Mbete Luk 17
17
1Zezu el ɓah hi̧ nzuk-dih fal yeri ɓahri : « Se-se ɓay gboh nzuk hɔ́l ndaw lihna hi̧ nzuk a ɓoruri ɓá saŋ riŋ bi. Mí keni-aw kara koseh ɓa a ye nzuk-hɔl ndawaw. 2Ɓay koseh-u ɓá se ni ya le, ŋgá̧h baw kasaw ké sol ye mbi ni vbu ɓil mahmbih su mba poŋ ni ké mgba gun a mah gelu ɓá saŋ riŋ bi.
3Í mgba tul woiri ɓa suki. Gelke yi̧n wo laɓ suya le, mú ɓah ɓa teh-u hi̧ ni, ké lah. Ke mbi law ye ké tul suya ma fal le, mú sel ni ɓayu. 4Gelke-e laɓ mu suya bɔk toŋndɔk say ɓil nam mbew, mí ke gi ta̧w wo bɔk toŋndɔk say ɓahri, law ye se ni ɓayu le, mú sel ni ɓayu kaŋ kaŋ bɔk toŋndɔk say. »
5Kaŋ mí gun nzak pihna Ŋgermbayri ba, ɓah hi̧ ni a ye Gaŋ tul feri riw ɓahri : « Mú hi̧ kanlaw wah ɓá ŋger ma pol. »
6Mí Gaŋ tul feri riw ɓahri : « Gelke law woiri ƴo mbew ke law Ŋgerzah mí eŋ ti̧hri ŋgahla, mí i ɓah hi̧ kpuh ké ƴo-aw ɓahri : “Mú lu ke sa̧w wo si ɓar sa̧w ké ɓil mahmbih-aw” le, kpuh-aw ɓay lah nzak woiri gaŋ ba.
7Gelke gun-laɓ pihna wo ur ke gel-pay nday mini gel-kɔr sami le, a ge ké sakra woiri ɓay ɓah hi̧ ni ɓahri : “Gun bi, mú gi gah, nah su̧ fe,” le ? 8Uwa, mu ta ɓah kaŋ ya. Wara le mu ɓay ɓah hi̧ gun-laɓ pihna wo ɓahri : “Mú kar fe su̧na. Mú lek mun wo, mú gi ke fe su̧na-aw hi̧ mí su̧, mí nzo. Falu dara mú su̧, mú nzo nzuku a wo ɓáy.”
9Bahgaŋ ɓay el ke tumbɔl hi̧ gun-laɓ pihna ye le wo ? Ke ta el ke tumbɔl ya ɓay fe le, pihna gunu ɓa láh nzak bahgaŋ ye. 10Kandɔkaw pi mí a woiri i ɓa gun-laɓ pihna. Nam ké i mbi ra bolkusol Ŋgerzah laɓ ɔh riw le, í ɓahri se : “Nah ɓa gun-laɓ pihna. Pihna ké nah laɓaw ɓa mbɔl ké tul wah.” »
11Sina Zezu ma Zurusalem bale, ke kal ke mahful sekle tusiɓa Samari ke tusiɓa Galile. 12Ke ti̧h puh a hani, mí nzuk ndɔɓeri boh nzɔh nun ye. Ku ƴo ɓa ɗih-u tɔɓ. 13Mí ku ƴo vba̧ nzak ɓahri : « Gaŋ wah Zezu wo, mú laɓ law in ziŋ na ge. »
14Zezu ko niri, mí ke ɓahri : « Í si wuri ma ta̧w nzuk fe puhna Ŋgerzahri hi̧ niri, kú ko mun woiri. »
Mí ku tɔr. Sina woyri bale, ndɔɓe nzom poŋ mun woyri teh peɗeɗe, saŋna-si gel fe puhna Ŋgerzah lu ké tul woyri.
15-16Nzuk ndɔɓe a hani-u mbew ɓá ko mun ye ké teh le, ke ta̧h el ke fal ye. Ke pir Ŋgerzah ke kusol a mgbe-u ɓeleŋ ɓeleŋ mí guɓ siɓa ké bɔk Zezu. Ke ƴo el ke tumbɔl hi̧ ni. Sa̧w tusiɓa nzuku ɓa tusiɓa Samari. 17Mí Zezu ɓahri : « Tul nzuk ndɔɓeri ké saŋna-si gel fe puhna Ŋgerzah lu ké tul woyri ɓa boh, ya le ? A tɔr nzuk a toŋndɔk mbewri-aw ba ? 18Él gi ɓay pir riŋ Ŋgerzah ko niri ya le ? Nzuk ké sa̧w ye ɓoɗay ke hȩk ye mí gi el ke tumbɔl le ? »
19Mí ke el ɓah hi̧ nzuk Samari ra ɓahri : « Ur síɓa. Mú si ɓa suki. Kanlaw wo ké tul bi ya̧ mu ke ndɔk hul ya̧-ya̧. »
20Fariziri vbi Zezu ɓay seh suŋ mí lák mbay Ŋgerzah ɓay ya̧ gel le ? Ke yih nzak woyri ɓahri : « Lák mbay Ŋgerzah ra, nzuk ta so nun dara mí ko keni ya. 21Nzuk ké ɓay ɓahri : “Í ko puh lakna Ŋgerzah mí na-ay,” ta-a. Nzuk kara ta ɓahri : “Í ko puh lakna ye ké ƴo sa̧-aw,” ta-a pi. Lák mbay Ŋgerzah gi rih haŋsekle woiri-ay da. »
22Zezu el ɓah hi̧ nzuk-dih fal yeri ɓahri : « Namri-aw ƴo gina ké i ƴó ke ɗaka ɓay ko nam mbew ké ɓil sew gun nzuk pirmatul, mí i ɓay ko ke nun ya. 23Gelke nzuk ɓah hi̧ wuri ɓahri se : “Í ko, ke ti̧h ƴo fál sa̧-aw,” mini nzuk ɓah : “Í ko, ke ti̧h ƴo falay,” le, í si wuri ya. Í ɗuk fal woyri ya. 24Ɓayu ké ti̧hna gun nzuk pirmatul ké nun nzukri ra ɓay na kandɔk mbam. Mbam sak yela teh gel riw hi̧ nzukri ko. 25Mí gun nzuk pirmatul ɓá ko seh dara ɓáy. Gun tukala-ayri ɓá saŋ ni ɓá ko ni ɓa kɔk fe dara ɓáy.
26Fe ké laɓ ke sew Nuwe ba, ɓay ti̧h ke sew gun nzuk pirmatul kaŋ pi. 27Nzukri toŋ su̧ fe, toŋ nzo fe, wo̧rori ƴo ya̧ wu̧y, bah gunri ƴo hi̧ gun woyri ya̧ wo̧ro, mí fe-u laɓ kaŋ kaŋ si ka̧h nam ké Nuwe rih vul tul mbih bale, mbih ya̧ tusiɓa ya̧h ya̧h, mí nzukri riw zi. 28Ke sew Loɗ kara laɓ kaŋ pi. Nzukri toŋ su̧ fe, toŋ nzo fe, ku toŋ yeh fe ke haniri, ku toŋ pah wakari, ku toŋ mboh vulri. 29Namu ké Loɗ ti̧h ke puh Sɔdɔm bale, hɔrɔ ke kasaw-lu hɔrɔ ké nunmbam ga̧y nde tul nzuk puh-uri, mí nzukri riw zi. 30Mí nam ké gun nzuk pirmatul ɓay ten mun hi̧ nzukri ko ɓay na kaŋ pi.
31Namu-aw ra nzukay ké ƴo tul vul le, ɓá ɗuk fe ye kiriŋ. Ké lu kerɓay-fa̧h fe yeri ké ɓil vul. Nzuk ké ƴo waka ba, ɓá el gi puh ya. 32Í ker ɓay tul fe ké laɓ wu̧y Loɗ. 33Gelke nzuk tasa̧y kaɓ tukala le, ke ɓay zi-u. Nzuk a a̧y ké poŋ kerɓay-kaɓ tukala ma fal le, ɓay ɔ-ɔkna. 34Mi ƴo ɓah ɓayay hi̧ wuri, ké suŋu-aw, nzukri seɗe ɓay na hih mbew, ku mbí nzuk a mbewu, poŋ nzuk a mbewu. 35Wu̧yri seɗe ɓay ƴo gel-naŋ fe. Ku mbí wu̧y a mbewu ba, poŋ wu̧y a mbewu ba. » 36#17.36 Mbete sa̧w nzak a haniri vbeh ɓahri, Wo̧rori seɗe ƴo waka le, ku mbi nzuk a mbewu poŋ nzuk a mbewu. Mbete sa̧w nzak a ɓoruri ta keni ya.
37Bale nzukri ké dih fal Zezu ra ɓahri : « Ŋgernzuk, fál suŋ mí fe-u ɓay laɓ le ? »
Mí ke ɓahri : « Gel ké hul ɓu ri, sa gelaw mí tamiri mbu̧h ri hani. »
Currently Selected:
Mbete Luk 17: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
