Mbete Fe laɓna Tempuki 1
1
1-2Soko wo, Diyofil. Mbete a bɔk seɗe-u wara mí-i vbeh hi̧ mu-ay#1.1-2 Nzuk-vbeh mbete ɓa Luk. Í mgba gel ki̧na-ay tuh ke gel ki̧na Mbete Luk 1.1 ɓay ko-u.. Mbete a pol ké mi vbeh hi̧ mu sɔk ɓay titil fe laɓna Zezu ke fe sɔkna ye kpu̧ru ka̧h nam ké-e hi̧ bolkusol ke ŋgerna Tempuki hi̧ gun nzak pihnari ké-e lu niri ku̧ ɓoɗ. 3Fal hul ye ra, ke ƴo sɔk mun ye hi̧ niri nam bon niŋ dara mí ke tɔr si nunmbam ɓáy. Ku ko ni ɓa teh-u hi̧ ku tu ɓahri, ke ƴo ri. Ke sɔk ɓay lak mbay Ŋgerzah hi̧ niri, kú lah.
4Seh-aw, Zezu ƴo su̧ fe ziŋ niri ra, ke sɔk niri ɓahri, kú kaɓ sa Zurusalem geŋ Tempuki ké baah Ŋgerzah wahɓay pih hi̧ niri kandɔk ké-e ɓah pol hi̧ niri lah. 5Ke ɓahri se : « Za̧h soh nzukri batem a mbih, mí nam toŋ ŋgi̧ mba i tí̧h ɓil batem a Tempuki wara. »
6Mí ku vbi ni ɓahri : « Gaŋ wah, mu hí̧ na gun Izarayelri náh el lak mbay aŋay ɓáy le#1.6 Ɓay lah ɓay puh lakna Ŋgermbay, í ki̧ Mbete Siŋ 2 ke Mbete 2 Samuel 7.8-15. ? »
7Mí ke el ɓah hi̧ niri ɓahri : « Tu nam-lak mbay gun Izarayelri ɓa ɓay baah Ŋgerzah ke hȩk ye. Ta ɓa ɓay woiri ya. 8Wara le, nam ké Tempuki gi ɗer pɔr tul woiri dale, i yá̧ ŋgerna. I téh tehɓay bi ur ke Zurusalem ke tusiɓa Zude si ka̧h tusiɓa Samari kpu̧ru ka̧h gbu̧h tusiɓa. »
9Ke ɓah ɓay ziŋ niri ɔh bale, ke tɔr ma nunmbam.
Tɔrna ye, ku ƴo ko kona ma fal ye kɔɓ ɓáy, mí ɗikmambam gi ɔr ni hi̧ ku ko ni mba. 10Ku ƴo ko kona ma fal ye yi̧m ba, nzukri seɗe ké gar woyri pu kpa̧h kpa̧h ƴo ta̧w woyri pi. 11Mí ku ɓah hi̧ niri ɓahri : « A woiri nzuk Galileri, ɓay fe mí i ƴo wuri sa gelay ko kona yi̧m ma nunmbam le ? Zezu ké i ko ni tɔr ge-aw ra kaŋ pi mí ke ɓay el gi. »
12Bol falu gun nzak pihnari ɗer ké tul kasaw Oliveh el si Zurusalem. Kasaw Oliveh ra ɗih ya ke Zurusalem kaŋto. Ɗihna-u mah salful mbew#1.12 Sa̧w nzak vbeh ɓahri, salfulu mah hani ke salful ké nzuk si sina keni ke nam ɔkna. Ké ta̧w ziɓri, salful si sina ke nam ɔkna ɓa salful mbew yaŋ. Ku si sina ɓa ɗih-u le, su ya.. 13Ka̧hna woyri ké Zurusalem, ku kal si rih ɓil vul gahru woyri ké fál síɓa. Riŋ nzuk a haniri mí na-ay : Piyer, Za̧h, Zak, Andere, Filiɓ, Toma, Bartelemi, Matiye, Zak gun Alfe, Simu nzuk-ri̧h si̧w ɓay tul sa̧wnzuk woyri ke Zudas gun Zak. 14A woyri-aw riw, ku ƴo mbu̧h hani kpatara. Ku ƴo goŋ Ŋgerzah ke law mbew. Mari mah Zezu ke yi̧n Zezuri ke wu̧y a ɓoruri kara ƴo ri pi.
15Ké ɓil namri-aw, nzuk yi̧n ɓil Ŋgermbayri ƴo mbu̧h hani. Tul woyri mah sɔɗ ke bon seɗe bale, Piyer ur ƴo sakra woyri. 16Ke ɓah ɓay ɓahri : « Yi̧n biri, ɓay nzuk-te Ŋgermbay ké Tempuki ɓaŋ ɓayu ndoh nzak Daviɗ mbay a luki pol sa̧ ra laɓ da, ɓa a ye Zudas Isikariyoɗ ké nda pol nzuk-mgba Zezuri. 17Zudas ra, ku ki̧ ni ziŋ na. Ŋgermbay lu ni ɓa gun nzak pihna ziŋ na pi#1.17 Ɓayu na ɓil Mbete Siŋ (Psaumes) 41.10 ke Mbete Luk 6.13-16 pi.. »
18(Zudasaw ke lari pihna a pipiri-u ye ra#1.18 Í ki̧ Mbete Matiye 26.14,15; 27.3-10 ɓay tu ɓay lari pihna a pipiri-u ye., ku fa̧h lari ye ra yeh keni waka, mí ke lih guɓ mgbuka. Ɓil ye sak ruɗ, ka̧hraɓil ye ti̧h wusuk ku̧ siɓa. 19Nzuk Zurusalemri gbam lah ɓayu lah. Sa̧wu mí ku tu riŋ waka-u ɓa Hakel-Dama. Riŋu sɔk ɓahri, waka sem.)
20« Kandɔkaw, ku vbeh ɓay a ɓoru lewsa̧ si tul nzuku ké ɓil Mbete Siŋ (Psaumes) ɓahri, kú poŋ puh ye ɓa kaŋpele kivbiw. Nzuk a ɓoru kara ɓá ɗeh puh ké ri ya#1.20 Ɓayay na ɓil Mbete Siŋ (Psaumes) 69.26.. Ku vbeh ké gel a ɓoru ɓáy ɓahri, nzuk a ɓoru ɓá soh gel pihna ye#1.20 Ɓayay na ɓil Mbete Siŋ (Psaumes) 109.8. . 21Kaŋ dale mah ɓay nzuk mbew ɓá soh bol Zudas. Nzuku ɓá na ɓa nzuk ké ƴo ziŋ na ke sew ké Gaŋ wah Zezu ha̧rma ziŋ na, 22ké na ɓa nzuk ké ƴo ziŋ na ur ke sew ké Za̧h soh nzukri mbih batem kpu̧ru ka̧h nam ké Zezu ti̧h ke puh záh ke pa̧ymun a foyu, ke tɔr si nunmbam. Nzuku ɓay ƴo ziŋ na, ke ɓáh tehɓay Ŋgermbay Zezu ziŋ na hi̧ nzukri lah. »
23Kandɔkaw mí ku ten nzukri seɗe. Nzuk a mbewu, riŋ ye ɓa Zezeɓ kú-u ɗi ni ɓa Barsabaɗ. Riŋ ye a ɓoru ɓa Zusteŋ. Nzuk a seɗe-u ba, ɓa Matiyas. 24Bale ku goŋ Ŋgerzah ɓahri : « Gaŋ wah, a wo, mu ko law nzukri ko. 25Mú sɔk na nzuk a suŋ mú-u lu ni ɓa gun nzak pihna wo ké sakra nzukri ké seɗe-ay ɓay ké laɓ pihna soh gel Zudas, a ye ké-e poŋ pihna-aw tɔr ma gel ké mah ke fe laɓna ye. »
26Kandɔkaw, ku laɓ fe eŋ ɓele ɓay ko keni nzuk ké Ŋgerzah lu ké sakra nzukri ké seɗe-aw#1.26 Ɓay ku laɓ fe eŋ ɓele, ku vbeh riŋ nzukuri seɗe kan tul gun kasawri seɗe. Ku ɓaŋ kasawri seɗe ku̧ ɓil kuh. Ku laŋ hi̧ kasaw mbew toh kala dale, ku ki̧ riŋ nzuku. Ɓay a titilu mí na-ay : Ku laɓ fe-u kandɔk ké Ŋgerzah sɔk niri ɓil Mbete Exode 28.30. Fe laɓna-u na ɓil Mbete Proverbes 16.33 ke gel ki̧na a ɓoruri. Ɓa fe laɓna ziɓri ɓay tu keni kerɓay Ŋgerzah. Ɓay a seɗe-u mí na-ay : Fal gina Tempuki ɓil mbete-ay mah-u 2, ku laɓ fe kona kandɔkaw mba. Tempuki mí sɔk niri kerɓay Ŋgerzah ké gel goŋ Ŋgerzah woyri. Í ki̧ Mbete Matiye 18.15-20, Mbete Efezeri 6.17, Mbete Za̧h 14.15-26, Gun mbete 1 Za̧h 2.20-27 ɓay tu ɓay Tempuki. Kandɔkaw, nzuk-ko fe konari ƴah ké ta̧w záh tukalari, ziɓri ba, ku goŋ Ŋgerzah, ku ƴah yihna-u ké nzak ye.. Mí ɓele ra mgba tul Matiyas. Kaŋ mí ku mbi ni rih sakra gun nzak pihnari ké toŋ boh falu mbew ra.
Currently Selected:
Mbete Fe laɓna Tempuki 1: SIAFNK
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. All rights reserved.
