Mbete Za̧h 3
3
1 Farizi a hani mbew, riŋ ye ɓa Nikodem#3.1 Ɓay a ɓoruri ké si tul Nikodem na ɓil Mbete Marki 14.63 ke Mbete Za̧h 19.39.. Ke ƴo sakra ŋgernzuk-kuŋ salɓay ziɓri.
2Mí ke si ta̧w Zezu ke suŋ. Ke ɓah hi̧ ni ɓahri : « Rabbi, nah tu ɓahri, mu ɓa metere ké ur ké ta̧w Ŋgerzah. Ɓayu ké Ŋgerzah ƴo ziŋ nzuk-sɔk nzukri ɓay ye ya le, nzuku ɓay ta ke ŋgerna laɓ fe saŋri ké mu laɓaw ya. »
3Zezu yih nzak ye, mí ke ɓahri : « Munu, ɓa ketina. Mi ƴo ɓah ɓayay hi̧ mu, gelke nzuk pirmatul mbuŋ mbuŋna sa̧w mi̧hri a nunmbam ya le, ke ta tu lák mbay Ŋgerzah ya. »
4Nikodem ba, ɓah : « Nzuk kpɔkrɔ da ba wa, ɓay laɓ ani mí ku él mbuŋ ni ɓáy le ? Ke mah ɓay rih ɓil mah ye ɓay ké mbuŋ ni ɓáy lo ? »
5Bale Zezu ɓah : « Munu, nzuk mah rih ɓil mah ye bɔk seɗe ra ya ɓa ketina. Mi ƴo ɓah hi̧ mu-ay, gelke mbuŋna nzuk sa̧wu ti̧h ke mbih ya, ti̧h ke Tempuki ya pi le, nzuku ta rih ɓil lák mbay Ŋgerzah ya. 6Sa̧w mbuŋna nzuk ti̧h ke nzuk pirmatul le, ke ɓa nzuk pirmatul a sa̧w som siɓa. Sa̧w mbuŋna nzuk ti̧h ke Tempuki bale, ke ɓa nzuk pirmatul a sa̧w mi̧hri Tempuki. 7Mú hi̧ law wo ɓá na mu yer ké tul ɓay bi-aw ra ya. Mbuŋna wo ɓá laɓ ɓa mbuŋna a sa̧w mi̧hri a nunmbam. 8Kuna ku kandɔk ké law ye yih. Mu lah tiri-u, mí mu ko gel ké-e ur keni ya. Gel ké-e si ma mari kara mu ko ya pi. Kandɔkaw pi mí ɓa mbuŋna nzuk pirmatulri a sa̧w mi̧hri Tempuki. »
9Bale Nikodem ɓahri : « Mbuŋna-u laɓ ani munu le ? »
10Zezu el yih nzak ye ɓahri : « A wo mu ɓa nzuk-sɔk gun Izarayelri ɓay Ŋgerzah, mí ɓay ra mu tu ya le ? 11Munu, mu tu ya ɓa ketina. Mi ƴo ɓah hi̧ mu ɓahri se, ɓay ké nah tu mí nah ƴo ɓah-aw. Fe ké nah ko ɓa teh-u le, nah te-teh ɓayu, mí tehɓay wah ra i sa ya̧ ya. 12A woiri i ya̧ ɓay bi ké mi ɓah si tul ɓay fe tusiɓari ya wa, ani mí i yá̧ ɓay bi ké mi ɓah si tul ɓay fe nunmbamri ɓáy le ? 13Nzuk mbew ké ur ke tusiɓa si nunmbam ra ta-a ɓáy. Ɓa gun nzuk pirmatul ke hȩk, mí ur ke nunmbam ɗer gi tusiɓa.
14Kandɔk soy lari ké Moyiz tuh ŋga̧h tul ka̧wkpuh#3.14 Ɓay soy lari ké Moyiz tuh ra na ɓil Mbete Nombres 21.4-9. mí ɔr ƴo síɓa ɓil lawkɔr ra, ku ɔ́r gun nzuk pirmatul ma síɓa kaŋ pi, 15ɓay hi̧ nzukri gbam ké kan law tul gun nzuk pirmatul ra le, nzukuri ɓay ƴo ke ɔkna ɓa ŋgɔh.
16Fe-u na kaŋ ɓayu ké law sana Ŋgerzah na tul feri gbam ké-e laɓ ké tusiɓa ke nunmbam. Sa̧wu mí ke hi̧ gun ye ké mbew yaŋ, ɓay hi̧ nzuk a suŋ suŋ ké law ye te sa tul gunu le, ta zi ya. Wara le nzuku ƴo ɔ-ɔkna ɓa ŋgɔh, 17ɓayu ké Ŋgerzah pih gun ye gi tukala ɓay kuŋ salɓay suya ku̧ tul feri ké tusiɓa ke nunmbam ya. Le ke pih ni ɓay ten tusiɓa ke nunmbam ke ndɔk hul. 18Nzuk ké law ye te sa tul gunu le, salɓay hul ɓu tul ye mba. Mí nzuk a a̧y ké kan law tul gunu ya le, salɓay hul na tul ye kɔɓ ɓay fe le, nzuku kan law tul riŋ ɗina gun Ŋgerzah ké mbew yaŋ ra ya. 19Kehrna ye ké kehr nzukri mí na-ay : Gel tehna gi tusiɓa ke nunmbam da. Mí law sana nzukri na tul tirima poŋ gel tehna ɓayu ké fe laɓna woyri ɓa fe a pipiri-u. 20Ɓayu ké nzukri riw ké ƴo ndoh mun woyri ɓil fe laɓnari gɔɓ gɔɓ le, ƴo fu̧y gel tehna. Ku sa si ɓil gel tehna ya rɔkɔ gel tehna ra ɓá ten fe laɓna woyri. 21Nzuk ké ƴo tul ketina ba, ke si ɓil gel tehna ɓay hi̧ fe laɓna ye ɓá ten ké gel a teh-u ɓay fe le, fe laɓna ye ƴo mbew ke Ŋgerzah. »
22Fá-falu Zezu ke nzuk-dih fal yeri tɔr si tusiɓa Zude, ku kaɓ ri sal sal, mí ku soh ziɓri mbih batem. 23Za̧h ba, ƴo soh ziɓri mbih batem ké Anoŋ, ɗih ya ke Salim pi ɓay fe le, mbih mí ŋgi̧ ké ri ŋgi̧. Nzukri toŋ gi-u ƴo ti̧h mbih batem. 24Ke sewu-aw ku mgba Za̧h ɓu vul mgbal ya ɓáy.
25Mí fahɓay ur ké sakra nzuk-dih fal Za̧hri ke ziɓ a hani-u ɓay tul wɔ́k mun ɓay si pol Ŋgerzah bale, 26ku si ta̧w Za̧h, mí ku ɓahri : « Rabbi, nzuk ké ƴo ziŋ mu ké kala mbih Zurdeŋ ké mu te-teh ɓay ye ra, í ko. Ke ƴo soh nzukri mbih batem. Nzukri ŋgi̧-ŋgi̧ ƴo si ta̧w ye. »
27Za̧h yih nzak woyri, mí ke ɓahri : « Ŋgerzah hi̧ ya le, nzuk ta ya̧ ya pi. 28A woiri gaŋ mí i mbi ɓay bi ɓahri, mi ɓa Ŋgermbay ya. Le Ŋgerzah pih mi gi dara Ŋgermbay ɓá gi ɓáy. 29Wu̧y a foyu mí ɓa nzuku a nzuk-ya̧ wu̧yu. Ya̧h ye nzuk-lu wu̧y ra ƴo ri. Gelke-e lah kusol mbaŋ ye le, mun ye rih ni mbamba. Kandɔkaw mí a bi kara mi zay mun bi mbamba pi. 30Ke ŋgér si ma pol pol. A bi ba, él fal bi mí su.
31A ye ké-e gi ke nunmbam, ke mba tul feri riw. Nzuk pirmatul a som siɓa le ɓa nzuk a sa̧w tusiɓa. Ke ɓah ɓay fe tusiɓa. A ye ké-e gi ke nunmbam ra ke mba tul feri riw. 32Fe ké-e ko, ɓay ké-e lah mí ke te-teh ɓayu. Mí nzukri ya̧ tehɓay ye ya. 33Nzuk ké ya̧ tehɓay ye ba, ŋga̧h ɓay ɓahri, Ŋgerzah ɓa nzuk a ketina. 34Ɓayu ké nzuk ké Ŋgerzah pih ni ra ɓah ɓay ké Ŋgerzah hi̧ ni ɓah-u kandɔk ké Ŋgerzah hi̧ ni ŋgerna Tempuki ké el fal ya. 35Gun ra bah ye sa ni mbamba, mí ke poŋ feri riw ku̧ ndɔk ye. 36Nzuk ké kan law sa tul gun ra le, ƴo ke ɔkna ɓa ŋgɔh. Nzuk a a̧y ké sa lah nzak gun ra ya le, ta ziŋ ɔkna-u ya. Mí haŋ fa̧hna Ŋgerzah na tul ye. »
Currently Selected:
Mbete Za̧h 3: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
