Apostolmi 9
9
Saul Xükithekulu
1Tishi ake dolo, Saul ye Ampeu’w akhopemiqo pìthíve nikeu tsaqo pesü panongu kichi kümsà ake. Pa no achinetou lau wu 2no pa vilo Damascus lo Synagogqo ghenguno yèsüqo khu, tishianguno tilau Ampeu Là püla chekemi, kipitimi na totimi namu, pa no phulu kemiqo akughumi shi sasü Jerusalem lo ighi niye ke. 3Kughou pa no kicheghüzü shisü Damascus kupunú ighive keno paikhavi atsütsǘ lono aküvü lakhi no pa vehomxa pe yeluve. 4Pa ye ayeghi lo ilu iqive eno asütsa lakhi no ishi pa vilo pikeu chilu, “Saul, Saul, no ye kushiye ni pishi-puju cheni kea?”
5Saul no ishi iniju, “Ampeu, no ye khuu kea?”
Pa no khochile, “Ni ye nono pishi-puju akeu Jisü ke. 6Itehi ithuvelo eno mishighüna lo ilolo, eno no ye kiu shi moayesa keno O vilo pitsü nani.”
7Saul gholo timi izüwu chekemiqo ye kichi-mama puthugho auve; kughengu panongu ye asütsa chilu kemu khiumu ithumla ke. 8Saul no ayeghi lono ithughi, ikemu kughou pa no anhethi tsükho keno pa ye kiumu ithumlae. Ikehu panongu no pa u sünhe pesü pa sasü Damascus lo ilo. 9Atsala küthü kutólo pa ye anhethi icheve, eno kiumu chu-shomove.
10Damascus lo akhopemi lakhi pa je Ananias ipikeu ae. Ampeu no kungunhetsü lono ishi pa kue, “Ananias!”
“Iyei, Ampeu,” ipi pa no khochile.
11Ampeu no pa vilo pi, “Müzüchoi#9:11 Müzüchoi Laghi hipau ye Damascus phughi kipelau no kulolau kutólo müzüchoi achekeu eno ighono akhoto laghi lakhi ke. ipi chekeu laghila lo Judas ki lo wulo eno Tarsusmi Saul ipikeu iniju lo, kughengu pa ye akighini shi anie. 12Pa ye kungunhetsü lono timi lakhi Ananias ipikeu no ighino pa pelo ithulu kitheluve penike ghenguno pa shou au bekeu ithuluvae.”
13Ananias no khochile, “Ampeu, ni ye timi hipau eno pa no Jerusalem lo ow akimthe timiqo ghimeqhi keu ghiliqo kutomo chiluvae. 14Eno pa ye achinetou lau no azah luve no hilau O je ku aghí kemi kümtsü küghaluve niye ighi anie.”
15Ikemu Ampeu no Ananias vilo pi, “Wulo! Timi hipau ye iw küghaküsü shi Jewkumomi, kükami eno Israel timiqo lau I je pesü asheshu penike I no kisheluvae. 16I je ghenguno pa ye khijehi ime moayesa keno I no pa pìye nani.”
17Tipathiu Ananias no wu no aki alou ilo. Pa u pesü Saul shou be püzü ishi pi, “Athiküzüu Saul, Ampeu Jisü, khuu nono hilau wuche kelo alaghi lo O lau ipeghi keno, pa no O pelo ithulu kitheve püzü Aghungu Kimthe no chhitoilu peniye O lau I puwu ani.” 18Paikhavi, kiuala akhayiko toi keu no Saul nhethi lono ikiqive, eno pa ye ithulu kitheve. Pa no puthughove no baptiz shiluve, 19eno achuqupu hami chuve kethiu pa ye akumto shikitheluve.
Saul no Damascus eno Jerusalem lo wu keu
Saul ye atsala hami akhopemiqo sasü Damascus lo ngove. 20Pa ye paikhavi lono synagog lo Jisü ye Alhou nu kepi kütsü thuve. 21Pa tsa chilu kemi kümtsü no akümzave eno ishi iniju kilé, “Timi hipau ye Jerusalem lo Jisü je picheghi kemi thaqhü kütsakungo cheke kumo keshea? Eno pa no hilau ighi keu kimiji ye Jisü jeku chekemiqo akughumi shi achinetomiqo lau sasü wu niye ighike kumo keshea?” 22Ikemu Saul ye alau shi mutotoi kitheve no Damascus lo Jewmi küghüna akemiqo phiküghüzü ghi Jisü ye Messiah kepi kimchitsü.
23Atsala kutomo wove kethiu, Jewmi dolo no Saul pìthíve nike kümqü keu ipeghi, 24ikemu panongu no kümqü pe akeu Saul no ithive. Saul pìthíve nike ghenguno panongu no putho-pucho mishighüna khagho lo kheju ache. 25Ikemu Saul papemiqo no putho lono pa sawo ashoghi lakhi lo sǘve no aliwo kighipe lono kighitipiqive.
26Kughou pa no Jerusalem lo ighi keno, pa ye Jisü khopemiqo gholo kutubo niye pükapütsae, ikemu panongu kümtsü no pa msà ae, kughengu pa ye kuchou no Jisü papemi lakhi kepi panongu ye pülü müla no ake. 27Ikemu Barnabas no pa sasü kusho eno apostolmiqo lau sasü ighi. Pa no panongu vilo Saul no kicheghüzü là lo cheke lono kíshi Ampeu ithulu püzü Ampeu no pa pütsa, eno Damascus lo pa no ighümo no kíshi Jisü je lono kütsü keno tipaqo pie. 28Ike Saul ye panoqo gholo ngove eno Jerusalem qha kümtsü lo akumto shi Ampeu je lono asheshue. 29Pa no Greek tsa kipími Jewmiqo pütsa eno akikighe shie, ikemu panongu no pa pìthíve niye pükapütsae. 30Kughou pülüluve kemiqo no hipau ghili ithive keno, panongu no Saul sasü Caesarea lo iqi no Tarsus lo pa puwuve.
31Tipathiu Judea, Galilee eno Samaria qha kümtsü lo akukuhouqo ye alokughuno tüqhüdo ithulu eno panongu ye mtokitheluve. Ampeu sükümsa lono xü keu eno Aghungu Kimthe no shikumto keu vechewo panongu ye akikihi alau iko wove.
Aeneas eno Dorcas
32Peter no aphu sükümxaqo lo kicheghüzü shiche kelo pa no Lydda lo Ampeu’w timi xüküami xuju niye wue. 33Tilehi pa no timi lakhi Aeneas ipikeu kusholu, pa ye aphi ithamlave no ampe tache azüa dapesü acheke. 34Peter no pa vilo ishi pi, “Aeneas, Jisü Khristo no O shipivi anie. Ithu no O züa liküzüluve lo.” Aeneas ye paikhavi ithuve. 35Lydda eno Sharon lo xüküami kümtsü no pa ithulu no Ampeu lau xaideghikhae.
36Joppa lo küpülümi lakhi Tabitha (Greek lo li je ye Dorcas) ipikeu ache; li ye alhokuthu lo akümlà kivi shi eno kumlhomiqo kuphu ache. 37Tipa ghuloki lo li ye aküsǜ küghaluve eno thive, eno li sükumo ye shikimthe pesü achebo kunguu jolha lo qhipepüa. 38Lydda ye Joppa phivilo ae; ikehu kughou akhopemiqo no Peter ye Lydda lo ani ipi chilu keno, panongu no timi kini puwu eno Peter vilo hakite ghi ishi pi, “O shikimthi mtazü ighilo!”
39Peter no panongu gholo wu, eno kughou pa no ighi keno pa sasü achebo kunguu jolha lo saiku. Chimemi kümtsü no pa sümxa pe puthugho ae, eno panongu no qa ghi Dorcas no panongu gholo ache kelo chijeboboi-phi eno tiphimini kütau ghò keqo pa pìye.
40Peter no panongu kümtsü achebo lono khalau ipeve pe; tisheno pa no qhoqhünhe no inikhu. Pa no thive keu totimi küdau tsüghǜ ighi püzü ishi pi, “Tabitha, ithuvelo.” Li no anhethi tsükhove, eno pishipuwo Peter ithulu kelo, li no ithu iqave. 41Peter no pa u chhopuwo no li sünhe puthuve. Tishive no Peter no küpülümiqo eno akhotoshi chimemiqo ku püzü pa no li püxü pe panongu tsüe. 42Joppa qha kümtsü lo hipau ghili ithive, eno timi kutomo no Ampeu pülüluve. 43Peter ye Joppa lo ashiyiko kümlamì Simon ipikeu gholo ado hami ngove.
Currently Selected:
Apostolmi 9: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
