Mbete Luk 18
18
1Zezu el ɓah lawɓay a ɓoru hi̧ nzuk-dih fal yeri ɓay kú ta̧h ké tul goŋ Ŋgerzah ya, kú goŋ ni kpatara. 2Ke ɓah : « Nzuk-kuŋ salɓay mbew ƴo puh a hani. Ke ɗuk Ŋgerzah ya, su̧hru ké nun nzukri kara se ni ya pi. 3Wu̧y seh a hani ƴo puh-aw pi. Wu̧y ra toŋ gi ta̧w nzuk-kuŋ salɓay ra ƴo law ye ke ɓay ɓahri : “Nzukbaa bi ƴo laɓ mi suya, í dal baa bi ge.”
4Nzuk-kuŋ salɓay kaɓ gak sa lah ɓay ye ya lewsa̧ kaŋ. Falu bale, ke el ɓah ma law ye ɓahri : “Mi ɗuk Ŋgerzah ya, su̧hru ké nun nzukri kara se mi ya pi. 5Mí ɓay tul wu̧y seh-aw ké ƴo tul bi ke ɓay ra, mi dál baa ye hi̧ ni rɔkɔ ke ɔh ziŋ mi ndikpo.” »
6Gaŋ tul feri riw el ɓahri se : « Í lah wuri ɓay ké nzuk-kuŋ salɓay a suya-u ɓah ra. 7Ŋgerzah ba, nzukri ké-e lu niri ɓa sa̧w ye kú-u ƴo vuh hi̧ ni suŋ ke seh wa, ke ta dal baa woyri ya ley#18.7 Mahful-sɔɓ sa̧w nzak a ɓoru mí na-ay : ke ta kuŋ salɓay hi̧ nzuk yeri ké vuh hi̧ ni suŋ ke seh ya le ? Ke ik law ye ké tul woyri le ? ? Koseh woyri ƴo law ye. 8Mi ƴo ɓah hi̧ wuri ɓahri, ke úr wuɗ ɓay dal baa woyri. Keni-aw kara nam elna gun nzuk pirmatul le, ke zíŋ nzukri ké law woyri te sa tul Ŋgerzah gaŋ munu le ? »
9Zezu el ɓah lawɓay a ɓoru hi̧ nzuk a ɓoruri ɓáy ɓay fe le, ku ko mun woyri ɓa nzukri ké ƴo mbew ziŋ Ŋgerzah, ku el kpȩhr nzuk a ɓoruri ɓa kɔk fe. 10Ke ɓah : « Ke sa̧wseh-goŋ Ŋgerzah, nzukri seɗe hil si rih ɓil ila vul kani ye. Nzuk a mbewu ɓa farizi, nzuk a seɗe-u ba, ɓa nzuk-mbu̧h lampoh. 11Farizi loh ma pol ƴo ke ndarna ye kparak. Kaŋ mí ke ah haw ye ɓahri : “Ŋgerzah mi el ke tumbɔl hi̧ mu ɓay fe le, mi na kandɔk tɔr nzuk a a̧wri-aw ya. Mi rih riɓa ya, mi poŋ bolkusol wo ya, mi laɓ nunpuki ya. Mi na kandɔk nzuk-mbu̧h lampoh a a̧y kara ya pi. 12Mi ƴo saŋ mbih nam seɗe seɗe ɓil dimasi mbew mbew. Fe ziŋna biri gbam mi mgba ɓa gel boh boh mí-i el lu tulu mbew mbew hi̧ mu.” 13Nzuk-mbu̧h lampoh ba, ke ƴo fá-fal ɓa ɗih-u. Ke ko kona ki̧riri ma siɓa. Mí ke vba̧ haŋ ye zaɗ zaɗ ɓahri : “Ey Ŋgerzah, mú sel nzak pol wo ké tul bi, a bi ké mi ɓa suya-ay.” 14Kaŋaw mí-i ƴo ɓah ɓayay hi̧ wuri, nzuk-mbu̧h lampoh ra ɗer si puh ye ɓa nzuk ké Ŋgerzah ŋga̧h sal in ziŋ ni poŋ nzuk a ɓoru-aw ɓay fe le, nzuk a suŋ suŋ gbam ké ɔr tul ma síɓa le, tul ye ɓay ik ma siɓa. Nzuk a a̧y ké ɗiŋ tul ye ba, tul ye ɓay ɔr ma síɓa. »
15Nzukri ƴo gi ke gun a na ndɔkri ma ta̧w Zezu ɓay ké lu mgbɔkɔ ku̧ tul gunuri#18.15 Sa̧w nzak ɓahri, ɓaŋ ndɔk kan tul woyri. Ziɓri ɓaŋ ndɔk kan tul nzuk ɓa mahful-lu mgbɔkɔ ku̧ tul nzuk.. Nzuk-dih fal yeri ko mí hah gina woyri. 16Zezu ba, ɗi nzukri-aw gi ke gunri ké na ndɔk woyri. Ke el ɓah hi̧ nzuk-dih fal yeri kandɔkay : « Í poŋ gunri ɓá gi ta̧w bi. Í gboh niri ya ɓayu ké lák mbay Ŋgerzah na ɓay sam gun a kandɔkayri. 17Gelu munu. Mi ƴo ɓah ɓayay hi̧ wuri, nzuk a suŋ suŋ ké ya̧ lák mbay Ŋgerzah ma law ye kandɔk gun ya le, ke ta rih ɓilu ya gaŋ. »
18Mí ŋgernzuk a hani vbi Zezu ɓay : « Metere, nzuk a suki, a fe mí-i láɓ ɓay ya̧ puh a a̧y ɓay mí kaɓ ké ri sew ke sew ɓa ŋgɔh le ? »
19Mí Zezu ɓahri : « Ani mú-u ɗi mi ɓa nzuk a suki le ? Nzuk pirmatul a suki mbew ta-a. Ŋgerzah mbew yaŋ mí ɓa nzuk a suki. 20Mu tu ɓayri ké na ɓil bolkusol Ŋgerzah tu pi. Mú mbi wu̧y nzuk mbaŋ wo ya, mú i hul ya, mú ri-riɓa ya, mú kuŋ ɓay ku̧ nzak nzuk ya, mú hȩk bah wo ke mah wo#18.20 Ɓayay na ɓil Mbete Exode 20.12-16. . »
21Mí ŋgernzuk ɓahri : « Mi ƴo tul ɓayawri gbam ke seke bi ka̧h guri-ay. »
22Zezu ɓá lah ɓayaw bale, ke el ɓahri : « Ɓay mbew mí toŋ mu ɓáy. Mú si fa̧h fe ziŋna wori yeh riw. Mú wal lari-u hi̧ ko̧hkori. Mu ɓay ziŋ suki a nunmbam ŋgi̧ mbamba. Fal walu dale, mú el gi dih fal bi-ay. »
23Ke lah ɓay ké Zezu ɓah ba, law sena mbaŋ law ye ɓayu ké fe ziŋna ye ŋgi̧ mbamba. 24Zezu ko ni kaŋ, mí ke ɓahri : « Kpuh mbamba ɓay nzukri ké ƴo ke fe ziŋna ɓá hi̧ Ŋgerzah lak mbay ké tul woyri. 25Ɓay hi̧ zɔŋzɔŋ ɓá rih lɔkɔ bahtal ti̧h ra, gelu kpuh ya. Mí ɓay nzuk va̧na ɓá hi̧ Ŋgerzah lak mbay ké tul ye, gelu kpuh mbamba. »
26Nzukri ké ƴo lah ɓay ké Zezu ɓah ra ku ɓahri : « Mí-aw ba, nzuk a suŋ mí mah kaɓ ke ɔkna ɓa ŋgɔh le ? »
27Mí Zezu ɓahri : « Káɓ ke ɔkna le, mba nzuk pirmatul. Ŋgerzah mí mah ɓay hi̧ nzuk ya̧ gel kaɓna ké na ɓa ŋgɔh. »
28Mí Piyer ɓahri : « Mú ko. A wah ba, nah poŋ fe wah riw, mí nah dih fal wo-ay. »
29Zezu ba, ɓah hi̧ niri ɓahri : « Ɓa ketina. Mi ƴo ɓah hi̧ wuri ɓahri, nzuk a suŋ suŋ gbam ké poŋ sa̧w ye, wu̧y ye, yi̧n yeri, bah ye ke mah ye, gun yeri ɓay tul lák mbay Ŋgerzah le, 30suki ké-e ɓay ziŋu ɓay ŋgi̧ kal tul fe ké-e poŋaw. Ke ɓay ziŋu ké-e kaɓ ke ɔkna a ké na ɓa ŋgɔh sew a tukala-ay pi, sew a ké ƴo gi-u ɓa ŋgɔh pi. »
31Zezu mbu̧h nzuk-dih fal yeri a boh falu seɗe ra dale, ke ɓah hi̧ niri ɓahri : « Í lah. Nah ƴo hil wuri ma Zurusalem. Mí fe vbehnari riw ké gun nzak pihna Ŋgerzah a lewsa̧ri vbeh si tul gun nzuk pirmatulay ɓay laɓ ɔh wara. 32Ku ɓay ndoh ni ndɔk sa̧wnzuk a ɓoruri. Nzukawri-aw ɓay sak ni. Ku láɓ ni fe-se su̧hru. Ku sá-sam ku̧ tul ye. 33Ku vbóŋ ni ke ndehdɔŋ dara mí ku í ni. Nam a sayu le, ke tí̧h ke puh záh ke pa̧ymun a foyu. »
34Mí ɓayu guh law woyri ya. Sa̧wɓayu mu̧h niri mu̧h hi̧ ku lah ya.
35Sina Zezu ma Zurusalem bale, ku ka̧h Zeriko ɗih ya, mí ra̧w a hani-u kaɓ ɓel mahful ƴo rah ndɔk goŋ fe. 36Ke lah tiri daɓa nzukri ké ƴo kalna, mí ke el vbi nzukri, a fe ? A fe le wo ? 37Ku ɓah hi̧ ni ɓahri, Zezu ké Nasareɗ mí ƴo kalna.
38Mí ke vba̧ nzak ɓeleŋ ɓahri : « Zezu gun zih ŋgermbay Daviɗ, mú laɓ law in ziŋ mi ge. »
39Nzukri ké si pol pom ni ɓay ké tuh nzak ye. Mí ke toŋ vba̧ nzak ɓa mgbe-u ma síɓa síɓa ɓahri : « Gun zih ŋgermbay Daviɗ, mú laɓ law in ziŋ mi ge. »
40Mí Zezu ta̧h ƴo. Ke pih si gi ziŋ ni.
41Ra̧w ka̧h bale, Zezu nzah nzak ye ɓahri : « A fe mú-u yih ɓay mí laɓ hi̧ mu le ? »
Mí ra̧w ɓahri : « Ŋgermbay, mi yih ɓay ko gel. »
42Kandɔkaw mí Zezu ɓahri : « Mú ko gel. Law wo ké te tul bi hi̧ salɓay suya lu ké tul wo lu-lu. »
43Sa gelu-aw mí nun ye teh, ke ko gel. Mí ke dih fal Zezu, ke ƴo pir riŋ Ŋgerzah. Nzukri gbam ké ko fe-u, ku loŋ riŋ Ŋgerzah pi.
Currently Selected:
Mbete Luk 18: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
