JOANES, NOPUKU AFASAO SORE, 4.
NOPUKU AFASAO SORE, 4.
1NOPOGERA Teriki sore nikeiro Afarasi neirogona pe Iesu neimna ma nibaptiso tagata nalupai sore kagi Joanes,
2Iesu aia sebaptiso tagata, kaia niana tagata aia nifakairo.
3Aia nifeke Juteia ma nifano foci ia Calili.
4Aia neicitiafakarafia fano ia Sameria.
5Aia nimai iai ia tumrai tasi o Sameria tshana neigo Saikar, itata ta none o fanua Jakob neitufwa tshana nontariki Josef.
6Tavai nokonace mugaro o Jakob iai, Iesu nifano teretu palo nitaru iateia, neinofo ia tavai nokonace mugaro, itata taute.
7Nimai tasi fine o Sameria keifutshiakace tavai; Iesu neitucua iateia, Eitufwa avou tavai keinumea.
8Ma niana tagata aia nifakairo niroro ia tumrai sore keifakamata akai.
9Ta fene Sameria neitucua iateia, Tiaha akoi fatane o Juteia nogia avou keitufwa akoi tavai keinumea, ma avou fafine o Sameria? ma tagata o Juteia feimacowa ma sefasao tagata o Sameria.
10Iesu nifasao neitucua iateia, Pe akoi keiro aia Atua tufwa, ma akai aia koutucua iatakoi, Eitufwa avou keinumea; akoi nakownogia aia, ma aia nakatufwa akoi tavai mouri.
11Ta fine neitucua iateia, Teriki, tshou ane jimra keifutshia tavai iateia, ma tavai konace iraro ana; none wehe akoi amo tera tavai mouri?
12Akoi sore kage tamanome Jekob, aia neitufwa acime tavai nokonace tera, ma aia neinumea o aia, ma niana erecriki, ma niana akurimatou?
13Iesu nifasao neitucua aia, Tagatotshi kanumea tavai nei, nagimana kamate tavai foci;
14Kaia tagatotshi numea tavai avou katufwa aia sekamate tavai foci; kaia tavai avou katufwa aia kanofo ia tshana roto tavai nokonace ia anea mouri tou ma tou.
15Ta fine neitucua iateia, Teriki, eitufwa avou tavai tenei, pe avou semate foci tavai, ma semaimana keifutshiakace.
16Iesu neitucua iateia, Fano tapa tshou nunwane, ma komai icunei.
17Tafine nifasao neitucua, Tshaku nunwane kojimra. Iesu neitucua iateia, Akoi koutucua tamari, Tshou nunwane kojimra;
18Ma akoi niarafia erima nunwane; ma aia akoi arafia milownei, kojimra tshou nunwane, anera akoi neitucua tamari.
19Te fene neitucua iateia, Teriki, Avou kamentua akoi tase profeta.
20Tamenome nimori ia ta ora nei, ma acowa koutucua pe ia Jerusalem ana erefia tagata komori.
21Iesu neitucua iateia, Fine fakarogrogo avou ta nopoge nokomai pe acowa jimra ia ta ora nei, mo jimra ia Jerusalem, kamori ta Mana.
22Acowa puspusi taha acowa mori iateia; acime keiro taha acime mori iateia; ma aniamouri taragi komai o tagata Juteia.
23Kaia ta nopoge nokomai, ma konofo milownei, ia aia tagata mori tamari, kamori ta Mana ia nokano ma ia tamari, ma ta Mana acitiafakarafia tagata hepera keimori aia.
24Atua aia nokano ana, ma acre komori aia, erefia komori aia ia nokano ma ia tamari.
25Ta fine neitucua iateia, Avou keiro pe Mesaia nokomai, aia nitapa neigo Kristo; i taha nopoge aia komai aia kafakairo acime ane iotshi.
26Iesu neitucua iateia, Avou aia kofasao iatakoi.
27Hepe aia neitucua ra nimai niana tagata aia nifakairo, ma nimasaro pe aia nifasao ia ta fine; kaia jimra tasi tatane neitucua, Taha akoi kofakowia? mo, Tiaha akoi kofasao ia ta fine?
28Ta fene natshicina tshana taganea o tavai ma nifano tshana retu ia tumrai sore, ma neitucua ia fakou.
29Komai kowcitia tasi tatane, aia neitucua iatavou ane iotshi avou neimna ituai, aia ta Kristo, mo?
30Acre niroce tumrai sore, niromai iateia.
31¶ Mokagi acre niromai, niana tagata aia nifakairo neitucua iateia, Teriki, keina akoi.
32Kaia Iesu neitucua iacre, Avou nakoamo akai keina acowa puspusi aia.
33Neirogonora niana tagata aia nifakairo neitucua acre macre, Tatane tasi nimai takai aia nikeina, mo jimra?
34Iesu neitucua iacre, Tshaku kai keimna vere hepe aia nikowna avou acitiafakarafia, ma keimna tshana vere kurava.
35Acowa koutucua mo, Efa tumrama ma akorn koleu? kowcitia avou koutucua iacowa, Fakatariaga foimatowa milownei, ma kowcitia avere; acre kego milow ia ta koleu.
36Aia toria ma fetacina kofakamata iateia, ma fakatapuria nohua ia anea mouri tou na tou; pe aia eipesia nohua ma aia toria fakatapuria nohua kabisa fakaliki.
37Ma tafasao ra tamari ia ane nei, Tasi eipesia nohua, ma sece toria fakatapuria nohua.
38Avou nikowna acowa keitoria nokofakatapuria anera acowa severe iateia; faru foci tagata nivere iateia, ma acowa kororo ia niare avere.
39¶ Nalupai tagata Sameria o tumrai tera nifakarogrogo aia, i afasao o ta fine, aia neitucua ra, Aia neitucua iatavou ane iotshi avou neimna, ituai ma.
40Iai tagata Sameria niromai iateia, acre nogia mukei aia pe aia nofo iacre; ma aia neinofo iai nopoge erua.
41Ma tagata nalupai foci nifakarogrogo aia wamuri acre neirogona tshan afasao;
42Ma neitucua ia ta fine, Milow acime sefakarogrogo aia ia tshou afasao; ma acime neirogona aia, ma keiro tinei tamari ta Kristo, aia kapare tagatotshi wararonei.
43¶ Wamuri nopoge erua aia nifeke iai, ma fano ia fanua Calili.
44Ma Iesu aia neitucua, ta profeta sekabisa iateia ia fanua tshana.
45Nopogera aia nimai ia Calili, tagata Calili niarafia aia iacre, ma acre neicitia ane iotshi aia neimna ia Jerusalem ia tacripoga; ma acre foci niroro ia tacripoga.
46Ma Iesu nimai foci ia Kena o Calili, iai aia neimna tavai ia weina. Ma tasi teriki tshana nontariki, nimaci ia tumrai Kaperneum.
47Nopogera aia neirogona pe Iesu nifeke Juteia ma nimai ia Calili aia nifano iateia, ma neinogia mukei aia, pe aia komai ma penpena erefia tshana nontariki, ma aia koitata komate.
48Iai Iesu neitucua iateia, Pe acowa secitiamana ane sore ma masaro iateia, acowa sefakarogrogo.
49Ta Teriki neitucua iateia, Teriki komai iroro mokagi tshaku nontariki komate.
50Iesu neitucua iateia, Fano tshou taretu; tshou nontariki komouri. Ma tatane nifakarogrogo ta fasao Iesu neitucua iateia, ma nifano tshana retu.
51Hepe aia nokofano iraro, tshana afitshicow nifapa aia, ma nifasao nokoutucua, Tshou nontariki komouri.
52Iai aia nifakowia acre enaia aia neikamata keimouri. Ma acre neitucua iateia, neinafi itata touate ta mukaligi neinagke aia.
53Ma ta mana nikeiro aia itata touate Iesu neitucua iateia, Tshou nontariki komouri; ma aia nifakarogrogo ma iotshi tagata o tshana fare.
54Tenei ta vere sore fakarua Iesu neimna wamuri aia nifeke Juteia nimai ia Calili.
Currently Selected:
JOANES, NOPUKU AFASAO SORE, 4.: ANT
Highlight
Share
Copy
Want to have your highlights saved across all your devices? Sign up or sign in