JOANES, NOPUKU AFASAO SORE, 3.
NOPUKU AFASAO SORE, 3.
1TASI tane o Afarasi nitapa neigo Nikotimus, aia tasi teriki o tagata Jiteia;
2Aia nimai ia Iesu ia tupo, neitucua iateia, Rabai, acime keiro akoi tatane fakairo nimai ia Atua, ma jimra tasi tatane tomatua imna avere sore akoi imna, pe Atua senofo iateia.
3Iesu nifasao ma neitucua iateia, Tamari, tamari, Avou koutucua iatakoi, Pe tatane sefarere foci, aia secitiamana ta vaka o Atua.
4Nikotimus neitucua iateia, Feifacowa tatane kofarere foci pe aia tagata ituai? feifacowa aia fano foci ia nonai o tshana nana, ma keifarere foci?
5Iesu nifasao Tamari, tamari, avou koutucua iatakoi, Pe tatane sefarere o tavai ma o ta Nokano TAPU, aia sefanomana ia tavaka o Atua.
6Aia kofarere o kanouri aia konouri; ma aia kofarere o Nokano TAPU aia nokano.
7Natshicina masaro i afasao avou neitucua iatakoi, Erefia acowa kofarere foci.
8Tumtagi kosau hepe aia acitiafakarafia, ma akoi fakarogona ta norio o aia, ma akoi puspusi none wehe aia komai, mo none wehe aia kofano, hepe ana tatane iotshi kofarere o Nokano TAPU.
9Nikotimus nifasao neitucua iateia, Feifacowa ane iotshi ra mai?
10Iesu nifasao neitucua iateia, Akoi tasi teriki o tagata Isreil ma puspusi ane iotshi ra, mo?
11Tamari, tamari, Avou koutucua iatakoi, Acime koutucua taha acime keiro, ma fakairo taha acime neicitia, ma acowa sefakarogrogo tshome fakairo.
12Pe avou neitucua anea o takere wararonei, ma acowa sefakarogrogo, feifacowa acowa fakarogrogo pe avou fakairo acowa anea o taragi.
13Ma jimra tatane tasi neinace ia taragi, kaia aia nifanifo taragi, aia ta Nontariki o tagata, aia konofo ia taragi.
14¶ Hepe Moses neitshicitshiakace agata ia tugogou, hepe ana ta Nontariki o tagata katshicitshiakace.
15Pe tagatotshi fakarogrogo aia setouwaki ia tiafi sore, kaia nakamo aniamouri tou ma tou.
16¶ Ma Atua neicitiafakarafia sore fanua wararonei, pe aia neitufwa tshana Nontariki tasi ana aia niamo, pe tagatotshi fakarogrogo aia setouwaki ia tiafi sore, kaia nokoamo ania mouri tou ma tou.
17Ma Atua sekowna tshana Nontariki ia fanua wararonei, keitakaroiai ta fanua waronei; kaia pe aia kapare tagata wararonei ia ania mouri.
18¶ Seioria maganisa o aia fakarogrogo aia, kaia aia sefakarogrogo aia milow ioria niana maganisa konofo, ianei aia sefakarogrogo ia neigo o ta Nontariki o Atua.
19Tenei takaroiai acre, pe merama komai ia fanua wararonei, ma tagata neicitiafakarafia apouri mokagi ta merama, anera tshare amagane isa.
20Ma tagatotshi maganisa feimcowa ta merama, ma semai mana ia ta merama, pe aia neitucuasana niana maganisa.
21Kaia aia maganerefia tamari, aia komai ia ta merama pe tshana magane tagatotshi kowcitia aia vere ia Atua.
22¶ Wamuri ane ra nimai Iesu ma niana tagata aia nifakairo ia ta fanua Juteia, ma aia neinofo iai ma nibaptiso tagata.
23¶ Joanes foci iai nokobaptiso tagata i Inon itata Selim, ma tavai nalupai iai, ma acre niromai, ma nibaptiso acre iai.
24Ma nopogera acre setowaki Joanes ia ta fare, mukei.
25¶ Nopogera nifiatu neinace ia faru fakou Joanes nifakairo, ma fakou o Juteia i ateteroa.
26Acre niromai ia Joanes ma neitucua iateia, Teriki fakairo, aia nimai iatakoi nofokagi Jortan, aia akoi nifakairo tagata iateia, aia nokobaptiso, ma tagatotshi koromai iateia.
27Joanes nifasao neitucua, Tatane seamo ane tasi, kaia ane pe kotufwa aia ia taragi.
28Acowa faci neirogona tshaku fasao iateia, pe avou neitucua, avou jimra ta Kristo, kaia pe aia nikowna avou mokagi aia.
29Aia niarafia ta fene vaga aia tatane tshana; kaia te nele o tatane arafia tshana fine aia kotu fakaragona tshan afasao, kabisa sore fakarogona ta noreo o aia arafia ta fine; tenei tshaku kabisa kofonu iateia.
30Aia kavere sore, kaia avou kasisi wamuri nei.
31Aia kofanifo iluga aia kosore iluga tagatotshi, aia komai ia fanua wararonei aia komagane wararonei, ma nokofasao o fanua wararonei; aia komai ia taragi aia iluga iotshi.
32Ma taha aia nakacitia ma nakarogona, ane ra aia takairo, ma jimra tatane tasi purutshia ma fakarogrogo tshana fakairo.
33Aia nakapurutshia tshana fakairo, neitucua ia tshana roto Atua aia ko mari.
34Ma aia Atua nakakowna kofasao tafasao o Atua, ma Atua setufwa aia fakasisi o ta Nokano TAPU.
35Ta Mana acitiafakarafia ta Nontariki, ma nakatufwa ane iotshi ia tshana norima.
36Aia fakarogrogo ia ta Nontariki nakoamo anea mouri tou matou, ma aia sefakarogrogo ta Nontariki sekacitia anea mouri; kaia ta fakainina o Atua konofo iateia.
Currently Selected:
JOANES, NOPUKU AFASAO SORE, 3.: ANT
Highlight
Share
Copy
Want to have your highlights saved across all your devices? Sign up or sign in