ŋgi̧-u lah ɓay Zezu ke law rihna.
38Ké ɓil fe firma ye, ke ƴo ɓahri : « Í ko-ko ɓay mbi fe laɓna nzuk-sɔk mbete bolkusol Ŋgerzahri. A woyri-aw ku yih ɓay ndoh mah gar a peh-u tul tul ha̧rma keni. Ku yih ɓay hi̧ nzukri ɓá vah niri ndɔk seɗe seɗe ké gel daɓa. 39Ku yih kaɓ gel kaɓna ŋgernzukri ké ɓil vul misoŋ, ku yih kaɓ gel kaɓna riŋ ɗina ké gel ti̧hmbih pi. 40Ku ƴo su̧ fe wu̧y sehri wuruk wuruk, mí ku ƴo goŋ Ŋgerzah ɓa peh-u sɔk keni mun woyri. A woyri ra salɓay suya woyri ŋgi̧ kal ŋgoŋ. »
41Mí Zezu si kaɓ el ko kona ma tul gel ké ŋgoro fe hi̧na in na ri. Ke hekre daɓa nzukri ké ƴo gi ke fe hi̧na woyri ku̧ ɓil ŋgoro-uri. Mí daɓa nzuk fe ziŋnari ƴo ɓu lari ɓa ŋgi̧-u. 42Ke el ko wu̧y seh mbew ɓa ko̧hko-u gi ɓu gun lari mbew mbew seɗe ku̧ ri. 43Wara mí Zezu ɗi nzuk-dih fal yeri, ke ɓahri : « Wu̧y seh-ay hi̧ fe a ketina. Mi ƴo ɓah hi̧ wuri ɓahri se, fe hi̧na ye-ay ŋgi̧ kal tul fe hi̧na nzuk a a̧wri gbam 44ɓayu ké nzuk fe ziŋnari-aw, ku kehr nzak fe ziŋna woyri mí gi ku̧. A ye wu̧y seh-ay ba, ɔh tɔr fe ké-e ƴo keni ɓay so mun ye gaŋ mí ke hi̧-aw. »
Currently Selected:
Mbete Marki 12: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
