Apostolmi 10
10
Cornelius no Peter Ku
1Caesarea lo timi lakhi Cornelius ipikeu ache, pa ye Italymi Ghüshimi ipi chekeu lo aqhe shou zatsüu lakhi ke. 2Cornelius eno pa kibolomi kümtsü Alhou lau amlo kütsümi eno Alhou sümsa chekemi; pa ye kümsá no shishe kumlhomiqo kuphu eno pa ye tamo no Alhou vilo inikhu ache. 3Ghulo lakhi avelau ayì küthü ghuloki lo pa ye kungunhetsü lakhi ithulu. Pa no mütsümishei Alhou’w kungumi lakhi ithulu, kungumi hu no pa lau ighino ishi pi, “Cornelius!”
4Cornelius no akümsa lau no thüghüi pa ju. Pa no, “Kiu kea, Ampeu?” ipi iniju.
Kungumi hu no khochile, “O kighini eno nono kümsá no kumlhomiqo kuphu chekeu ye Alhou gizülo kümsüma müla keu kümlagho shi ikughivae. 5No ye Joppa lo timi puwulo. Panongu pelo tilau timi lakhi pa je Simon khuu Peter ipi ku cheni keno pa kuwu pelo. 6Pa ye Simon ashiyiko kümlàu ipikeu gholo ani, eno pa ki ye azüghi phivilo anike.”
7Kughou kungumi pa pütsa akeu no pa qhive no wuve keno, Cornelius no pa qemi kini eno pa ghinikishiu ghüshimi lakhi Alhou lau amlo kütsümi ishi kue. 8Pa no kiu shive keno thowkha panoqo vilo lhepe pive eno Joppa lo panongu puwuve.
Peter’w Kungunhetsü
9Tishiwo thoghiu kughou puchou ghuloki lo panongu no kicheghüzü shisü wo Joppa kupunúve keno, Peter ye akighini shi niye aki kütsüqa lo ikuve. 10Pa ye müzüthive eno kiuala chuni shiqhiyive, eno alibe kutò ake dolo no, pa ye piyeküsü lakhi ithulu. 11Atsütsǘ kijeve no kiu kela lakhi apa kijè toi keu tipau ako bidí shi no ayeghi küdau kughujupiqi keu pa no ithulu. 12Tipau lo apukhu bidí kupù lhoxü, itikiche lhoxü eno aghau jeli kümtsü ae. 13Tisheno asütsa lakhi no pa vilo pi, “Peter, ithuve püzü hi heqhi no chulo.”
14Ikemu Peter no khochile, “Ampeu, tishimlae, ni ye khilemu mithemo keu momu kitiqeve keu chuqu chuju mphie.”
15Asütsa hu no ghuthu akiniù pa vilo pi: “Alhou no shikimtheve keqo lakhimu kitiqevea ipi kevilo.”
16Ghuthu aküthüu kutólo hitoi pi püzü, ako bidí akeu apa tipau hu ye kungugha lo paikhavi ikhipesü ikuve.
17Kughou Peter no kungunhetsü kiqi ye kiu kea ipi avehuizüa kelo, Cornelius no timi puwu keqo hu ye Simon ki phuluve no khagho lo puthugho aghíe. 18Panongu no ku püzü, Simon Peter ipikeu anima pi inijue.
19Peter ye ti kutólo kungunhetsü ghili kümsükutoju ae, tishi akelo Aghungu no pa vilo ishi pi, “Simon, timi küthü no O phu cheni. 20Ike ithulo eno aki aqhou iqilo. Panoqo gholo wuni keu künacho kevilo, kughengu I no panoqo puwu anike.”
21Ikehu Peter no iqighi püzü timiqo vilo pi, “Nongu no phu chekeu timi hu ni ke. Nongu ye kiu shi ighi ani kea?”
22Panongu no ishi khochile, “Ningu ye aqhe shou zatsüu Cornelius lau no ighi anie. Pa ye amikuchomi, Alhou sümsa chekemi eno Jewmi kümtsü no pa gihu chekemi lakhi ke. Akimthe kungumi lakhi no pa vilo pikeu no O pelo pa ki lo ighino nono kiu pi kepu ani keno pa no ini kepu shini ke ighino pilo pie.” 23Ike Peter no pa ki lo inami shi ghi panongu sasüe.
Peter no Cornelius Ki lo wu
Thoghiu Peter ye panongu gholo wuve, eno Joppa lono küpülümiqo khami ghí pa gholo wue. 24Tishiwo thoghiu pa ye Caesarea lo ighi. Cornelius ye pa bolomi ngò paw shompamiqo ku kumqo no panoqo huqhe khe aghí. 25Kughou Peter no aki lo iloghi keno Cornelius no pa sasü kusho eno gihu keu michi shi Peter pukhuphi lo itsaqi. 26Ikemu Peter no pa sünheputhu no pi, “Puthughove lo, ni ghí timi lakhi ke.”
27Peter no Cornelius pütsa ghi aki alou iloghi kelo timi kutomo kumqo aghí. 28Pa no timiqo vilo pi: “Nongu kümtsü no akivishi ithi anike ni yeza kiqi lo ye Jewmi lakhi ye Jewkumomi ki lo iloghi kepu kumo momu Jewkumomi gholo kutubo kepu kumoe. Ikemu ni ye timi khumu pesü mithemo momu kitiqevea ke ipi kepu kumoe pi Alhou no I piyesüvae. 29Ike kughou I ku ighi keno ni ye kiumu lachile keu shimo no ighivae. Nongu ye kiu ghenguno I ku puwu keno I vilo pitsünima?”
30Cornelius no khochile: “Atsala küthü züu hipau tüqhüdo lo ni ye avelau ayì küthü kihe lo I ki lo akighini shiae. Paikhavi timi lakhi no phuphui keu tiphimini pepu no I zülo puthugho 31püzü ishi pi, ‘Cornelius, Alhou no O kighini chiluvetsüa eno nono aghòqo pesü kumlhomi kuphu chekeu hu Alhou no kümsüluve tsüae. 32Joppa lo timi puwu püzü Simon khuu Peter ipi ku cheni keno pa kuwu pelo. Pa ye azüghi phivilo Simon ashiyiko kümlàu ipikeu ki lo inami shi ngo anike.’ 33Ikehu I no akimighi shi O kuwu peniye timi puwu ke, nono ighive keu no alovae. Itehi ningu kümtsü hilehi Alhou zülo ani, eno ningu ye Ampeu no O vilo ningu lau kiu pilo pi azah tsü keno chilu nike ngokhe anie.”
34Tile Peter no ishi pithu: “I no itehi no vethalu akeu ye Alhou ye timi kümtsü aphiphi shi peitha acheni ipikeu ye kiutoi kuchou 35eno shiye jeli kümtsü lono pa sümsa chekemi eno kiu no achipi keno tipau shi chekemi ikhilu cheni. 36Nongu ye Alhou no Israelmi lau akükütsü sütsa tsü keu hu ithi ani, tiye Jisü Khristo khuu kümtsü shou Ampeu keno pa vechewo alokughuno tsakiviu piputo tsüke. 37Nongu ye Judea bocho lo kiu shive keno ithi ani, tiye John no Galilee lo baptiz ghili kütsü keu lono huthuke. 38Nongu ye Alhou no kíshi Nazareth nó ghami Jisü shou Aghungu Kimthe eno aküka vechewo nukishelu keno ithi ani. Jisü no akümlà kivi shisü iqho-iqi eno tüghami küká lo qhasü pe akemi kümtsü shipivi ke, kughengu Alhou no pa gholo ae.
39“Jewmi ghakhu ngò Jerusalem lo pa no mülà keu kümtsü ninguqo no thopimi ke. Panongu no kros lo pa tshüqhi no heqhipithíve ke. 40Ikemu Alhou no aküthüni no akithí lono pa xüputhuve no timi lau pephe-piye ke. 41Timi kümtsü no pa ithumlae, ikemu Alhou no thopimi kishe pe qhiluve keqo likhi no eno ningu khunoqo pa no akithí lono xüthuve kethiu pa gholo chu eno sho keno tipaqo no ithulu ke. 42Pa no ningu vilo atsakiviu timiqo lau kütsü lo ipi azah tsü eno küxümi ngò kithimi shou küghaküthau shipe niye Alhou no süküsü shikeu hu ye pa ke ipi ashepe shilo pike. 43Timi khuu no pa pülüni keno pa je vechewo axiné qhikütsü ithulu nani ipi Tungkupumi kümtsü no pa shepe shitsü.”
44Peter no atsa hipaqo piaphi lono akükütsü sütsa inilu kemi kümtsü shou Aghungu Kimthe ikughive. 45Jewmi küpülümi Peter gholo ighi kemiqo ye Jewkumomiqo shou ghí Aghungu Kimthe lepuku tsü aghí keu ithulu no akichiqhive. 46Kughengu panongu mili lono pi aghí keu eno Alhou sheqhe aghí keu panongu no chilu ke.
Tile Peter no pi, 47“Kuchou no khunomu azü pesü no panongu baptiz shini keu lo lakhave mülae. Ningu no Aghungu Kimthe ithulu ketoi panongu ghí ithuluvae.” 48Ike Peter no Ampeu Jisü Khristo je lono panoqo baptiz shilu penike azah tsü. Tithiu panongu no Peter vilo atsala hami panongu gholo ngo aghí tsülo pi qhüiniju.
Currently Selected:
Apostolmi 10: STB
Highlight
Share
Copy
Want to have your highlights saved across all your devices? Sign up or sign in
Puloshoqhi Akitheu, Sümi Tiqhelimi Bible™
Yekiphechipiu © 2023 by Biblica, Inc.
Puloza lu no peitha ani. Ayeghiqha kümtsü lo puloza lu no peithalu kepu chipiu ani.
New Testament, Sümi New Generation Bible™
Copyright © 2023 by Biblica, Inc.
Used with permission. All rights reserved worldwide.
