Mbete Za̧h 2
2
1Nam a sayu dale, ti̧hmbih-ya̧ hani laɓ ké Kana ké tusiɓa Galile. Mah Zezu ƴo ri. 2Ku ɗi Zezu ke nzuk-dih fal yeri, mí ku si ri pi. 3Yim gi poh nzukri dale, mah Zezu si dakla ɓayu ké suk ye ɓahri, yim poh nzukri poh.
4Zezu ba, ɓah : « Wu̧y, ɓayu ko na wuri le ? Sa̧wseh bi ka̧h ya ɓáy. »
5Mah Zezu si ɓah hi̧ gun-laɓ pihnari ɓahri : « Í si, í laɓ feri gbam ké-e ɓah hi̧ wuri. »
6Ké gelu ra dȩh#2.6 Dȩh ziɓri ɓa kasaw kú-u fel ɓilu. ɓa tɔtɔklɔ mí ku̧ ri. Dȩh mbew le, ɓilu ah mah aŋ mbih litere sɔɗ dara mí mbah ri ɓáy. Mbih-u ba, ɓa mbih ké ziɓri wɔk mun woyri keni dara ku si pol Ŋgerzah ɓáy.
7Bale gun-laɓ pihna-awri si ta̧w Zezu, mí ke ɓah, kú ku̧ mbih mbah dȩhri-aw.
Ku ku̧ mbih mbah ri gaŋ ba. 8Mí Zezu el ɓah : « Aŋay, í kah wuri mbih-aw si keni hi̧ ŋgernzuk ti̧hmbih ɓá nzo. »
Mí ku kah si keni hi̧ ŋgernzuk ra. 9Ŋgernzuku ɓá nzo le, rim ye leh ɓa yim. Ke tu gel ké yimu ur keni ya. Mí a woyri gun-laɓ pihnari ké kah mbih-aw ba, ku tu-tu. Ŋgernzuk ra ɗi nzuk-ya̧ wu̧y. 10Mí ke ɓah : « Nzuk a ɓoruri gbam, ku ƴo hi̧ nzukri yim a suki kú nzo pol. Mun nzukri rih niri dara ku hi̧ nzukri ɗɔkna yim ɓáy wa. A wo ba, mu poŋ yim a suki ka̧h aŋay ɓáy le ? »
11Kandɔkaw mí fe saŋ ké Zezu laɓ ké Kana ké tusiɓa Galile ra ɓa ŋger fe sɔkna sakra fe saŋ a ɓoruri. Riŋ ɗina ye ten mun keni, nzuk-dih fal yeri kara kan law tul ye pi.
12Bol falu a ye ke mah ye ke yi̧n yeri ke nzuk-dih fal yeri ku ɗer si Kapernayum. Ku kaɓ ri nam ndi̧.
13Toŋ ɗih ya ɓay nam ti̧hmbih-i guy buma ziɓri ɓá ka̧h dale#2.13 Ɓay ti̧hmbih-i guy buma na ɓil Mbete Exode 12.1-27 ke Mbete Deutéronome 16.1-8. Ɓayu na ɓil Mbete Tɔh riŋri 1.28 pi., Zezu hil si Zurusalem. 14Ke si ɓil ila vul kani Ŋgerzah, mí ke ziŋ ɓa gel nzuk-yeh ndayri, samiri, ndoy mbɔreri. Ke ziŋ ɓa gel nzuk-kom lari ŋgomna ke lari misoŋri. 15Zezu bal sal ɓa ndeh bale, ke ni̧h niri riw ti̧h kala. Ke ni̧h nzuk-yeh sami ke ndayri. Ke el fer lari nzuk-kom lariri tɔh ku̧ kpah. Tabele woyri, ke sɔkrɔ mgborvboŋ mgborvboŋ ku̧ siɓa. 16Ke ni̧h nzuk-yeh mbɔreri ɓahri se : « Í fa̧h fe woiri riw ma kala. Í laɓ vul bah bi ɓa lumu ya. »
17Law nzuk-dih fal yeri-aw ker ɓay si tul ɓay Ŋgermbay ɓil mbete Ŋgerzah. Ɓayu ɓahri se : Law bi nzek ɓay vul wo#2.17 Gel ki̧na-u na ɓil Mbete Siŋ (Psaumes) 69.9-10..
18Bale ziɓ Zuderi vbi ni ɓahri : « Fe saŋ fe mú-u sɔ́k hi̧ na, náh tu keni ŋgerna tul wo ké mu laɓ feri-ay le ? »
19Zezu yih nzak woyri ɓahri : « Háw wuri vul kani-ay. Ɓil nam say mí-i él mboh ƴo gelu. »
20Bale ziɓ Zuderi ɓahri : « Vul kani-ay ra laɓ mbihmbam bon niŋ falu tɔtɔklɔ dara mí vulu mboh ɔh wa, a wo mu él mboh ƴo gelu ɓil nam say ley ? »
21Ɓay mbóh vul kani-aw ra Zezu ɓah ɓay tul mun ye. 22Law nzuk-dih fal yeri-aw ker si tul ɓay ké-e ɓah ra, mí ku kan law woyri tul ɓay ké vbeh ɓil mbete Ŋgerzah-aw pi, ku kan law woyri tul ɓay ké Zezu ɓah-aw pi. 23Ke seh ti̧hmbih-i guy buma ké Zezu ƴo Zurusalemaw daɓa nzukri kan law tul ye ɓay fe saŋ ké Zezu laɓ kú-u ko. 24Zezu ba, kan law ye tul woyri ya. Ke tu nzukri gbam. 25Ke ta ke ɗaka ɓay hi̧ nzuk ɓá ten tehɓay ké tul nzuk pirmatul hi̧ ni ya, ɓayu ké-e tu nzukri gbam tu. Ke tu ɓay ké mu̧h ɓil law nzukri tu.
Currently Selected:
Mbete Za̧h 2: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
