Mbete Fe laɓna Tempuki 2
2
Gina Tempuki
1Nam ti̧hmbih pandekoɗ ka̧h#2.1 Pandekoɗ ɓa ti̧hmbih ké Ŋgerzah sɔk gun Izarayelri (nzukri ɗi niri ɓa ziɓ pi). Ke ɓahri, kú mbu̧h ma vul kani ye ké Zurusalem ke mbihmbamri gbam. Kú ki̧ dimasi toŋndɔk say ur ke nam a sayu ɓil namri toŋndɔk seɗe ti̧hmbih-i guy buma dara mí ku laɓ ti̧hmbih pandekoɗ ɓáy. Ku puh fe ke tipele. Bol falu, ku goŋ Ŋgerzah ke haniri. Ziɓri ɓahri, nam pandekoɗ a titilu-aw ɓa nam ké Ŋgerzah vbeh bolkusol ye ke gun ndɔk ye kan kasaw a felu hi̧ Moyiz ké tul kasaw Sinay. Í ki̧ Mbete Lévitique 23.15-21 ɓay tu ɓayu., nzukri ké kan law sa tul Ŋgermbay mbu̧h hani gel mbew ké ɓil ila vul kani Ŋgerzah. 2Dale ku lah tiri fe mgbe ke nunmbam buvbuvbu eŋ baw kuna gi ya̧ gel kú-u mbu̧h ri ra. 3Mí ku ko fe eŋ rim hɔrɔ ti̧h nun woyri mí kehr ƴo tul woyri mbew mbew gbam. 4Bale Tempuki ya̧ mun woyri gbam wara, mí ku ɓah ɓay ke nzak ɓay ɓahna nzukri ɓoɗ ɓoɗ ɓa teh-u kandɔk ké Tempuki ɓaŋ ɓayu ndoh nzak woyri.
5Ké Zurusalem ra, ziɓri ké kaɓ ri ke ziɓri ké ur ke tusiɓa a ɓoruri riw gi mbu̧h hani ɓay ti̧hmbih-aw, ku ɓa nzuk law Ŋgerzah. 6Ku lah suhɓay nzuk-kan law sa tul Ŋgermbayri-aw gɔm bale, ŋgi̧na woyri gi mbu̧h hani hel. Kerɓay zɔklɔ niri ɓayu ké a ge ge kara lah ɓay ɓahna woyri ke nzak mbuŋna ye nzak mbuŋna ye. 7Ku kaɓ yer, fe-u na niri ɓa saŋ. Ku ɓahri : « Nzukri-ay ra wa, riw woyri ku ɓa ziɓri ké tusiɓa Galile, ya le wo ? 8Uwa, ani wara mí nah lah ɓay ɓahna woyri ke nzak tusiɓa wah nzek nzekay le ? 9Ƴona wah-ay, nzuk a haniri ur ke tusiɓa Parta, Meɗ, Elam ke tusiɓa Mezopotami pi. A haniri ur ke tusiɓa Zude, Kapados, Poŋ, Azi. 10Firizi, Pamfili, Eziɓte, Sireŋ ké tusiɓa Libi, nzuk a ɓoruri ké gi ti̧hmbih, puh woyri ɓa Rɔm. 11Nzuk a ɓoruri ɓáy ur ke tusiɓa Kereɗ ke tusiɓa Arabi. Gbam wah nah ɓa ziɓ ke nzukri ké sɔɓ mun woyri ɓa ziɓ pi#2.11 Nzukri ké yih ɓay sɔɓ mun woyri ɓa ziɓ le, ku laɓ fe say. Fe laɓna a titilu ɓa kuŋ ndi̧w. A seɗe-u, ku ti̧h ɓil batem a mbih ziɓri. A sayu, ku si ke fe puhnari kandɔk ké mbete bolkusol Ŋgerzah sɔk ke fe laɓna a ɓoruri ké na ɓil mbete bolkusol. Ti̧h ɓil batem a mbih ɓa fe laɓna ziɓri ɓay sɔk ɓahri, nzuku sɔɓ mun ye. Ke poŋ nzuk a ta̧wu ra na ɓil mbih ti̧h ɓa nzuk a foyu. Karaŋri ƴo ke fe laɓna a kandɔkaw pi.. Nzukawri-aw ɓah ɓay ke nzak tusiɓa wah nzak tusiɓa wah hi̧ na, nah lah fe saŋ ké Ŋgerzah laɓ. »
12Riw woyri ku kaɓ yer. Fe-u ndukru niri ndu-ndukru, mí ku ɓah ɓay ké sakra woyri ɓahri, a fe mí kaŋ le ? 13Wara mí, nzuk a ɓoruri sak niri ɓahri, ku ta yim kaŋto. 14Dale ké sakra gun nzak pihnari ké boh falu seɗe, Piyer ɓah ɓay ɓa mgbe-u hi̧ nzukri ɓahri : « A woiri, yi̧n bi ziɓri ké i na Zurusalem ke ziɓri ké gi Zurusalemay pi, í te suk woiri í lah sa̧wɓayay. 15A wah, nah ta yim kandɔk ké i ɓah-aw ya. Sa̧wseh toŋndɔk mbew ɓa tipele ɓáy#2.15 Nam ti̧hmbih pandekoɗ, ziɓri geŋ nzuk fe puhna ɓá puh fe dara kú su̧ fe su̧na ti̧hmbih ɓáy. Sɔk ɓahri se, sa̧wseh midi ɓá laɓ dara ziɓri poŋ saŋ mbih woyri, mí ku su̧ fe ɓáy. Sa̧wseh toŋndɔk mbew ɓa tipele, ku ƴo tul saŋ mbih ɓáy.. 16-17Lewsa̧, Ŋgerzah ɓaŋ ɓay ndoh nzak Zuyel gun nzak pihna ye ɓahri,
Sewu le, mi píh Tem bi ku̧ tul nzukri riw. Gun woiri a wo̧ro-uri ke a wu̧yuri, ku ɓáh ɓay ké a ye Tempuki ɓaŋ ndoh nzak woyri. Mí gun sekeri ku kó fe, ŋgernzukri ba, ku kó fe ke lɔlɔ pi. 18Mi ɓahri se, sewu ra, mi píh Tempuki bi ku̧ tul mgbal biri-aw gaŋ, a wo̧ro-uri ke a wu̧yuri. Ku ɓáh ɓay ké Tempuki ɓaŋ ndoh nzak woyri hi̧ nzukri ɓá lah. 19Mi láɓ fe saŋri ké nunmbam hi̧ nzukri ké tusiɓa ɓá ko. Sem ke hɔrɔ ke suh hɔrɔ ɓay ti̧h-u. 20Seh ɓay sɔɓ ɓa piri-u ndiŋ ndiŋ. Few ɓay sɔɓ eŋ sem dara mí nam ye Gaŋ tul feri riw ké ɓa nam a luki ké-e gi sɔ́k ŋgerna ra ɓay ka̧h ɓáy. 21Kandɔkaw mí nzuk a suŋ suŋ ké ɗi Gaŋ tul feri riw#2.21 Gel ki̧na-ay na ɓil mbete Ŋgerzah a polri. Gaŋ tul feri riw ké gel ki̧na-ay ɓa riŋ Miƴori ké gel ki̧na mbete Ŋgerzah a pol ra. Ku mbi gel ki̧na-aw ɓah keni ɓay tul Ŋgermbay Zezu, sɔk ɓahri, ku ɗi Ŋgermbay Zezu ke riŋ Miƴori. le, ke ɓay ya̧ ni#2.21 Ɓayay na ɓil Mbete Joël 3.1-5..
Mí fe-u ƴo laɓ kandɔk ké Ŋgerzah ɓah. »
22Piyer ɓah ma pol ra ɓáy : « Yi̧n biri, gun Izarayelri, í te suk woiri lah ɓay bi-ay. Zezu ké Nasareɗ ra Ŋgerzah sɔk ni ɓa Ŋgermbay hi̧ wuri ko. Ke laɓ fe saŋri ɓoɗ ɓoɗ ke ŋgerna Ŋgerzah ké sakra woiri kandɔk ké i tu. 23Zezu-aw ra, Ŋgerzah poŋ ni hi̧ wuri, a woiri ké i tu bolkusol ye tu, i i ni. I poŋ ni ndoh ndɔk sa̧wnzuk a ɓoruri ké ta ke mbete bolkusol Ŋgerzah ya. Ku ɓar ni ké tul kpuh vbatay kandɔk ké Ŋgerzah lek ɓay hul ye lewsa̧ kaŋ. 24-25A ye Ŋgerzah gaŋ mí ke ten ni ke puh záh hi̧ ni el kaɓ ke pa̧ymun a foyu. Ke i ŋgerna hul wu̧m ɓay fe le, hul mah mgba ni ya kandɔk ké ŋgermbay Daviɗ mbi ɓay ɓahna Ŋgermbay pol sa̧, mí ke ten siŋ ra ɓahri :
Ŋgerzah, a wo Miƴori. Mi ko kona ma tul wo kpatara ɓay fe le, mu ƴo ndɔk lakna bi rɔkɔ mi lih ɓu siɓa.
26-27 Sa̧wu mí law bi rih mi rih.
Nzak bi ah ɗi siŋ riŋ ɗina.
Mun hay bi gaŋ kara na ɗeŋ ké ndɔk Miƴori
ɓay fe le, mu poŋ záh bi sa puh záhri ya.
Mu hi̧ mi ké mi ɓa nzuku a wo puŋ mbuluk mbuluk ké ɓil lɔkɔ hul ya.
28 Mu ƴo hi̧ bɔk bi tu siŋ sina ké si ke ɔkna.
Law rihna a mbamba-u ba, ɓa ƴó ziŋ mu # 2.28 Ɓayay na ɓil Mbete Siŋ 16.8-11.. »
29Piyer toŋ ɓah ra ɓáy : « Yi̧n biri, nah tu te-teh, zih wah ŋgermbay Daviɗ hu lewsa̧. Ku gɔr ni, mí tupal ye ƴo ri ka̧h guri-ay. Aŋay, mi ƴo ke ful lu lakna ɓayu hi̧ wuri. 30Ké Tem Ŋgerzah ƴo ziŋ ŋgermbay Daviɗ, mí a ye, ke tu-tu, Ŋgerzah wahɓay mí hah fe ku̧ tul ye keni gbaɗ gbaɗ hi̧ ŋgermbay Daviɗ ɓahri, ke lu nzuk mbew ké haŋsekle gun zih yeri ɓay kaɓ ɓa mbay soh gel ye#2.30 Ɓayay na ɓil Mbete Siŋ (Psaumes) 132.11.. 31Ŋgermbay Daviɗ ra tu ɓay ti̧hna Ŋgermbay ke puh záh pol sa̧ kaŋ, ke ɓahri se, Ŋgerzah poŋ ŋgermbay sa puh záhri ya. Mun hay ye gaŋ kara puŋ mbuluk mbuluk ya#2.31 Ɓayay na ɓil Mbete Siŋ 16.10.. 32A ye Zezu ra mí Ŋgerzah hi̧ ni ti̧h ke puh záh ke pa̧ymun a foyu. A wah riw, nah ɓa nzuk-ɓah tehɓayu. 33Ŋgerzah mbi ni ɓa ndɔk lakna ye ké nunmbam ba, Ŋgermbay ya̧ Tempuki ké ta̧w baah, mí Ŋgermbay pih Tempuki ké baah wahɓay pih-u ku̧ tul wah ra, nah ya̧-ya̧ kandɔk ké i ko ke nun woiri, i lah ke suk woiri-ay pi. 34-35Ɓa ŋgermbay Daviɗ mí ɓa ndɔk lakna Ŋgerzah ké nunmbam ya. Mí ŋgermbay Daviɗ ɓahri : A ye Miƴori, ke ɓah hi̧ Ŋgermbay bi ɓahri, ké kaɓ ɓel ye Miƴori ɓa ndɔk lakna ye, ke ƴo ɔh ŋgerna nzukbaa yeri hi̧ kú ti̧h ɓa gel-ku̧ bɔk ye. 36Kaŋ dale gun Izarayelri gbam í tu ɓa teh-u, Zezu ké i ɓar ni ké tul kpuh vbatay, a ye gaŋ mí Ŋgerzah mbi ni ɓa Ŋgermbay. Ke ɓa Gaŋ tul feri riw. »
37Ku lah ɓayaw kaŋ bale, su̧hru se niri ŋgu̧y ŋgu̧y, mí ku vbi Piyer ke tɔr gun nzak pihna Ŋgermbay a ɓoruri ɓahri : « Yi̧n wahri, a fe mí nah laɓu le ? »
38Bale ke yih nzak woyri ɓahri : « Í mbi law woiri ké tul fe laɓna suya woiri-aw ma fal. Í ti̧h mbih batem ke riŋ Ŋgermbay Zezu kan tul woiri le, ke lú ɓay ké tul woiri. I yá̧ Tempuki ké-e wahɓay hi̧ wuri ra ɓáy. 39A ye Tempuki ɓa fe wahɓay ké Ŋgerzah hi̧ wuri ke gun woiri ke nzuk a ɗih-uri gbam, Gaŋ wah Ŋgerzah ɗi wuri riw ma ta̧w ye. »
40Piyer ɓah tehɓay a ɓoruri ɓa ŋgi̧-u hi̧ niri ku lah ɓa teh-u. Ke hew niri ɓahri : « Í kan law woiri tul Ŋgermbay hi̧ ni ké ya̧ wuri, ké ten wuri ké sakra nzuk tukalari, ku ɓa nzukri ya. »
41Bale nzuk a a̧yri ké ya̧ ɓay ye ra, ku ti̧h mbih batem. Ŋgi̧na woyri laɓ sɔɗ sɔɗ boh gel say (3.000) dɔɓ tul nzuk a polri. 42Mí nzuk-kan law sa tul Ŋgermbayri ƴo tul ɓay Ŋgermbay ké gun nzak pihnari sɔk. Ku mbu̧h hani ɓa nzuk ké mbew. Ku kaɓ ke haniri gɔh peŋ su̧#2.42 Fe laɓna gɔh peŋ laɓ ké nzak fe su̧na ziɓri kú-u laɓ ke nam ɔkna. Dara ziɓri ɓá su̧ fe su̧na le, ku pir Ŋgerzah, ku gɔh peŋ, ku wal koɓ yim mbew. Kandɔk ké sa̧w fe laɓna-aw sɔk ɓay Zezu le, ke sɔk gun yeri ɓá mbi fe laɓna gɔh peŋ ra, mí kú kerɓay tul ye. Fe laɓna-u kú-u ɗi ke nzak faraŋse ɓa sainte cène. Ŋgernzuk misoŋ ƴo ri mini ta-a kara, ku mbu̧h haniri ké kerpuh, ku gɔh peŋ dara mí ku su̧ fe ke haniri kandɔk Ŋgermbay Zezu sɔk.. Ku goŋ Ŋgerzah ke haniri mbew pi. Ɓa fe laɓna woyri kpatara. 43Fe laɓna Ŋgerzah na nzukri ɓa hȩkme. Ke hi̧ gun nzak pihnari laɓ fe saŋri ɓa ŋgi̧-u. 44A woyri kú-u kan law sa tul Ŋgermbay ra, ku ƴo mbu̧h hani gel mbew kpatara. Riw woyri ku ko nun fe ké sakra woyri ya. 45Ku yeh gel woyri mini fe woyri le, ku wal lari-u mah ke fe zɔklɔ ké ziŋ nzuku nzuku. 46Nam ke nam, ku mbu̧h hani ké ɓil ila vul kani Ŋgerzah ke law mbew. Ku mbu̧h haniri ké ɓil kerpuh kerpuh, ku gɔh peŋ hi̧ haniri dara mí ku su̧ fe ke haniri ke mun rihna ke law mbew pi. 47Ku ƴo pir Ŋgerzah kpatara, tɔr sa̧w nzuk woyri ba, law woyri rih niri ké tul woyri rih. Nam ke nam, Gaŋ wah ɓaŋ nzukri ké-e ya̧ niri dɔɓ tul woyri ma pol pol.
Currently Selected:
Mbete Fe laɓna Tempuki 2: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
